[真人真事+少少甜] 一切，由MSN開始: 第六十五章、丁：再次表白

見到藍藍收到張卡咁滿足，都不枉我用左咁多時間整左我人生第一張生日卡俾佢。 

話咁快就到左我地嘅下一站，食雞蛋仔。藍藍由細到大都好鍾意雞蛋仔。 

『呢度d雞蛋仔好出名嫁，外脆內軟，佢隻朱古力味仲會有一粒粒朱古力係入面添！』 

『嘩！好似幾吸引喎 』 

『隔離仲有間雪糕鋪，佢地d牛奶雪糕又滑又濃，搭埋雞蛋仔食仲正 』 





『咁兩樣都買黎試下啦』 

我拎住雪糕，藍藍拎住雞蛋仔，佢好似餓鬼上身咁，猛咁食猛咁食。 

『我要食雪糕～』藍藍對眼發哂光咁望住杯雪糕，明明佢個口都仲嚼緊雞蛋仔 。 

我“畢”左“更”雪糕餵俾藍藍，佢呆左呆，最後都係食左。跟住佢又餵返我食雞蛋仔，粒雞蛋仔食落口果陣好似多左陣甜味。 

食完雞蛋仔之後，我地就去左行街。行到攰之後，就去左間cafe到坐同埋食少少野，食完野果陣都已經五點。 





『我地仲有邊度去呀？』 

『緊係有啦，不過可能有少少大風喎』 

『姐係去邊姐？』 

『一陣你咪知囉 』 

我地搭左陣電車，去到西環出面嘅一個碼頭。 





『做咩帶我黎貨櫃碼頭呀？』 

『行出d你咪知囉』 

行到去海邊，一個好靚嘅夕陽就係我地眼前。 

『嘩！好靚呀！ 』 

『緊係啦，我聽人講呢度日落好靚先帶你黎 』 

雖然好大風，不過我地望住個日落都望到出哂神。 

『我帶左相機呀，不如我地影返張相丫 』 

『好呀 』 





我地搵左個阿叔幫我地影，雖然有d背光，不過影出黎都好靚 。 

『藍藍呀，你今日開唔開心呀？』 

『開心呀，好開心，多謝你呀 』 

我深呼吸左一啖，捉住藍藍對手，望住佢講。 

『咁…你可唔可以俾次機會我一直令到你咁開心？』 

『我…我想做你男朋友！』