[真人真事+少少甜] 一切，由MSN開始: 第六十四章、藍：生日心意

今日，係我既生日。 

早係兩個星期，丁當已經約好我，叫我一定唔可以約人。 

我係咁問佢去邊，佢又死都唔肯講，淨係約我朝早九點係樓下等。 

難得生日，我都盡量打扮下，著翻條裙。 

「叮噹... 叮噹...」咦！咁早會係邊個呢？唔通爸爸媽媽翻工拎漏左野？ 





望一望個防盜眼，原來係丁當！ 

「藍藍，生日快樂呀！ 」 

「做咩咁早呀！人地先啱啱起身！！」 

「我太興奮訓唔著哈哈，所以咪早d上黎搵你。 」 

「又唔係你生日，你興奮黎做乜？」 





「總之我就興奮啦！你快d換衫，如果唔係就趕唔切！」我依家先醒起自己仲著住睡衣！仲要個頭成堆雜草咁... 

「做咩仲企係到？」丁當突然舉起手向我既方向，好似想攬住我咁！？ 

「7頭，你嘴角仲有少少牙膏呀！ 」下！！！好7呀！ 佢伸手抹下我嘴角，我本能咁避開。 

「我自己得啦！ 」我即刻跑番去廁所，鏡入面既自己紅都面哂。唔知點解，我覺得今日既丁當眼神比以前堅定，好man… 

搞左二十分鐘，我終於出得門口。 





「我地依家先搭地鐵去北角。 」北角咁遠？對於我地呢D荃灣友，平時出街去到最遠通常都係旺角個邊。 

一出閘，眼前出現左一間舊式影院。大堂貼左無數張海報，其中一張係... 〈不能說的秘密〉！ 

「點解會有嫁！明明套戲好多年前上嫁！！！」杰倫BB係我偶像，電視重播不能說的秘密〉個時，我都話好想入戲睇一次。估唔到係正我生日會有重上大銀幕既一日！   

「這是一個不能說的秘密喔！」丁當係到扮小雨同我講，呢一下真係幾感動。 

「知你鍾意睇，所以特登帶你黎。係咪好好先？ 」 

「至好係你啦！我地快D入去啦。」 

成場戲唔知點解我有少少緊張，我有預感今日會發生D好特別既事。 

「睇完戲去邊度？ 」 





「我地去搭叮叮車啦！」我都好耐無搭過啦。 

「好呀，同丁丁搭叮叮。」 

我地坐上上層，可以望清楚周圍既風景。 

「藍藍，生日快樂！」丁當拎出一張卡！係手製卡！！丁當識我咁耐都無寫過生日卡比我，一黎就係自己整！ 

張卡其實真心有D醜樣，D相拉到變哂形，又係自己係Printer印，丁當D字又樣樣衰衰。 

不過，我真係好好好好好好開心！ 對好多男仔黎講，寫張Memo都會嫌煩，何況整張卡。