[真人真事+少少甜] 一切，由MSN開始: 第五十章、丁：大打出手

終於都將心入面嘅野講哂出黎，成個人都舒服哂。 

為左藍藍，我願意一直等落去，因為我深信佢都有鍾意我。 

過左個聖誕假之後就係考試，不過經過左咁多野之後，我都無咩心情去温書。依家同kelly分左手，我亦都再無理由去補習。 

我將我同kelly分左手嘅事講左俾肥仔俊聽。 

『終於都分左喇？』 





『咩終於呀？你一早就預我地會散？ 』 

『你根本就唔鍾意人，人地對你好少少就同人一齊，咁樣你好快就會同佢分手啦 』 

『成個戀愛專家咁喎 』 

『識左你咁耐，點睇你都係鍾意藍藍啦 』 

『係呀…不過咁又點丫…』 





『係男人嘅就搶佢返黎啦！ 』 

『點…點搶呀？ 』 

『死蠢！自己諗啦』 

『講到好似好勁咁，原來你咪又係無料扮四條，都知你條毒向左走向右走幫唔到手 』 

搶？我都想呀，都要佢肯受我先得嫁… 





雖然係放緊假，不過籃球隊都照有練習。原本我有諗過走數，不過如果咁就姐係代表我怕左大雄，點都唔可以未打先輸嘅。 

返到學校，無論我幾時望向大雄，佢都係啤住我，好有敵意咁。 

『好喇，而家分兩隊進行練習賽，輸左果隊要跑２０個圈！ 』 

教練將我地分左兩隊，咁岩我同大雄係敵隊… 

一開波，大雄就已經mark實左我，仲要係好貼身果隻，迫到我連波都接唔到。係籃底爭位果陣又多小動作，又出肘又踩腳，我就緊係還拖啦，結果搞到火藥味勁濃。 

大雄攞到個波，不過俾我守死左。點知佢唔行左唔行右，直接帶住個波就撞埋我度，我即刻跌左落地。 

本來我都已經俾佢搞到我好燥底，所以我緊係唔忍，即刻起身打左佢一拳，教練見到就即刻過黎分開左我地。 

『喂，唔好咁過分好喎！ 』我終於忍唔住出聲。 





『依家係邊個過分呀？你一日仲痴住藍琛蕾，我就唔會放過你！ 』 

『你地兩個夠喇！即刻同我去跑圈，跑到我叫停為止』 

從來見親大雄都係嬉皮笑臉咁，我未試過見到佢咁認真咁嬲嘅樣。 

不過，如果係牽涉到藍藍嘅事，我絕對唔會退讓。