[真人真事+少少甜] 一切，由MSN開始: 第三十九章、丁：觸電Moment
你有無試過『觸電』？
我唔係講緊真係俾電流電親果隻觸電，而係突然間嘅一個moment，你深深咁俾一個女仔吸引住，就好似望到好震撼嘅風景咁，你會有幾秒出左神，就好似『觸電』咁嘅感覺。
呢一個moment人人遇到嘅都唔同，當你同個女仔嘅視線對上嘅時候 ，個女仔扮飲野迴避你視線，佢果塊有小小紅嘅側面可能已經令你觸電。又或者係佢做緊一d 傻的嗎野俾你見到，都可能會電到你。
只不過係短短幾秒，但係已經足夠你將果一個畫面，果一個moment定格，深深咁刻下你個腦入面，以後都唔會忘記。
屬於我嘅果一個moment，發生係一間ok便利店。
我地果陣食完飯，行緊去糖水鋪果陣經過一間ok，因為肥仔俊話要買本雜誌，所以我地一齊湧入個門口。
個門口唔係好闊，大約只有一個半身位。我企係最後面，藍藍咁岩行係我前面。
藍藍行到個門口嘅時候，佢忽然停左係度。我諗住繞過佢，我向右側身行，點知佢又移去右邊，我行右佢又移右。就係咁來回左幾次，佢突然轉半個頭望住我笑左笑，跟住就行左入去。
我呆左係度，我觸電喇！！！
就係果一個笑容，果一個天真嘅笑容，果一個淺得黎又好可愛嘅笑容，令到我觸左電。我知道好抽象，我講完都覺得好1999，不過我。真。係。觸。左。電。
我呆左幾秒，肥仔俊已經搵到本雜誌，佢地又行返出黎。
『我…唔食糖水啦，我…老母吹我返去』我果其拋低個藉口就走左。不過kelly話要陪我，我由得佢陪我行返屋企，但係我都唔記得佢講過d咩。
我個腦不斷loop返藍藍岩岩嘅回眸一笑，搞到差d睇唔到路撞到燈柱。
我知道，kelly嘅笑容無論幾燦爛都好都唔及得上藍藍咁有感染力，咁打動到我。就算kelly除哂衫係我面前張開腿，我都唔會有呢種觸電嘅感覺。
原來，我一直鍾意嘅都係藍藍。
