[真人真事+少少甜] 一切，由MSN開始: 第二十一章、藍：主動離場

「丁當，你想要乜我都比你。你開口就得啦... 無論係我既真心，定係... 我個人...」點解Kelly會講d咁既野！？ 

「Kelly...」我見丁當紅都臉哂，一臉尷尬咁... 

「丁當！你唔洗答我住... 我依家淨係想問你，你對我唔通真係一D feel都無？ 」Kelly好似就黎想喊咁，眼濕濕咁望住丁當。 

「我承認係有，但...」 

「但係乜？又係因為藍琛蕾？ 唔通我地星期六果一吻對你黎講都係毫無意義？ 」咩話！原來丁當星期六約左Kelly… 唔怪得佢遲遲都唔覆我...  





佢地仲要已經發展到嘴嘴，原來我真係好似肥仔所講我應該遠離丁當，因為我係多餘果個。 

「丁當，我知嫁... 你眼中永遠都係藍琛蕾最緊要，從你平時所有行為、眼神我都睇得出。最近你根本係有心避開佢，你先係咁搵我，你估我唔知咩？曾經我都覺得唔緊要，做到你朋友已經好幸福。但係當你搵得我愈多，我就愈唔想你離開我... 」 

「Kelly… 無錯，我當初係想搵你去避開藍藍，因為我真係頂唔順大雄成日係佢身邊痴身痴世。但依家我已經無咁諗，我真心當你係好朋友，亦曾經對你心動...」 

聽到呢度，我真係唔想再聽落去... 一直以黎，我都已經習慣左丁當係我身邊。呢一刻發現自己係多餘果個，真係好難受，眼淚自己都滴落黎。 

「唔好喊啦，Kelly。我知你覺得好委屈，其實你絕對唔係比唔上藍藍。」丁當抱住Kelly，拍拍佢個頭，佢每拍一下我個心就痛一下。 





「比D時間我。我知你對我好好，而藍藍... 佢都已經有大雄，唔再需要我，況且佢一直都只係當我好兄弟。我應承你，我會慢慢放低藍藍。 」 

呢一刻，Kelly終於都笑，而我再都笑唔出。丁當，你今次錯啦... 睇黎唔係我唔再需要你，係我唔應該再需要你。  

依家諗真D，丁當外表係幾毒，但又有幾分可愛，而且心地唔差，對人人都好好。雖然未至於好受人歡迎，但如果佢肯，佢要搵個女朋友都唔會話好難。 

一直以黎佢都無其他女性朋友其實都係因為我。我諗... 我係時候漸漸淡出。既然我一早講好左唔要同丁當做情侶，就應該比D空間佢同其他女仔發展，如果一直霸住佢就太自私。

叮噹叮噹叮噹... 小息終於都完。呢個小息真係過得特別長... 丁當同Kelly都離開左儲物室，我唔想上去住，見到佢地我就好似變左外人咁。 





「藍藍！你係咪係入面呀？」有人係門口叫我，應該係大雄。 

「我係到呀，大雄！」 

「太好啦！都估你係度。Miss Wong搵你呀，要上堂啦，仲以為你發生左D乜意外。做乜仲唔上去？ 」我暫時唔想同其他人講頭先件事，所以求其話自己執野個時扭親想休息下先上去，諗住搵人幫手結果一直都無人。 

大雄一聽到我扭到，就即刻揹起我。我係咁話唔洗，一黎我無扭親，二黎我唔好意思。佢堅持揹我上樓梯，其實我都有少少感動，特別係呢D咁無助既時刻。多謝你呀，大雄。 

第二個小息個時，我又要一個人拎D功課落去比Miss Wong。行行下，係轉角突然有D野突左出黎，我即刻亞太區有一天成為亞太區左街，所有功課都散落係地上面，做乜今日做咩都唔如意！ 

「哼！抵死！ 」一個女仔好無情咁講，我一望原來係班上面既富家女—Selina。我一向都同佢唔太熟，但無得罪佢，佢唔幫我執番都算，仲要話我。 

「今次當比個教訓你！哈哈」另一個女同學話。佢一腳踩係我執緊既功課上面，點解要咁做！隔離幾個跟班都係到笑。 

「唔好怪我地！要怪就怪你自己成日姣住大雄，搞到我地既Selina姐唔歡喜！ 」咩話！我認得佢地啦！佢地就係成日係籃球場邊9叫個幾個花痴。 





「正一花痴！   」 

「你講咩呀！你夠膽你講多一次！」 

「我話你地 正 一 花 痴 呀！ 」其實平時我都唔會咁惡，但今日心情唔好，再加上我平時我為班做咁多野，依家唔多謝我，仲要話9我！真係諗起都想喊... 

突然，其中一個肥婆好大力咁推跌我！其他幾個人即刻圍住我！校園欺凌係電視上面見得多，但從來都無諗過會發生係自己身上，點算好....