[真人真事+少少甜] 一切，由MSN開始: 第十三章、藍：浪漫虛名

「對唔住…我唔應該講啲咁嘅野，或者我地真係比較適合做朋友。多謝你件衫，我走先喇，下次再見啦」完全估唔到丁當會向我表白，因為我一直以為我地會係一世兄弟。其實... 比丁當攬住既時候，我都有諗過答應佢...  

「丁當！唔好走住！我... 可唔可以比我攬多一下... 一下就好。」唔知點解，我好唔想丁當走，好似一走佢就會永遠唔番黎咁。我未等佢回應，已經抱住左佢。 

「藍...」 

「噓...」本來我想同丁當好好再傾一下，點知... 唔知係咪太 支力 ，定我想逃避，我就咁樣係丁當懷抱下訓左一晚。 

第二朝...     





「藍琛蕾！你同我快D起身！你曳啦你！ 」今日明明星期六，做乜呀媽晨早就叫我起身。我一睜開眼，唔單止見到媽媽，仲見到丁當訓左係我隔離！！！係喎！大件事！ 

「媽...」 

「唔洗解釋啦！」 

「媽！我地兩個無野嫁！係我琴晚太 支力 … 先唔小心訓左。 」 

「伯母，唔關藍藍事嫁！ 」 





「呵呵呵！呀女，唔緊要。係丁當，我就放心啦，你兩個慢慢，我出去啦，唔好搞出人命就得，哈哈」結果，間屋又得番我地兩個，氣氛好尷尬... 

突然，丁當將我推上床！！！ 

「丁當！你又做咩？！」 

「伯母叫我地慢慢呀嘛哈哈，我緊係聽話。 」丁當壓住我，哄到好埋，佢好似想錫落黎... 明明琴晚我先拒絕左人，呢一刻又有少少... 期待。 

「傻瓜！你咁多肉，我先無興趣哈哈，我真係走啦！多謝你！」佢把口係度講笑，但個樣話我知佢一D都唔開心。就係咁，丁當真係走左。走之前，我見到佢眼眶通紅，好似想喊咁。藍琛蕾，你請完人食檸檬，又要人陪你訓，你太過份！睇黎，我傷得丁當太深...  





其實，我何嘗無諗過丁當做我男朋友呢。由細到大，我地雙親都已經認定對方係親家，我同丁當拍拖、結婚係佢地眼中都係理所當然，亦都係佢地一直期望既。但偏偏... 我同丁當都講過我地唔可以一齊，因為我地實在太過了解對方，有時唔出聲佢都已經知我諗乜。無錯，好多青梅竹馬最終都有一齊，之後白頭到老。但當中都有好多係最終各散東西，永不相見。如果要係永遠同愛情之間選擇，我情願選擇前者，因為兩者同樣可貴，但前者比後者更加長久。「女朋友」只係一個虛名，我唔強求。或者... 我係時候先比D空間丁當。

成個上奏我自己一個坐係廳度發呆，到左3點有d餓，先走去煮左碗腸仔通粉。望住眼前呢碗腸仔通，我又諗起琴晚既事。為左避免自己再亂諗，我想開開電腦上下Facebook散散心。一開電腦...  

㊣唔需要法寶.大雄： 
19:33 藍藍 你仲未ON既？ 
19:33 去左邊呀？ 

㊣唔需要法寶.大雄 傳來震動 

㊣唔需要法寶.大雄： 
20:31 ON左搵下我啦 
20:32 好掛住你哈哈 
00:05 今晚好忙？有時間搵下我  
00:06 聽晚就中秋節 好期待同你去玩  

00:06 我訓啦 早抖  
08:54 早晨呀 仲未得閒？ 
15:02 去左邊到呀？我擔心你   

琴晚一直無ON到MSN，原來大雄搵左我成晚... 死啦！我完全唔記得左今晚就係中秋！ 

我： 
16:44 Sorry！呢兩日太忙 所以無ON到 
16:44 今晚係幾點邊到等呀？  


㊣唔需要法寶.大雄： 
16:44 你終於都ON啦！！！ 
16:45 我以為你打算失約 所以專登避開我 
16:45 今晚9:00 係海濱網球場外等你  

我： 
16:46 好啦 今晚見  
16:47 我做埋D功課先 886  

中秋前夕，我先同丁當搞成咁。算啦算啦... 唔諗咁多。今晚好好同大雄玩一玩，應該好快無事。 

「爸！媽！我出去啦。」到左夜晚，同爸爸媽媽食完晚飯後我就打算落去。 

「女呀，你同丁當玩得開心D啦！」 

「老豆，我今晚唔係約左丁當...」 

「咁你同你班好姊妹都盡興D！」 





「我都唔係約佢地...」媽媽見我表情怪怪，就拉我入房，我就將今晚約左大雄既事同佢講。 

「女女，我仲以為你同丁當... 不過唔緊要啦哈哈，你開心就好。記住，無論點都好，十年後既自己唔好後悔就夠。 」我只係約大雄一晚姐，點解媽媽咁認真呢...  

「知道啦。我再唔落就遲到啦，Bye bye！」 

落到去已經9:32，最衰都係媽媽。 

「Sorry呀！我遲到啦！大雄，你...」