[真人真事+少少甜] 一切，由MSN開始: 第八章、丁：深深不忿

「咦！」 

本來諗住可以同藍藍一齊跑步，將郭雄仁從我地兩個嘅世界中暫時分離，點知竟然咁好彩俾我地撞到佢，心入面即Hi左出黎 。 

「Halo，又會咁岩嘅」郭雄仁又擺出果個殺死女嘅笑容 。 

『係呀，我地岩岩跑完步』 

『我平時都會黎海傍跑步嫁喎，得閒不如一齊跑丫？』 





『好呀，遲啲再約丫』正當我想狠狠拒絕佢嘅時候，藍藍已經秒回左佢。 

『遲啲msn講丫, 聽日見』 

『再見』我無同佢講再見，因為我根本唔想同佢再見 ，但最弊嘅係藍藍好似好受佢咁，但係我又咩都做唔到 。 

每個禮拜五放學前嘅兩堂都係啲濕勁德育課，其實即係班主任求其派張紙跟住就俾我地吹水。 

『好喇，而家大家分做４個人一組討論下啦』成班男仔掛住打丁根本已經咩都聽唔到。 





『我可唔可以過埋黎同你地一組呀？』依個時候，個大雄竟然懶係熟咁痴埋黎 。 

『好丫，反正我地都係吹水姐 』藍藍又諗都無諗就應承左佢。 

跟住果兩堂，佢由周杰倫傾到日劇，再由日劇傾到番tvb，對一個平時淨係識睇波同打機嘅毒向左走向右走黎講，我真係連半句爹都搭唔到。成堂都睇住佢地有講有笑，我就成碌木咁坐係度，果一刻嘅我覺得自己好似已經未打先輸咁 。 

依個時候，我突然醒起之前msn問我功課，果個叫做『靜香』嘅女仔。反正都無野做，我就拎左張紙出黎對番個msn hotmail。羅曉瑩？個名咁熟嘅，我望一望周圍，視線落左係一個女仔度。哦！原來係kelly！kelly係一個好靜嘅女仔，咁多年都同佢同班，但係就一句野都無講過。佢唔係啲咩靚女，存在感基本上係零。原本仲ff可能會係女神搵我沾沾自喜，原來只係個隱形人，真係有少少失望。 

返到屋企，就見到肥仔俊msn我。 





小肥: 
19:33 遲啲中秋一唔一齊去網吧打機？ 

唔講都唔記得，開學之後好快就到中秋節。以前嘅我年年都同肥仔俊係網吧打通宵機過，藍藍就多數同屋企人或者姊妹過。不過，今年我都係時候要脫下毒，費事俾隻雄仁乘虛而入 。 

我： 
19:42 應該唔打 
19:42 遲啲請番你打機補數 

我係msn度搵番藍藍出黎，今次唔可以再俾個雄仁捷足先登。 

我： 
19:43 halo~ 
19:43 你中秋得唔得閒？ 
19:43 識左咁多年都未同你慶祝過 不如果晚一齊食餐飯？ 





send左出去之後，成個人都鬆左口氣咁，我而家唯一可以做嘅就只有等佢嘅回覆 。