用一場穿越籃網的夢想，擁抱妳: 15

我走到電視櫃旁邊，倚著父親新買回家的單車，拿起無線電話，按下八位數字。

「喂？」

「喂？喂？輝，我係聰仔呀。」

「嘩，點呀聰爺。近排成日見你放左學就一支箭飛走喎。趕住溝囡呀？」

「咪玩啦輝少，有正經野想同你針兩嘴。」





「正經野？我自修室BOOKING FULL哂啦喎，睇黎陪你唔到啦。」

「唔係，唔係。同你傾傾呢，我想重新夾返隊波，最後一年，我地重新黎過呀。」

「重咩話？重新黎過？我同你分左手咩？咪玩啦聰少，我唔想重考個Alevel就真。」

「唔係呢，其實我地季軍拎過，亞軍都拎埋啦，其實真係差一步就完到夢，點解唔搏？」

「唉，聰仔，我明你諗咩。都咁多年隊友，唔通我會懷疑你團火咩。但今鋪真係恕我無能為力喇。我呀媽想我跟家姐讀POLY喎。雖然唔係話咩天方夜譚，但再打落去，我怕我真係唔掂呀。」





「你一向都考開全級頭二十，打波真係咁影響咩？努力左六年，唔通最後先黎放棄？」

「就係最近呢兩三年練到走火入魔，退哂步。」

「但係──」

「唔洗但係啦。聰，你要加油呀。殺入決賽，我仆都仆黎睇。喂我趕住去自修室啦，係咁先啦──」

嘟。





嘟。

嘟。

我放下話筒，再重新拿起，按下另一組八位數字。

「喂，你好，唔該我想搵炮筒。」

「邊撚個炮筒呀？打錯呀──」

「唔係，唔好意思，我想搵陳耀添。」

「搵添仔？你係佢同學仔呀？岩啦，幫我搵下個衰仔，佢最近三晚都冇返黎訓啦。」

「冇返黎訓？佢冇去返學咩？」





「佢退左學啦，咁你都唔知？你扮佢同學呀？有咩企圖呀你？」

「唔係唔係，因為佢細我一年，佢係我校隊隊友。」

「校隊？個仆街仔打乜撚野校隊？你個白撞唔好再打黎啦你──」

嘟，

嘟。

嘟。

「Contact Name文豪 Contact Number 6xxx 3xxx」





「喂文豪，聰仔呀。」

「咦聰仔，好耐冇見過你啦喎。隻手好返哂未呀？」

「好得七七八八啦，今日先打返波咋嘛。近排有咩搞作呀？」

「近排都係咁啦，岩岩先投完幾篇稿，幫個補習學生改完作文咋嘛。」

「哦──喂你下年仲會唔會打校隊？」

「下年呀，我諗──唔會啦。一黎要衝ALevel，二黎今年暑假之後開始呢，要幫學校文苑出個本文集，Miss Chan搵左我做總編輯呀，呢鋪睇怕有排搞。」

「但你平時都忙到七彩架啦，抽少少時間打波都得姐？你知啦，冇左你呢個控衛替補既話我地唔掂架嘛。」

「乜你下年仲想打咩？」





「點解咁問？」

「上年冠軍賽輸左之後，你人影都冇隻，電話搵你又唔覆，我地成隊都以為你唔會再打啦。」

「係呀，我個陣屋企有啲事……」

「屋企有事？唉聰仔，我明白場波去到最後輸得咁唔抵，對你黎講係好大打擊，但你有冇諗過對於我地呢啲，係關鍵時刻剩係有得坐係場邊睇既人黎講，睇住自己個隊長發哂夢咁亂開最後一球，然後粒聲唔出走左去，係幾咁令人失望既一件事……」

「……係，sorry呀，但我諗清楚架啦，我想搏埋最後一年。我好需要你地。」

「唔好同我道歉啦，我唔係想話你啲咩。同埋講呢啲野已經冇用喇，隊波已經散哂。」

「已經……冇再練波啦？」





「我地練乜鬼呀仲，得返細個班練囉。或者你打去問下其他人點諗先啦，講真，你地starting個五個先係最重要，如果其他四個入面有三個都仲會打既，就預埋我啦。」

嘟，嘟。

嘟。

瘦杰，肥杰。兩通幾個月來都沒有打過的電話。

兩組幾個月來都沒有看過的，電話號碼。

瘦杰。八個數字，八聲按鍵。

嘟，嘟，嘟，嘟。

嘟，嘟，嘟，嘟。

「你所打既電話號碼，暫時未能接通。請你遲啲再打過。The number you have dialed…」

突如其來的疲憊感湧上眉額，眼皮頓如千斤墜落。

我默默放下手機，輕輕閉上眼睛。

慢慢地，靜靜的，沉沉睡去。