《情困之時，我遇上了自稱情性的情聖》: [Case 09－折翼天使] PART 10
一早起身...
未梳洗之前...
我就拎一拎起部電話...
打一打開個Whatsapp...
喺個“七仔之家“個Group道，隨便咁打左句“我今日都有D事要做 返唔到舖頭”～
*噹* “Yuki：你又唔返呀？！”
*噹* “Zoe：你又去偷懶呀？！”
*噹* “Yuki：你尋日已經射左架喇喎！”
射咩呀？
係唔係想話射波呀？
呢個Yuki真係...講野硬係要講到唔清唔楚咁架喎！
我再喺個Group道打多句“係丫～舖頭就靠晒你地兩位大美人喇～”～
*噹* “Zoe：做老闆點可以咁懶架？！成日都唔返工！”
下？乜唔係咁先至係老闆咩？
仲有…我邊有成日姐？
我已經有成年無休過半日喇！
*噹* “Yuki：係咯係咯！做老闆要親力親為先得架嘛！力不到不為財呀！”
下？而家仲邊有老闆係親力親為架？
個個都係點D員工幫佢賣命～
自己就day day drive Ferrari架啦～
*噹* “Zoe：係咯係咯！你仲唔返黎 真係想做死我地咩？！”
呵呵～乜你而家知我重要喇咩～～～
等你地平時成日無大無細，咁鬼囂張丫喇～～～
*噹* “Yuki：我唔理丫！你再唔返黎既話 我同Zoe就拆左你間舖！”
嘩！咁樣算唔算係恐嚇丫？
我係唔係要好驚驚丫？
*噹* “Zoe：係丫係丫！你再唔返黎 我地就食晒你D薯片！”
*噹* “Yuki：我飲晒你D可樂！”
*噹* “Zoe：我食晒你D杯麵！”
*噹* “Yuki：我食晒你D雪糕！”
*噹* “Zoe：我睇晒你D 100毛！”
*噹* “Yuki：我拆晒你D Dom黎吹波波！”
佢地兩個靚女就你一句，我一句咁...
講過不停...
“好喇好喇好喇～我聽日返黎買返D西餅俾你地食喇～”
當我怕左你地喇...
*噹* “Zoe：嗱你話架！講過唔可以唔算數架！”
*噹* “Yuki：我要食東海堂！”
*噹* “Jerry：係唔係聽者有份先？”
*噹* “明仔：老闆唔會就係請女仔食野咁比加超丫嘛？”
你地呢兩隻野丫...頭先就喺道食花生...一聽到話有西餅食，就立即閃出黎...
“好好好好好～東海堂就東海堂～聽者有份就聽者有份啦～”
好喇好喇好喇...算我怕左你地喇...
*噹* “Jerry：好野～老闆萬歲～”
*噹* “明仔：老闆果然係一個好男人～”
*噹* “Zoe：算你啦！”
*噹* “Yuki：咁我地今日就按章工作啦！”
唉...你話丫...邊有做老闆既，會做到咁架？
不過又有乜辦法...
叫鬼我今日真係有D好緊要既野要做咩...
我有D咩緊要野要做？
仲緊要得過間舖？
講起上黎，就真係長篇...
是咁的～
話說我尋日搵完情性，正想搭巴士離開冷漠既港島區之時，我見到個坐住輪椅既老婆婆...
喺好多熱心人士幫忙之下，老婆婆終於都上到巴士～
巴士上雖然已經迫滿乘客，但大家都讓出位置出黎，俾老婆婆可以去到個輪椅位～
仲有個熱心既女仔幫老婆婆扣上安全帶～
而老婆婆一路都帶住和藹親切既微笑點頭道：「唔該～唔該～唔該～唔該～自己黎得喇～唔該晒～真係唔該晒～你真係好人丫～」
望到呢個坐住輪椅既老婆婆...我就喺道諗...
究竟坐輪椅既感覺係點架呢？
就係呢個問題，令我突然閃出一個念頭！
不如就試下坐一日輪椅，體會一下坐輪椅既感覺啦！
體會一下...我諗我呢個念頭都唔差丫～
之但係，我喺邊道搵架輪椅黎坐呢？
無理由走去買架返黎架...
唔通走去醫院偷咩？
犯法既野我係唔會做架！
但我好人好姐，D復康中心又唔會無啦啦借架輪椅俾我架喎...
復康中心…
等等先...
恒哥仔咪好似係喺復康中心做架囉？
係乜野復康中心呢？
唔...唔好理咁多喇...我諗只要係復康中心就會有輪椅架啦！
好！等等打個電話問下佢先～
我一路企喺巴士裏面～企喺人群裏面～企喺個女仔後面諗下諗下～
諗下企下好快就返到入黎屯門～
我一落車，就立即拎部電話出黎～
『恒哥仔既電話...恒哥仔既電話...搵到！』我立即撥號～
「嘟...嘟嘟...嘟嘟嘟...嘟嘟嘟嘟...喂～咁耐無搵過我地，我地以為你死左喇～」恒哥仔帶住把稚氣既聲線話一話我～
咁多年無聽過佢把聲，都仲係成個細路仔咁～
『無丫～要睇住間舖丫嘛～所以咪無時間搵你地出黎食飯囉～』我都有D唔係咁好意思...
因為都真係好耐無見過佢地...
無同過一大班Friends出黎聚一聚...
就連一餐晚飯都好耐無食過...
「咁你今次打黎係唔係想約我地食飯丫？我地個個星期六都仲有約出黎食晚飯架喎～一齊丫～」恒哥仔誠意邀請～
『呃...我諗OK既...我編左更再覆你地丫～不過...今次打俾你係有事請求...』都係講返正經野先...
「哦？有事請求？你唔係想問我借錢丫嘛？做乜丫？舖頭唔掂咩？要借幾多丫？一萬幾千我都仲可以借俾你頂住先既～」恒哥仔輕輕鬆鬆咁講。
『唔係唔係～借就係借...不過唔係借錢...』無乜必要，我都唔想問人借錢...
欠老豆既已經夠大筆...夠晒大壓力...
真係唔想再欠其他人錢...
「哦？咁我仲有乜野可以借俾你？」恒哥仔問一問。
『我係想問你借...』我吸一口氣，『輪椅...』
「問我借...輪椅？！你有咩事丫？你無事丫嘛？」恒哥仔好擔心咁問我...
『我...我就無事...』我仲好地地既...
「無事做乜問我借輪椅？」恒哥仔又問一問。
『我...係咁既...我想體會下坐輪椅既感覺...』我直接講...
「體會下坐輪椅既感覺？無事無幹無啦啦做咩野要體會下坐輪椅既感覺？」恒哥仔追問一下。
『呃...因為一個女仔...因為一個坐輪椅既女仔...』我再直接D講...
「哦？因為一個坐輪椅既女仔...你鍾意左個坐輪椅既女仔丫？」恒哥仔繼續追問。
『嗯...』我都係直認罷啦...
「哦～原來係咁～之不過呢～我係唔可以借輪椅俾你架～你要知道，我地中心D輪椅係要借俾D有需要既人～萬一我借左俾你，咁咪有機會有有需要既人無輪椅用囉？」恒哥仔好認真咁講...
『我知...我明...但...但我真係好需要呢張輪椅架...我真係好需要張輪椅黎體驗一下佢既感受架...』我苦苦哀求...
「咁...之但係...」恒哥仔有D動搖...
『黎喇～求下你啦～就一日咁多啦～好啦～求下你啦～』我再苦苦哀求...
「咁...咁...唉！好喇好喇好喇！我最鬼怕人地求我架喇！」恒哥仔無我辦法～「嗱！借俾你都得！但你要朝早九點好黎到拎，夜晚六點前要還返返黎架喇！」
『OKOK～咁我聽朝早九點黎拎啦～』
「嗯！咁聽朝見啦！準時丫！」
『嗯嗯～一定準時～唔該晒唔該～拜拜～』
「拜拜...」
就係咁，我就約左恒哥仔喺今朝既九點，去到佢中心道“借”輪椅～
簡單咁梳洗一下～
簡單咁換返套輕便裝～
『係時候出發！』
今日既天氣都真係幾凍下。
風吹埋黎，都有D刺骨。
仲要喺早上。
陽光都被厚厚既雲層所遮蔽。
好彩既係，恒哥仔間復康中心都唔係好遠～
都係同區～都係喺附近～
橫過幾條馬路～
上左兩條天橋～
再轉多兩個街口～
一行到黎復康中心門前，我就已經見到恒哥仔企喺架輪椅隔離～
『早晨丫恒哥仔～今次真係麻煩晒你～』我行到恒哥仔身邊，拍一拍佢膊頭～
「嗱！講明先丫喇！今次真係只此一次！下不為例架！」恒哥仔又拍一拍我膊頭～
『知道知道～只此一次～』我諗...一次都足夠～
「仲有丫！要好好錫住佢黎用丫！唔可以令佢有乜損傷架！我地唔係有好多架架咋！」恒哥仔好認真咁望住我。
『放心放心～我一定會當正佢係我老婆咁～好小心咁錫住佢黎用～』我都好認真咁望住恒哥仔。
「仲有丫！要準時喺六點鐘之前好返到黎喇！仲有好多有需要既人等住用架！」恒哥仔仲係好認真咁千叮萬囑我。
『一定一定～你睇我而家咁準時到，就知我一定會好準時咁完好無缺咁送返架輪椅返黎啦～』我繼續好認真咁望到恒哥仔實一實～
「唔...咁...好啦...小心D丫...」恒哥仔仲係好唔放心咁...
『嗯嗯～放心放心～一定會好小心～』我再用雙手捉實恒哥仔對膊頭。
「嗯...」恒哥仔好無奈咁點一點頭後...
我就轉身坐到落架輪椅上～
不過就喺我一坐到落架輪椅上之時，我就已經感覺到...有D...唔同...
唔係有D…係...都幾大分別...
我既視線...我既視平線...低左...
同我平時睇野既時候...低左好多...
我而家開始明白...我平時睇既野...同小儀睇既野...原來係咁唔同...
我既重心低左好多...
睇既野…都貼近地面…
總係有D唔係咁習慣...好唔習慣...
好似缺乏左D...安全感...
係因為同一直以黎既視野唔同，所以總係會有D不安？
定抑或要抬頭先望到高D既野而不安呢？
「喂～你OK嘛？」恒哥仔拍一拍我膊頭...
『我...』我一擰過頭埋去，先係見到佢個肚...再抬頭望返上去佢塊面，『我OK丫～』
真係有D唔係好習慣...
原來係可以有咁大分別...
「咁你小心D喇～」恒哥仔再拍一拍我膊頭。
『嗯～拜拜～』
「嗯～記得準時六點前返黎丫！拜拜～」
呢一刻，我覺得自己有D似灰姑娘...
恒哥仔就似提醒灰姑娘，要喺十二點鐘之前返到黎嗰隻老鼠...嗰個仙女咁...
點都好啦～係時候出發喇～
我背住恒哥仔，用雙手碌下碌下輪椅兩邊既輪子～
我碌下碌下～碌下碌下～原來都要幾用力架喎～
好彩平日都有搬開貨～雙手都叫做有D力～
不過就...好似碌得唔係咁順囉～
好似總係會...側埋一邊咁既？
我碌下碌，碌唔夠幾下，就會明顯咁向左邊靠近...
我修一修正之後，再碌下碌下...
都未碌過一個街口姐，我又再向住左邊靠近...
點解會咁架呢？
點解好似要Keep住向直線行都好似咁難咁既？
係唔係因為我唔夠專心呢？
唔...可能係都唔定...
試下專心D碌先～
我好專心咁碌下碌下...碌下碌下...
今次真係好好多～
可以好直咁向前推進～
不過呢...隻左手好似有D攰囉...
係囉...左手會明顯咁俾右手快攰得多…
可能係因為右手大力D，但而家就要Keep住平衡兩隻手都用同一力度，令到左手會快攰D。
睇黎…坐輪椅一D都唔輕鬆呢...
我鬆一鬆對手，回頭望一望...先發現我碌左咁耐，對手有D攰，都只不過係碌左一條街既距離都無！
我仲可以好清楚咁睇得到恒哥仔間復康中心呢！
咁搞法...真係要睇住時間做人先得！
唔係既話，遲左返黎實俾恒哥仔破口大罵！
不過講開又講，而家應該去邊好呢？
唔...
我坐喺張輪椅上，諗左一諗...
我應該去下平時去開既地方會好D～
起碼都叫做熟路D～
而我平時去開既地方...就只有屋企...市鎮公園...仲有舖頭...
舖頭...舖頭...
得佢兩個靚女睇舖...始終都係有D唔放心既～
好啦～都係返一返去舖頭睇睇先～
我再用力碌～好專心咁碌～
呢個鐘數要返學既都返晒～要返工既又返晒～街上都無乜人～
係大風左D同凍左D囉～
我就一於好少理，繼續好專心咁向前碌～
當我碌下碌下，沿住我平時行開既路碌下碌下，碌到黎天橋前...
『呃…係喎…』我望住條樓梯...先發現自己坐梗輪椅...上唔到...
雖然話條天橋有升降機搭...
之但係部升降機係喺對面...
我平時行過黎，上樓梯係方便好多囉...
不過而家咁樣就無辦法啦...點都要走過...碌過去對面搭升降機架喇...
唔...唔好諗咁多喇～要爭取多D時間！
我碌下碌下...好唔容易又花左唔少時間先碌到過去對面...
撳一撳掣...望一望...
兩部都喺上面...又要等部升降機落返黎...
等下等下...望住個顯示器咁等...
真係好耐…
只係想上天橋都花左咁多時間...
平時跑一跑上樓梯，過一過條天橋就到對面啦...
唉...如果係趕住返工既話，實遲大到...
跟住又俾Yuki同Zoe兩位靚女鬧...
唉...真係諗起都煩躁呀！！！
“叮噹”好唔容易先等到架升降機落到黎...
『快D快D快D！』仲要同道門鬥快碌入去...
呢頭岩岩碌得入去，嗰頭道門就閂返埋...
『呼...差D就俾𨋢門夾輪椅...』真係要小心D先得...
架輪椅唔可以有乜野損傷架！
恒哥仔唔會放過我架！
好耐心咁等部升降機慢慢升上上層...
真係好鬼慢...
平時我真係好唔鍾意搭升降機...
有得俾我用自己對腳行既話，都會自己行上行落。
起碼都叫可以由自己控制個速度丫嘛～
自己控制個速度...
坐喺輪椅上面...就算可以用雙手...好多時都唔可以自己控制速度...
“叮噹”好唔容易先等到架升降機升到上上層...
『快D快D快D快！』我又要同道門鬥快碌出去...
呼...真係好唔容易呢...
而呢種咁唔容易既情況，我起碼都仲要經歷多兩次...
因為仲要過對面搭升降機落返去呢...
『快D快D快D快！』
呼...
『快D快D快D快！』
呼...
好唔容易咁經歷多兩次同𨋢門鬥快之後，抖一抖順條氣，我就好自然咁向右轉～
但當我一向右轉，準備要行我平時行開既窄巷返舖頭之時...
『過...唔到...』我先發現原來架輪椅係過唔到條窄巷...
平時我睇住電話都行得過既窄巷，原來係容不下架輪椅...
唔...
我只好轉返左邊...兜一兜返出去條大路...
喺大路上碌下碌下…
『嘩嘩嘩嘩嘩！』落下暗斜…
又碌下碌下…
『咦...咦！咦！！！』又上下暗斜…
平時行路都唔覺，原來街道上係有咁多暗斜...
真係一個唔留神就衝住落去...
又或者碌碌下唔夠力，碌返後去都唔知咩事...
唉...
都真係要打醒十二分精神先得！
我保持住十二分精神，向住舖頭方向碌...
當我差唔多碌到去舖頭門前，望一望手錶：『成個鐘先到...』
差唔多花多左大半個鐘頭時間，先返到舖頭...
成倍有多既時間呢...
我偷偷望入去舖頭裏面，望下Yuki同Zoe...
我見到佢地兩個都好專心咁打理梗間舖～
咁都好～
佢地兩個無趁住我唔喺道，就喺道偷懶～
咁我請你地食西餅都請得順氣D～～～
好啦～都望夠喇～
唔可以俾佢地兩個見到我坐住輪椅個樣～
唔係既話，又問長問短～
閃人先～
睇完佢地兩個之後，應該去邊好呢？
呢個鐘數...都係去市中心食返個早餐先啦～
我就向住市中心出發～
但喺路途中，路面不平，搞到我條尾龍骨都痛埋就唔在講...
仲有過馬路既時候，又要搵返個斜路上上落落...
過紅綠燈又要同棧燈鬥快...
最大問題既係，當我想由商場地下上三樓之時，先發現原來呢邊係無升降機！
我仲要兜返出去出面...兜過間政府診所...利用側邊既長命斜...
條長命斜真係好長好斜...
辛苦到我碌到一半要抖抖…
上多一半又再抖抖…
抖順返條氣，又再沿住條馬路邊碌上去...碌上去個商場門口...
去到商場門口，我望一望條樓梯...
又係樓梯...
不過好彩既係條樓梯係有專為傷殘人士而設既升降板～不過就要Call人黎...
我本想唔麻煩人，自己托架輪椅落去算！
之不過...要親身體驗...就要體驗到足...
我就Call一Call人黎...
個保安員一黎到...
『唔該晒...唔該晒...真係唔好意思...』我勁唔好意思咁向個保安員點點頭...
「哦～唔緊要～唔緊要～」個保安員一路幫我Set好塊板，一路帶住微笑咁同我講...
我真係超級唔好意思...
因為原來要Set塊升降板都要Set好耐...
而且仲落得超級慢...
平時上落開既樓梯，可能只需要花上十秒八秒～
但我而家等人黎再Set好塊板再落埋去...足足花上五、六分鐘...
仲未計我去到對面又要再Set過上去既...
又要花上五、六分鐘...
『唔該晒...唔該晒...真係唔好意思...』當我出左呢個商場之後，我又勁唔好意思咁向個保安員點點頭...
「唔駛客氣～唔駛客氣～慢慢行喇～」個保安員帶住微笑向我揮揮手。
真係麻煩晒...
同保安員揮手道別之後，我就沿住圖書館側邊條路碌...碌過大會堂...碌到去商場...
當我一入到商場，迎面黎既人都會主動讓條路俾我...
我有D唔係咁好意思...點點頭...再點點頭...
喺人群之中，真係覺得...好卑微...
視線比人低…
用既地方比人多…
移動既速度比人慢…
好似好…阻住人…阻住呢個世界...
我都係快D...碌快D...快D碌去我既目的地...
未入到黎之前，我本來想去食個Starbucks生活態度下～
但入到黎先諗起，但近既Starbucks係喺下一層...
我唔知呢個商場既升降機位置喺邊...
一直都無留以過...從來都無去搵過...
所以最後，我都係決定去近近地，喺同一層既M記食算...
之不過，當我去到M記之時，先發現原來已經過左早餐時段...
原來...平時只需要十五分鐘，而家我又用左成個鐘先過到黎市中心...
我真係用左好多時間...花上比平時更多更多既時間...
我同普通人一樣，排隊等買野食～
同普通人一樣，都係要俾錢先買到野食～
而同普通人唔一樣既地方係...
「先生～等我幫你拎過去～」就係我俾完錢之後，個靚靚M記姐姐主動幫我拎餐～
『唔該…唔該…』我再一次勁唔好意思咁唔該人...
去到一張比較闊落既四人檯前...
個靚靚M記姐姐幫我放好個餐，仲幫我拎開張凳之後，帶住微笑：「請慢用～」
『唔該晒...唔該晒...真係麻煩晒...』我面紅紅咁對住個靚靚M記姐姐點點頭。
我真係覺得好難為情...
總係覺得自己成日都要人幫...好似好...好無用...
小小事都要人幫手...
小小事都要麻煩到人...
浪費人地既時間...
浪費人地既氣力...
去幫自己完成一D...自己無能為力既事...
我真係...
我手震震咁拎起個豬柳強...
淚水都開始由心裏湧出...
雙眼越黎越模糊...
『我真係...我真係...我真係好無用...』