《情困之時，我遇上了自稱情性的情聖》: [Case 09－折翼天使] PART 08

瞓喺張床上面，望住個天花板...

天都未光，我就已經醒左...

問題既係，我都唔知有無瞓到三個鐘...

尋晚由舖頭返到黎都已經係凌晨一點鐘。

沖完涼吹埋頭瞓落床都已經係兩點既事...



而家天都未光，我又已經醒左...

呢個都唔係最大問題...

最大問題係，呢個星期我都Keep住係咁...

Keep住瞓得唔好...

Keep住失眠...



呢個星期以黎，我都唔可以好好咁瞓一覺...

我都總係會諗起...

「你地D健全既人，係唔會明白我既感受！！！」

我都總係會諗起呢一幕...

Stella將佢本畫簿掉落地既呢一幕...



Stella既畫簿...

我喺床頭拎一拎起Stella本畫簿...

又再望一望…

又再細心咁望一望...

呢個星期以黎，我都已經望過好多次...

每當我瞓唔著又好...

瞓瞓下醒左瞓唔返又好…

我都會拎起Stella本畫簿黎睇...



睇佢畫既畫...

每當我好仔細咁欣賞住Stella所畫既畫既時候，我都會覺得...好似喺佢身邊咁...

好似...可以接近多D Stella咁...

我真的想你了...

“窗外陰天了 音樂低聲了 我的心開始想你了

燈光也暗了 音樂低聲了 口中的棉花糖也融化了

窗外陰天了 人是無聊了 我的心開始想你了”



聽住由王菀之唱既《我真的受傷了》，欣賞Stella所畫既畫好一段時間後...

天都開始光了...

房間都開始被窗外既晨光照亮了...

『好！又係時候起身梳洗～』又係時候了～

又係時候起身梳洗，準備落去市鎮公園了～

我簡單咁梳洗一下～

換返套便服～

拎埋Stella本畫簿就出門口～



我唔係落去跑步～所以我唔係著運動裝～

其實呢個星期都已經無跑步～

呢個星期，我都係著便服，拎住Stella本畫簿，落去市鎮公園，行去湖邊，坐喺道等Stella既出現～

我好希望，可以親手將本畫簿交返俾Stella～

每朝都係咁～

每朝都係帶住期待既心情，坐喺湖邊等～

我總係覺得，我地一定會再見～



我繼續帶住希望，坐喺湖邊～

已經有一個星期喇～都已經過左一個星期喇～

我都就快要變望妻石喇～

但就係見唔到你既出現...

就係等極都極唔到你既出現...

究竟你去左邊？

又做梗D乜呢？

我地係唔係真係無機會再見呢？

望下望下，望下湖邊既周圍...

總係希望可以期待已久既閃光再次出現...

但我已經望左好耐，亦都已經望過好多次...

總係望唔見...

我再靜靜地咁攬住本畫簿...坐定定...

我望到喺遠處，有對公公婆婆拖住手慢步...

望住呢對公公婆婆拖實對方隻手，慢慢行...慢慢行...

可以喺茫茫人海中遇上，真係唔容易...

而且仲要可以拖住手，一齊行到老...

一齊行到老...

“幾多對持續愛到幾多歲 當生命仍能為你豁出去”

遇到...又未必一齊到...

一齊到...又未必可以走到老...

我地...係唔係要...真係不斷咁錯過...錯過...又彼此錯過呢？

我地可唔可以，把握時間...

把握還可以讓我們幸運的時間...

要知道，人一生其實真係好短暫...又好化學...

一個唔好彩，話唔定喺下一秒，行行下條粗心大意既馬路，就有一個濕滑既司機，甩一甩，BEL－BEL，咁就去左架喇...

究竟我地仲要錯過幾多？

又要浪費幾多時間呢？

唉...

我再喺湖邊，攬住本畫簿咁坐定定多陣...

我起一起身，轉身行去身後既草坡...

望住一個著上黑色運動套裝，紮住條高馬尾既女仔跑過之後，我就坐到上草坡上...

望住個女仔跑下跑下...

其實，我久唔久都會見到呢個女仔喺道跑步...

望住呢個女仔跑，總係覺得佢好似跑極都唔攰咁...

好似唔駛點回氣咁...

仲好似，跑得好快咁...

唔好誤會呀！我唔係對嗰個女仔有意思呀！

我只會對Stella一個有意思架咋！！！

我好專一架！！！

我係唔會好似貓咁，口咬一條魚，手抓一條魚，眼望河中魚，心諗又係另一條魚架！

我之所以會留意呢個女仔，係因為我覺得佢...有D似我...

望住呢個女仔既背影，就好似望到我自己咁...

跑得好快...

跑得好自然...

好自然咁向前跑...

總係望住前路一直跑...

一直向前衝...

唔知為乜咁一直衝...

而自己一直向前衝，原來都只不過係一直喺道兜梗圈...

喺公園裏面打梗轉...

不停咁打轉...不停咁打轉...

究竟我咁努力咁跑，咁出力咁跑，又係為左D乜呢？

唉～

望住個女仔既背影消失後，我瞓一瞓喺草地上...

攬住畫簿，望一望上天空...

灰灰黑黑既天空...

就算我有一雙健全既腳...

就算俾我跑得再快，咁又點呢？

跑得再快...唔駛回氣咁跑...都跑唔到去自己想去既地方...

跑唔到去，你既身邊...

Stella既身邊...

『Stella！！！你究竟去左邊呀！！！』我對住個灰灰黑黑既天空大嗌！！！

十足十個傻佬咁...喺公園道大嗌...

我再瞓喺草地上好一陣子...

好一陣子過後，我唔敢再瞓得耐...

唔係我怕瞓瞓下會有狗仔走黎舐下我塊面～

唔係我怕瞓瞓下會有雀仔飛過，送上頭獎～

唔係我怕瞓瞓下會有蟲仔走入我耳內～

而係我怕...我怕會落雨...

我怕落雨會整濕本畫簿...整爛本畫簿...

我一直都好好保管住既...Stella本畫簿...

我起一起身：『唉～睇黎今朝都唔會喺道見到Stella架喇～返去舖頭再碰碰運氣啦～』

只好係咁...

只可係咁...

我就只可以抱住呢個希望...

希望喺舖頭可以再遇見Stella...

我又再一次帶住期待既心情，攬住本畫簿，返到黎舖頭～

將本畫簿放返喺一個無人會掂到既地方之後，我就著返件制服...

『開工！』

為左唔會因為我又再唔知係第幾次做錯野，而俾Zoe趕入房仔，我都好用心去工作！

我好用心咁喺舖面打掃！

拎住支地拖拖下拖下～

又拎住塊毛巾喺雪糕櫃丫～Counter檯面丫～抹下抹下～

當然唔少得既就係抹下D窗～抺下度門塊玻璃～

我抹下抹下～不時都會望一望出去～

望下會唔會見到銀光閃閃～

唔望出去既話，都會豎起對耳仔，聽下出面有無嘻嘻哈哈聲～

我時不時都好似總會聽到～

總係時不時都聽到出面傳黎一大班人既嘻嘻哈哈聲～

但當我一望出去，總係發現原來只係我既幻聽...

幻聽...

睇黎思念到達一個極點，就會產生幻聽...

睇黎…我對Stella既思念久了...

真係有點久了...

我一直帶住呢份思念工作...

而且唔係好理身邊既事...

唔係好理有乜野客人入過黎...

只係希望入黎既客人，係Stella...

一直都係咁...一直都係咁...

一直過左一個中午...

一直過左一個下午...

直至到左夜晚...又到左夜晚...

Stella都係無出現到...

今日Stella又無出現到呢...

唉～

我望一望Counter，望到有個男人同梗Zoe傾計...

又係嗰個男人...

又係嗰個肥肥地既中年西裝友...

呢個肥肥地既中年西裝友一連好幾晚都有黎聊Zoe傾計...

我係道既時候又聊Zoe...

Yuki係道既時候都聊Zoe...

好似當我地死咁既...

唔知點解，我總係睇呢肥肥地既中年西裝友好唔順眼咁...

總係好不爽咁！

開梗工架嘛！走黎聊人地D員工！會唔會唔係咁俾面呀？！

雖然話你唔知我係呢道既老闆姐，之但係都唔係咁肆無忌憚架嘛！你話係唔係呀？！

之不過，我睇Zoe又好似俾人聊得好開心咁...

好似好受落咁...

只見Zoe同個肥肥地既中年西裝友眉來眼去咁...

十足十姣婆遇著脂粉客咁...

真係好難頂囉！！！

個肥肥地既中年西裝友拎住隻依唷公仔喺Zoe面前Fing下Fing下：「送俾你架～」

Zoe面紅紅笑晒口咁：「你又知我鍾意依唷既？」

「你講過既每一句說話，我都有好好咁記喺心裏面架嘛～」個肥肥地既中年西裝友相當之口甜舌滑...

「係咩係咩～做乜要記住人地講過既野喎～」Zoe攬住隻依唷，扮晒傻咁...

「唔知呢～唔知呢～你話呢～」個肥肥地既中年西裝友又扮晒傻咁...

「我先唔知你咁多丫～隻依唷真係好鬼死似你～一樣咁樣衰～」Zoe捽下捽下隻依唷塊面...

「有你鍾意，再樣衰D都無所謂啦～」個肥肥地既中年西裝友一幅厚顏無恥樣...

「我只係鍾意隻依唷咋嘛～」Zoe怕怕地羞咁...

「我都係話你鍾意隻依唷咋嘛～你以為我話你鍾意D乜呢～」個肥肥地既中年西裝友繼續厚頻無恥咁笑笑口...

『咳咳！』我真係頂個肥肥地既中年西裝友唔順！

個肥肥地既中年西裝友望一望我：「我都係走先啦～遲D再黎搵你～」

「嗯嗯～拜拜～」Zoe含春咁既嘴同個肥肥地既中年西裝友揮揮手...

「拜拜～」個肥肥地既中年西裝友又同Zoe揮揮手後離開...

我真係越睇呢條肥肥地既中年西裝友就越唔順！

人識女仔，佢識女仔，佢識到咁鬼衰格咁架呢？！

睇佢個死樣，氹女仔氹得咁鬼死自然，肯肯定喺出面成日咁樣聊女仔架啦！

我又真係唔係好明，點解Zoe又好似咁受落咁既？！

係唔係男既唔仆街，女既就唔會舂個頭埋去架？！

Sorry…原諒我太過激動...

激動到講左粗口添...

咁係丫嘛！Zoe係一個大好女仔！點可以俾呢D仆街玩弄架呢？

我真係唔係咁忍心...

我真係唔忍心睇到一個入世未深既小妹妹俾隻OM...豺狼擔左去囉！

『喂～同人地發展得好高速喎～』真係高速過高鐵～

「邊個人地丫～」Zoe甜絲絲咁望住隻依唷...

『呢隻衰野呀！』我篤一篤Zoe手上隻依唷！

「喂呀！唔好篤呀！邊係衰野姐～」Zoe攬到隻依唷實一實，谷起塊面豬登望住我...

『咁都唔衰丫？你睇佢個樣幾咁衰！』我就係要篤！係要篤！

不過我咁樣篤喺Zoe胸前隻依唷...好似唔係...唔係咁好咁...

好似篤梗..Zoe個胸咁...

「喂呀！唔准再篤呀！佢個樣都唔係咁衰姐～仲幾可愛添～」Zoe甜絲絲咁攬住隻依唷，扭下扭下咁...

『係丫係丫？幾可愛丫？咁可愛即係可以愛啦～』我冷眼望住Zoe...

「唔...或者...真係...可以...愛架～」Zoe甜絲絲咁諗下諗下...

或者...真係...可以...愛？！

『你既意思係...會愛上佢？』我困惑咁望住Zoe...

「嗯～嗯～」Zoe繼續Keep住甜思思咁望住隻依唷點點頭...

『唔係丫嘛？你好似識左人地唔係好耐咋喎...你知佢係一個乜野人黎架喇？』我真係唔係好敢相信...

「咁佢氹得我開心～我又對佢有D Feel咁～咁咪...得囉～」Zoe就好似一個已經俾愛情既洪流淹死左既雞仔一樣...

點解係雞仔？

我都唔知...

或者係雞仔比較無知D...

咩都好啦～

『你唔需要再...考慮清楚咩？你唔覺得...太突然喇咩？』我仲係好困惑咁望住Zoe...

「咁愛情就係咁突然架啦～」Zoe甜絲絲咁點點頭...

『下？』我唔係好明...

「你要知道，愛情就好似煙花咁，係一剎那既火花～要是你唔去捉緊既話，咁就會錯過架喇～」Zoe好認真咁向我點點頭...

『下？』我越聽就越唔明...

「唉～算罷啦你～你呢D情場初哥，連拖都未拍過～係唔會明架喇～」Zoe擰一擰頭，就拎住隻依唷行入房仔...

唔明...

我真係唔明...

點解有D人既愛情話黎就黎...

點解我既愛情好似點都埋唔到黎...

係因為把口唔夠花？

係因為我個樣唔夠衰格？

係因為我唔識耍手段？

唔知...我真係唔知...

我只係知，嗰個肥肥地既中年西裝友唔會係好人！

雖然話我真係一個連拖都未拍過既毒男...

但我睇男人都睇得好準！

睇嗰個肥肥地既中年西裝友玩世不恭咁，都知佢係一個食家黎架啦！

我就係唔明，點解Zoe咁都睇唔出！

係真心睇唔出？

定係睇得出都要舂個頭埋去？

點解明知自己會俾人玩，都要黐埋去呢D人既身邊呢？

我真係唔明...

我真係唔明而家D女仔個心諗梗D乜...

唉～

諗下諗下…又諗下諗下…

一路擔心住Zoe...

一路又諗起Stella...

又諗起自己真係好唔了解女仔...

諗下諗下...

“叮噹”有個客人入左黎...

我望一望...係平時嗰個買酒飲既男仔...

個男仔行左去個雪櫃道，拎一拎起支生力...行到埋黎Counter...放一放低...

『咦～先生又係你丫？你晚晚都係呢個時候買酒飲架喎～』我望一望個男仔...

個男仔總係好似好多野諗...

又好似好憂愁咁...

個男仔有D錯愕：「哦...係丫係丫...習慣左丫嘛…」

或者係我問得太突然啦～

又或者佢同我一樣，有好多野諗梗...

有好多野諗唔通...

『係丫…見你晚晚都黎幫襯，呢支酒就我請你既～我地出去坐陣，一齊出去飲啦～』我行左去個雪櫃道，拎多支生力出黎～

「會唔會唔係咁好意思丫...」個男仔有D唔係咁好意思咁...

『無所謂啦～只要你賞面既話～』其實係我都想抖下氣...

「咁...恭敬不如從命喇...」個男仔帶住笑意點點頭。

『Zoe～幫我睇睇舖先～我出一出去出面坐陣～』我同Zoe交低一句後，我地就出去，坐喺石凳上...

其實...係我想飲酒...

一直以黎，見過呢個男仔飲左好幾晚悶酒，我自己都想飲下...

但我一個人，又總係覺得有D寂寞...

平時都已經夠晒寂寞...

唔想再更加寂寞...

難得而家有個寂寞既人，陪下自己飲酒...

咁樣飲法...會無咁寂寞掛...

『係呢～平時都見你一個坐喺道飲悶酒～都飲左好多晚架喇喎～為左D乜丫？』我敲一下個男仔支酒，飲一口...

嘩…

乜生力原來係咁苦架咩？

點解個男仔可以晚晚飲架呢？

「唔...我同女朋友鬧左交...瞓唔著咪諗住飲D酒好瞓D...點知就變成習慣～」個男仔又飲一口...

『係丫…為情所困丫...』“情”呢個字...真係易寫難解...

「嗯...都可以話係既...男人飲酒...唔係為錢銀，就係為女人架啦...」個男仔點一點頭...

『女人...唉...有時真係唔明女人諗乜...』女人丫～

唉～有時會笑得好燦爛～

有時又會黑起塊面...

有時仲會掉野落地添...

喜怒無常…真係好難捉摸呀！

「睇黎你都係為女人煩惱喎...都係同女朋友鬧左交？」個男仔又敲一下我支酒，飲一口...

『同女朋友鬧交？我都想係同女朋友鬧交～首先要有女朋友...』係同女朋友鬧交都話好D...

拖都未拍過...

「要有女朋友其實唔難～追咪得囉～」個男仔扮左個小丑神咁既樣我睇～

『話咁易咩...連講句野都嚇走人咁...或者人地連朋友都唔想同我做呢...』想識人又好似得罪左人咁...

唉...

「唔...朋友都未算？」個男仔打量我一眼...

『唔...可以話只係萍水相逢...連點頭之交都唔算...』我無奈咁擰擰頭...飲左一飲...

「唔...萍水相逢...」個男仔又諗左一諗...飲左一飲...

萍水相逢...

唔知仲可唔可以相逢...

「或者...要再多D時間...」個男仔諗左一諗...

『要再多D時間...』已經都算唔少架喇喎...

「或者...要放膽D...」個男仔又諗左一諗...

『要放膽D...』我已經好放膽咁走去同Stella傾計...

只係好似傾唔岩話題...

「或者...要放膽D解開情困...」

『要放膽D解開情困...』

「或者...你可以請教下情聖喎...」個男仔突然靈光一閃咁...

『情聖？』何方神聖？！

「嗯...網上面有一個人話所有情困也可以一一解開～」個男仔點一點頭。

『係丫…網上面...真係有D咁既人架？』網上面...

網上面D人講既野...係唔係真係信得過架？

有好多都係吹水架咋喎...

特別係嗰D愛情專家...

就好似嗰個專家Dickson咁丫～

真係信佢一成，雙目失明～

「嗯...希望佢幫到你啦...」個男仔望一望住手上支生力...諗下諗...

『嗯～希望啦～』我敲一下個男仔支酒...

我地一飲而盡～

希望啦～

人總要有希望架嘛～

同個男仔吹多一陣風...吹多一陣水...

『我都要返入去打理下間舖喇～唔係就做死嗰個女仔架喇～』我起一起身，指一指住舖頭入面正手忙腳亂既Zoe～

Zoe平日都唔係咁手忙腳亂架～

做乜而家又會...

肯肯定係因為嗰隻依唷啦～

女仔就係咁～一有愛情之後，就唔會再專心到～

其實唔一定係女仔既...

我又何嘗唔係咁呢...

「嗯～多謝你支酒～」個男仔向我揮揮手～

『唔多謝～我多謝你陪左我咁耐先真～你都唔好坐咁耐喇～天氣凍丫～』我背住個男仔揮揮手...

天氣都真係開始凍...

仲越黎越凍…

冬天喔...令人寂寞既冬天喔...

究竟點先可以脫離寂寞呢？

情聖…

好啦～今晚返去就上網搵搵啦～