《情困之時，我遇上了自稱情性的情聖》: [Case 14－我的米奇] PART 11
同飛揚BB嘆左成個鐘頭早餐之後，都係時候返公司～
『係呢～你個Facebook喺上年既四月一日之後就再無更新喇喎～你係唔係開左個新架？』我望住飛揚BB個Facebook～好奇咁問一問～
「唔係...只係無乜野更新姐～」飛揚BB答得好隨便下～
『點會無野更新呢～人生每日都係新一章～』就好似我咁～每日同飛揚BB一齊既時間都會好好記住～
「成日都要返工，邊有咁多野打上去。」飛揚BB又答到好現實咁～
我又繼續碌下碌下...碌到去D相...
『咦咦咦～你識影相架？』我又好好奇咁問一問～
「唔可以話識既...只係亂影下姐...」飛揚BB又好謙虛咁答一答～
『唔係丫～都好靚丫～拍得上WILL CHO～』我左手托住個頭～右手一直碌～
雖然晚晚都睇一次～但次次都係覺得好有水準～
之不過就梗係無岳飛咁有藝術感啦～
話晒岳飛都係一個藝術家～
仲要勁大藝術家脾氣～
「你唔好咁講添丫～人地WILL CHO係大師黎架～我呢D真係算得係乜。」飛揚BB仲要有D驚驚地咁～
『咁又唔好對自己咁無信心。就算世上只有一個人欣賞你，你都唔可以放棄。唔可以令欣賞你既Fans失望～』總會有人喺你背後支持你～
「嗰個Fans咪係我自己喇呵～」飛揚BB擰擰頭...
『仲有我～』我住望飛揚舉起手～點點頭～
我一直都係你既Fans～
一直都喺你背後默默咁支持你～
以前係～而家係～將來都係～
只要係飛揚BB決定既，就一定係岩～
好傻丫呵？
不過愛一個人...就係咁架啦～
就係咁傻架啦...
難道你未傻過咩？
只係你自己唔覺...
“叮叮 叮叮 叮叮”
飛揚BB檯頭部電話響一響～
「早晨，Good Bob Design。」飛揚BB接一接聽電話～
我就留心聽下佢講乜...
「我係，請問有乜幫到你呢？」飛揚BB好似好正經咁～
係…客仔？
「係～咁先生點稱呼呢？」飛揚BB又好似好正經咁問一問～
睇黎真係有客仔喎～
「阿Gay生...咁我地做會場設計呢...」
Gay生？個名怪怪地咁既...
「咁唔知Gay生幾時得閒可以俾我上黎貴公司傾D細節呢？」
飛揚BB又睇睇個...Schedule：「三點鐘無問題。」
「OK...OK...Bye...」飛揚BB好似出晒冷汗咁...
飛揚BB收左線之後就喺道諗下諗下...
一路諗又一路出晒汗咁…
仲諗到皺晒眉頭咁...
唔...
『飛揚～做咩面色咁難睇既～』都係關心一下飛揚BB先～
「無...諗緊菊花姐...」飛揚BB一面困惑咁...
『菊花？』下下下？菊花？
乜野菊花？邊種菊花？
做乜無啦啦會諗起菊花？
要做有關菊花既計劃嘛？
『仆…』飛揚BB突然口噏噏咁...然後立即起身衝入...會客室？
道門牌係咁寫～
我就八八卦卦咁彈下彈下...彈到去飛揚BB身後...
『做咩丫飛揚～』我喺飛揚BB身後探頭望一望...
望一望呢間所謂既會客室...
「等等有客會上黎...但間會客室...」飛揚BB望住一堆...雜物...一面茫然咁...
『睇黎要執執佢先得喇～』我開左會客室盞燈...望清楚D...
一大堆雜物...勁大塵咁...唔執執佢都唔見得人...
更唔好話用黎見客...
「但執去邊？」飛揚BB勁苦惱咁...
『執去肥豬間房咪得囉～反正佢今日都唔返架啦～』我轉身就行到去姑丈間房～打一打開道門～
「會唔會唔會咁好...」飛揚BB又好似唔好意思咁～
『唔緊要啦～』我就開始搬D雜物～
有乜咁唔好意思丫～對住呢D衰人～唔通仲要心軟咩～
飛揚BB就係咁架喇～總係唔識得心狠手辣DD～
「喂喂喂...重丫！等我黎！」飛揚BB一手接左我手上既雜物～
不過又真係幾有風度就真既～
我同飛揚BB一件一件咁搬D雜物到姑丈間房～
飛揚BB就搬D大件既～
我呢～就搬D細件既～
睇到飛揚BB搬D大件野既時候，雖然話佢唔係好大隻～仲有D瘦瘦地咁～但就覺得佢有風度得黎仲幾Man添～
搬下搬下～又搬下搬下～同飛揚BB夾手夾腳搬多幾下～
『好～搬晒喇...乞嗤...』我細細聲打左個乞嗤...
「哈哈～好大塵呢...乞嗤...」飛揚BB都打左個乞嗤～
『嘻嘻～你自己咪又係打乞嗤～睇黎要抹下塵先得...嗯...等我一陣...』我就轉身行左出公司～
我記得隔離係一間賣清潔用品既公司...
我諗...佢地都應該有Display喺道既...
我行到過去，就撳一撳個鐘仔～
唔使過一陣，我就隔住塊玻璃門望到裏面有一肥一瘦...大約廿六、七歲咁上下既男仔打住交咁衝出黎...
「靚...靚女...有乜可以幫到你？」個肥仔一打開道玻璃門就爭住問～
『靚仔哥哥～我喺隔離間Good Bob Design返工既～咁呢我地要打掃一下喎...你知我地呢D女仔...姐手姐腳咁...無D工具幫下真係唔得架...』我嗲聲嗲氣咁電下個肥仔～
「哦哦哦～你係想問我地借野丫嘛？得得得～想借乜？借埋個人都仲得～」個肥仔撳住左排骨仔個口～
『我想借～吸塵機～有無D輕便D架～仲有毛巾～要勁吸水～～～既～』我咬下咬下手指咁～
「有有有！輕便D架嘛～汽車吸塵機夠晒輕便～毛巾我地條條都咁吸得～就算你濕到成地水都無問題～你去同我拎個汽車吸塵機同毛巾過黎啦！」個肥仔一手就推左排骨仔走～
男人～唉～同狗公又有乜分別呢～
「係呢係呢～以前唔見你既？新入職？」肥仔撩一撩我傾計～
『嗯嗯～我返左幾日架咋～以後請多多關照丫～』我向個肥仔鞠一鞠躬～
「一定一定～一定會好好關～～～照你架～有乜需要都可以立即過黎搵我架～我叫阿龍～」肥仔流晒口水咁伸一伸出手～
『肥龍哥哥～我叫Emma～』我握一握肥龍隻手～
肥龍丫嘛？咁另外嗰個排骨仔就一定係叫做骨精強啦～
「嘩…好滑…好滑…」肥龍摸下摸下我隻手...
俾隻手你摸下就迷晒咁既樣...狗公真係狗公～
「汽車吸塵機～毛巾～」骨精強拎住部汽車吸塵機同條毛巾狗衝過黎～
『唔該晒～咁我用完立即拎返過黎還返俾你地丫～拜拜喇肥龍～骨精強～』我接過部汽車吸塵機同條毛巾後頭也不回轉身就走～
「屌你咩咁快拎過黎做乜鳩丫？！」
「係唔係俾我望下都唔得丫？」
「望望望望乜鳩姐？！」
「獨食難肥呀！屌你！」
「我而家夠晒肥啦屌你！」
唉～兩隻狗公～
我左手拎住一塊毛巾～右手拎住一部汽車吸塵機返入去公司～
『我問隔離賣清潔用品既公司借左D display過黎用～』我就同飛揚打左個眼色～
「咁都得？」飛揚BB有D驚訝咁～
有乜話唔得丫～
女仔問人借野係最容易既～
尤其係問男仔借野～
飛揚BB接過我手上既汽車吸塵機之後，就跪喺地下吸地毯～
而我呢～我就跪喺梳化上抹梳化～
張梳化都真係好多塵下～
不過好彩既係手上塊布唔單止吸水力強～就連塵都吸得實～
唔使濕水都可以吸實晒D塵～
果然係專賣清潔用品既公司～D產品都真係有料到架喎～
我抹下抹下～個身向前趴一趴～
我又感覺到條白色短裙擺下擺下～跟住我身體既節奏擺下擺下～
有時著裙就係無咁方便～
動作大D都好似奇奇怪怪咁～
不過都好～好在係著短裙～
如果話著長裙就仲麻煩～
一個唔小心...動作大小小都有可能整爛條裙～
所以話如果要著裙或者著褲黎打掃，最好都係著短裙或者熱褲仔喇～
最多咪容易D走光～
起碼唔會阻手阻腳先丫嘛～
我就繼續好放心咁抹下抹～掃下掃～
而飛揚BB都好似好努力吸緊塵～
而當我抹到塊毛巾都係塵既時候，我又會去洗手間洗一洗塊布～
飛揚BB又一路吸～吸下D角落～吸下D牆邊～
我地兩個一齊打掃左好一陣子～
呢種感覺就好似兩公婆喺屋企打掃咁～
有時都有FF下同飛揚BB結左婚之後，每個星期都會喺屋企一齊打掃下～
老公吸下塵～老婆抹下檯凳～
間屋咁大～真係打掃足成日都打掃唔晒～
幾咁溫馨～幾咁幸福～
可能你會話：「有工人架嘛！使鬼你地自己落手落腳咩？！」
情趣既野，你識條鐵咩？！
我就繼續抹下抹下～又偷偷望下飛揚BB～
飛揚BB好似...好似呆呆地咁...
拎住部吸塵機...呆下呆下...定晒格咁呆下呆下...
仲呆到...呆到...部吸塵機都...吸住塊地毯...吸實塊地毯...
『飛揚...飛揚～你就快吸爛塊地毯喇～』我拉一拉飛揚BB～
「So...Sorry！」飛揚BB第一時間閂左部吸塵機～企返起身～
『你無事嘛？』我眼定定咁望住飛揚BB～
飛揚BB做乜野呢？
點解又發呆架呢？
係咯…點解又發呆...
其實呢幾日我都發現...飛揚BB不時都會突然發呆...
定晒格...放晒空...雙眼無靈魂咁...
就好似...Hang機咁...
呢D係唔係叫做天然呆呢？
我諗係喇～因為飛揚BB呆起上黎個樣又真係幾可愛既～
「無...我無野...可能踎低起身見頭暈掛...哈哈...你件衫...」飛揚BB望一望我身上件白色連身短裙...
望一望落我肚仔既位置...
飛揚BB輕輕力幫我拍一拍...掃一掃...
拍一拍我個肚仔...掃一掃我個肚仔...
我就眼定定望住飛揚BB...
飛揚BB摸到我...摸到我個肚仔...
「Sorry丫Sorry丫！我唔係有心...我見有D塵...」飛揚BB好緊張咁急住解釋～
『唔緊要～我要唔該你至真～』我對飛揚BB笑一笑～
傻瓜黎架～我梗係知你唔係有心～
我梗係知你想幫我掃下D塵～
不過最重要既都係...都係我唔介意俾你摸～
只要係飛揚BB...摸邊道都無所謂～
因為...愛一個人...就會想俾佢佔有...
只係俾佢一個佔有...
我係屬於飛揚BB...
全個人都係...只屬於飛揚BB一個～
『間房抹好晒喇～應該可以用黎見客架喇～』我喺間會客室轉左一圈～
短裙輕輕飄起～
『Emma...辛苦你喇...』飛揚BB帶住憂鬱既眼神望住我～
做咩要用上岳飛咁既眼神望住我呢～
我笑一笑咁答：『唔辛苦～』
可以同到飛揚BB一齊打掃，我真係好幸福丫～
之不過呢...
『不過我有D餓喇...』我摸一摸自己個肚仔～伸一伸脷～
雖然話今朝食左個早餐，之但係勞動完之後就開始肚仔餓喇～
同飛揚BB Check多Check間房～熄好晒D燈之後，我地就落樓喇～
一落到樓，我都貼住飛揚BB黎行～
不時仲會撞下撞下手臂咁～
呢種撞下撞下～碰下碰～總係有一份...青澀～
就好似喺中學時代，喺兩行樹陰下，經常會見到D仲著住校服既同學仔，兩小無猜咁，撞撞碰碰，藉著身體既碰撞以表心迹～
做中學生既時候，好多時都有D姊妹話對邊個邊個男仔有意思～
但又唔敢開口表白～
又怕人地唔鍾意自己～又怕俾人拒絕好面懵～
只係敢偷偷地喺個男仔背後偷望下佢～
又有意無意咁用手臂撞下佢...用自己既身體碰下佢...
以前見到班姊妹咁做都會覺得佢地好傻～
但而家到左自己...原來呢種感覺...都幾…幾興奮...
總係覺得好似...好親密...想再親密...想更親密...
但又怕會過份親密...怕佢Feel到太過親密...唔想再咁親密...
想...又要怕...
怕...又要想...
唔好話你地D男仔唔知我地D女仔想點...
其實好多時就連我地自己都唔知自己想點...
或者...你地想點...我地就點...
「你幫左我執好個會客室，呢餐我既～你又想食D乜？」飛揚BB撞一撞我膊頭問一問～
『咁都可以呃到一餐丫～咁...唔...』我就咬住唇咁諗一諗～
有乜想食呢～有乜想食呢～
而家我最想食既係...
『我想食農夫包～』我拍一拍手～
「農夫包...我知道呢頭有熟食中心有得食既...之但係...好嗱喳架喎...」飛揚BB皺晒眉咁...
『唔緊要丫～我OK架～』喺日本生活既時候，再嗱喳D都見過啦～
嗰陣時岳飛仲會笑我係唔係女仔黎～
喺D勁嗱喳既地方都面無懼色咁～
我就覺得係岳飛佢有潔癖姐～
同飛揚BB走上扶手電梯～我發現都有好多男人望上黎...望我裙底...
男人喔...
飛揚BB就立即用件西裝褸幫我遮一遮～
飛揚BB幾時都係咁保護我～
行到入熟食中心～又有好多男人望住我...
唔係望住我對腳...就係望住我個胸...
幾個地產仔望到連隻羹都跌埋...
水吧仔倒瀉水...
廚房佬炒燶菜...
不過我就一於好少理～
而飛揚BB就巴巴聲拖住我走去個無乜人望到既死角坐低～
我輕輕一坐～雙腳緊合～雙手放到短裙上～
「除左農夫包之外，仲有D乜想食？」飛揚BB眼定定望住我～
『唔...我想食車仔麵～要魚蛋、牛柏葉、油麵～』我笑瞇瞇咁答～
「嗯～咁想飲D咩？」飛揚BB仲係望到我實一實咁～
『可樂～』俾飛揚BB咁樣望住，望到我甜絲絲咁笑出黎～
「嗯～咁你等等我～我去買～如果有咩唔對路記得大聲叫救命！」飛揚BB扮到成個大哥哥咁既口吻～
『哈哈～會有咩唔對路丫～傻瓜～』你估係日本D痴漢題材咩～
喺日本D電車裏面，或者真係會有機會要叫救命既～
但呢道始終都係香港～無咁猖狂既～
飛揚BB出左去一陣，就好快速咁拎住D野食衝過黎～
「農夫包要等等～食住個車仔麵先～」飛揚BB放好晒野食～
我就擰一擰罐可樂：『咦？Girlfriend？』
「成箱成箱咁黎，呢道罐罐都係一樣架啦～你睇下嗰邊幾個地產仔，個個都係Girlfriend～真係Gay味濃～」飛揚BB恥笑一下對面幾個拎住罐Girlfriend可樂既地產仔。
『咁樣會搞到我唔捨得飲架喎～』我望住罐可樂...
如果話可以真係好似罐可樂所寫咁...係飛揚BB既Girl Friend你話幾咁好呢...
「有咩唔捨得～我幫你開啦～」飛揚BB單手開一開罐可樂～
『唔該～』我就咬住支飲筒啜下啜下～
「女仔好少會飲可樂架喎，你唔怕肥咩？」飛揚BB邊食豆腐火腩飯邊問～
『嘿嘿～我唔會肥架～』我都開始食碗車仔麵～
「咁好？食極都唔肥？」飛揚BB好奇咁問一問～
『都唔可以話食極都唔肥既～都要做下運動～如果唔係個身形會走樣架～』唔Keep真係好易走樣...
「貪靚～」飛揚BB恥一恥笑我～
『咁我都想將我最完美既一面俾我最深愛既人睇架嘛～』就係想俾你一個睇～
就係為左你，我先會咁努力～
為左最深愛既人...每個女仔都會咁...
『其實豆腐火腩飯係咩味架？』我八八卦卦咁望一望飛揚BB碟男人的浪漫～
「咩味...」飛揚BB諗左一諗，「鹹鹹地...咁囉...」
『可唔可以俾我試一舊～』我已經瞄準舊火腩～
「無所謂～你夾～」飛揚BB點一點頭～
我就用對筷子夾落舊火腩...再將舊火腩放入口...
唔...呢種味道...
『好重口味丫～』我眉頭一皺...扁一扁嘴…
「哈哈～係咩？我覺得OK喎～」飛揚BB又食一舊火腩～
『男人真係咁鍾意食鹹野架咩？』我要狂啜可樂囉～
「關咩事？其實除左鹹味，仲有一份濃味...』飛揚BB食多兩啖飯～
『濃味？』我疑惑咁望住飛揚BB～
「嗯...就好似經歷過好多辛酸，好多苦澀...」飛揚BB又諗下諗下...
諗下諗下...飛揚BB好似諗起好多往事咁...
好似諗起好多經歷咁...
或者...呢D就係豆腐火腩飯既味道掛...
「農夫包呀！哩到咁撚埋想搵死人咩！想搞野就返屋企啦！」個大叔放低左個農夫包之後就口噏噏咁行左去～
我望個大大個既農夫包～
『好野～有農夫包食～』好耐好耐都無食過喇～勁開心～
飛揚BB戴起手套～拎起把刀～切丫切～
切好左一細舊，靚靚仔仔既，點一點汁，飛揚BB餵到去我口中～
我一啖就咬左落口：『你平時都係咁餵你女朋友架？』
睇見飛揚BB咁自然咁～一定係平時都做開架啦～
「係丫...係丫...女仔怕整到隻手油淋淋嘛…」飛揚BB有D唔係咁好意思～
『你女朋友真係幸福...』可惜既係...身在福中不知福...
明明就有一個咁體貼既男朋友...都要走去偷食...
有時候...我都真係唔係幾明...唔係好明點解D人咁唔知足...
或者...貪婪喔～七罪宗～
「你都係快D搵返個人拍下拖，錫下你啦～」飛揚BB繼續餵我～
『拖係唔可以隨便拍架～』我又一啖就咬左落口～『如果隨隨便便搵個人拍既話，只會後悔...後悔浪費左時間～自己既時間又好，人地既時間都好...』
我咬下咬下～飛揚BB又呆下呆下～
『呀...呀...』我就好似D雛鳥咁擘大個口等飛揚BB餵～
飛揚BB再將一細舊靚靚仔仔既餵到我口中～
『青鳥喔～每個人都等緊佢既青鳥呢～』我又咬下咬下～
「別再迷戀在青鳥之間...」飛揚BB望住手中既麵包～
我一啖就咬走左飛揚BB手中既麵包：『你仍然迷戀喺你隻青鳥呢～』
你...你隻青鳥...羅海月...
「你都係快D食啦～」飛揚再切一舊靚靚仔仔既餵到去我口中～
『你都食D啦～』我就捉住飛揚BB隻手～放到佢嘴邊～
「喂喂喂～OKOK～睇住D汁～」
羅海月...
我深明我地之間最厚既牆唔係你現任既女朋友Ashlynn...
我地之間最強大既AT力場係...你心中既青鳥...羅海月...