《情困之時，我遇上了自稱情性的情聖》: [Case 13－黑白分明] PART 11
一早起身梳洗一下...
拎左好多件好耐都無著過既衫出黎襯下...
喺塊全身鏡前左襯襯...右襯襯...
拎起條淺藍色既長裙襯下襯...
又拎起條粉紅色既短裙襯下襯...
再拎起件綠色鬆身Tee加條紅色格仔短裙襯下襯...
點解我一早就拎晒D衫出黎襯下襯？
今日係乜野日子？
今日係…平安夜...
係我應承Patrick同佢一齊過既平安夜...
為左尊重人家，所以我都係早D準備一下...
早D就襯下衫...襯得好睇D...
嗱嗱嗱！我真係純粹出自尊重架咋！
並唔係覺得Patrick重要先咁做架！
更加唔係有D乜野特別意思架！
我對Patrick一D意思都無架！
對Patrick無意思...對Patrick無意思...
唉～唔好諗咁多喇～都係襯下衫先啦～
我不停咁拎起D衫喺塊全身鏡前擺下扭下咁...
阿Knight就一直都瞓喺佢張貓床上望住我...冷眼咁望住我...
「喵...」仲要打左個大喊露添...
『做乜丫而家...睇我襯衫睇到好悶丫？使唔使我除埋俾你睇丫？』我走到去阿Knight身邊坐一坐低，再捉一捉佢上我大髀上。
「喵...」阿Knight冷眼咁望左我一眼...唔多想理我...
就好似話梗我無野俾佢睇咁...
『你隻衰野丫...成日有好野睇就睇到厭咁話喇喎？所以話呢～你地D男仔真係唔識珍惜架！』我摸下摸下阿Knight黑色既毛毛。
「喵...」阿Knight就好似叫我唔好再抽佢水咁...
『幫你按摩下就話我抽水...衰仔黎架～』你唔鍾意我摸，我就越係要摸～
「喵...」阿Knight就好似喺強國俾人強姦咁...只好合埋對眼當係俾鬼壓咁...
『睇左我咁多套，你覺得邊套好丫？』我繼續摸下摸下阿Knight。
「喵...」阿Knight合埋對眼擰擰頭...
『你都覺得無一套好丫？唉...我都覺得係呢...』總係好似...好似好怪咁...
好似…格格不入咁...
仲要周身唔自在咁…
如果唔係自己做開時裝設計既話，都唔會買咁多五顏六色既衫返黎擺...
「喵？」阿Knight抬一抬頭望一望我...
『點解唔著返平時咁？著返平時咁唔會好似好普通咩？』我用力掃左阿Knight幾下...
「喵...」阿Knight又冷眼咁望住我...
『咁先係真正既自己...都岩既...正真既自己...我不嬲都係做正真既自己...唔鍾意因為別人而作出勉強既改變...』我輕輕咁拍一拍阿Knight個頭...
「喵...」阿Knight又無我咁好氣咁...
『係喇係喇～咁我著返平時著開嗰D啦～』我放一放返阿Knight落佢張貓床上。
我再行去衣櫃前拎一拎件白色絲質恤衫...再拎埋條黑色長裙...仲有件黑色超長外套...
換好晒衫之後，我再坐喺梳妝枱前對住塊鏡化返少少妝...
話晒係平安夜丫嘛～點都要化返個淡淡地既妝先出得去既～
好用心咁化完個妝...睇清楚有無瑕疵...（話晒平時都真係無乜點化過妝...手勢都有D生疏...）
再喺塊全身鏡前照多幾照...確保無穿無爛整整齊齊...
再拎埋條親手織既黑色頸巾放落個白色紙袋仔...
再拎埋自己個白色手袋仔...
『今個平安夜我就唔同你過喇～你自己食自己啦～拜拜～』再風騷咁同阿Knight Say句Bye～
「喵～」阿Knight對眼勁衰衰咁目送我出門。
阿Knight呢種眼神係咩意思呢？
佢呢隻處男貓仔咩都未試過，識條鐵咩？
唔...
可能平時睇Discovery Channel睇到壞晒！
都係唔好俾阿Knight睇咁多！
一陣偷偷走出去搞其他D貓女就手尾長～
一落到樓，我就已經見到Patrick既背影...
Patrick企定定咁...食晒西北風咁...
不過睇住Patrick既背影...寬闊既膊頭...有D橫...有D肉...又好似幾有...幾有安全感咁...
安全感...Patrick有安全感...
Patrick既安全感...係第一次感受到嘛？
唔...我諗就唔係...
其實...一直以黎都有意無意咁感覺得到...
只係...只係我平時都唔會去面對...唔去接受...
我總係會喺未入心之前就避開...當唔係一回事...當無件事...
繼續普普通通咁當Patrick係一個普通既男仔...
普普通通...普普通通...
唔...無錯...我應該要好似平時咁...當Patrick只係一個普通既男仔...
就算俾佢既安全感入到心都好...都要當佢係一個普通既男仔...
我行到Patrick身後，拍一拍佢膊頭：『喂～黎左唔上黎坐陣先？喺道食西北風唔凍架咩？』
「下？唔…唔係咁好既…你...你今日好靚丫...」Patrick俾我嚇左一嚇之後就眼定定咁望住我。
『下？咪同平日一樣。』口花花～Patrick呢種年紀既男仔就係咁口花花～
「唔係唔係！我唔係話你平時唔靚...你平時都好靚...但今日就更加靚...真係好靚...好靚...」Patrick仲係眼定定咁望到我實一實...
『係喇係喇係喇…送俾你架。』我就無Patrick咁好氣，送左條頸巾俾佢先。
「送…送俾我架...」Patrick拎一拎出條頸巾，「係你親手織架？好靚呀！」
Patrick就成個小朋友收到聖誕老人既禮物咁既開心樣～
『係丫…之前教人織...咪順手織埋囉...』順手架咋...純粹順手架咋...
「多謝你丫～真係好多謝你丫～」Patrick好感動咁攬實條頸巾...
『頸巾喺要黎戴，唔係要黎攬架～』我就幫Patrick戴一戴上條頸巾...
「好暖丫～暖到入心丫～」Patrick摸下摸下頸上條頸巾。
Patrick把口真係...
「我為你準備嗰份呢～就等到今晚先送俾你～」Patrick仲要Keep住好甜咁既樣...
『唔使送都無所謂架喎...』咁多年既聖誕都無乜點收過禮物架啦～
「唔得唔得！我準備左好耐好耐好耐架喇！」Patrick仲要好緊張咁...
『嗯嗯...咁今晚先送～今晚先送啦～』你鍾意啦下～
「嗯嗯～咁我地而家去食D野先咯～」
『好好～』
「出發～」
我就好自然咁跟住Patrick身邊行...
好自然...好放心咁跟住Patrick身邊行...
一直都跟住喺Patrick身邊咁行...一直都覺得好有安全感...
今日…特別係今日…
特別係今日…我一D都無抗拒...
而且仲好似好...好樂意接受咁...
仲要好似有少少...少少享受咁...
享受？
享受由Patrick身上散法出黎既安全感？
或者係...或者唔係...
係唔係都好...而家既我都係想可以放鬆心情...
乜都唔去諗...乜都唔去想...
唔似得平時咁...總係要起一幅厚厚既圍牆圍住個心...
一幅厚厚既圍牆...一幅厚厚既圍牆...
諗下諗下...行下行下...好快就行到黎酒樓...
同平時一樣，都有Patrick幫我點好晒菜～仲要走晒我唔食得既野～
『你都真係幾搞笑喎～聖誕節都仲要走黎飲茶～』我忍唔仲要恥笑一下Patrick～
同Patrick一齊，就算唔係飲茶都好，我地成日都係去食中式野～
喺短短既一個禮拜，我地都差唔多食云晒粵、川、滬、京、滇、湘、桂、魯、閩、潮州、客家、京川滬～
仲要次次都係由Patrick搵返黎～
有時真係唔可以唔佩服佢～
「咁你鍾意食中菜嘛～」Patrick好自然咁拎埋我D餐具黎洗～
『愛屋及烏咁話喇喎？』我好順口就噏左出口...
「係嫁雞隨雞～嫁狗隨狗～」Patrick又好順口咁噏左出口...
『你當我係雞丫？！』我扮晒嬲咁望住Patrick～
「雞～全部都係雞～全部都係雞～全部都係雞～全部都係雞～全部都係雞～全部都係雞～」Patrick仲要唔識死咁扮巴斯光年唱婚禮的祝福！
『你真係唔怕死架喎！』我拍一拍Patrick膊頭！
所以話丫～幾有安全感都好，咪又係一個玩玩下無時真既死𡃁仔！
細過自己既始終都係細過自己～
諗野同做野都係小朋友D架喇～
「哎呀～講下笑咋嘛～我知你唔會嬲既～最多都係擺返個Cool樣出黎～」Patrick笑笑口咁摸下摸下自己膊頭。
『咩擺返個Cool樣丫？』我冷眼望住Patrick。
「好似之前一直都Keep住既冷艷樣～」Patrick又打量一下我。
『冷咩艷丫？你係唔係想我對你冷淡丫？』我冷冷淡淡咁放下一句。
「冷淡唔同冷艷架～冷淡就真係冷淡～冷艷呢就係冷得黎好靚～而且...其實你都唔係咁冷淡架姐～」Patrick又笑笑口咁打量一下我。
『都唔知你講乜...』講野講到1999咁...叫人點樣理解？
「總之...我就係鍾意你呢種...呢種外表好似Cool Cool地...但深心其實係好熱～」Patrick好認真咁望住我...
我望住Patrick對眼...一對只有我喺裏面既雙眼...
『夠喇...差唔多喇...』我都係Stop一Stop Patrick…唔俾佢再亂咁FF落去...
外表Cool Cool地...但深心其實係好熱...
乜真係咁咩？
乜我個心真係好熱咩？
我自己就真係唔係好覺...
定其實...純粹只係Patrick FF得太多咋？
不過有陣時都覺得好奇怪...
我一直都對Patrick咁冷淡...但佢對我就一直都係咁熱情...
三年喇喎...大大話話都己經三年喇喎...
三年黎一直都係咁冷淡...係近期我先叫做對Patrick好似好少少...
乜佢唔會覺得灰架咩？
唔覺得絕望架咩？
換轉係你...你鍾意一個女仔三年...但個女仔喺呢三年都對你不瞅不睬咁...你仲會繼續去愛佢咩？
你仲會繼續去等佢咩？
你仲會繼續去為佢付出卻得不到回報咩？
唔好話三年...我怕你連三個星期都捱唔到...
男人就係咁...尤其係港男...
總係鍾意漁翁撒網...總係鍾意一問即受...總係鍾意即食愛情...
個女仔只係想用多D時間去了解下個男仔係唔係真心，就話個女仔想收兵...
俾個女仔婉拒一兩次，又話個女仔吊高黎賣...
見到個女仔多人追...有得揀...自己既條件唔夠人地好...又話人地係雞...全部都係雞...全部都係雞...全部都係雞...全部都係雞...全部都係雞...全部都係雞...全部都係雞...全部都係雞...
又唔諗下自己有幾厹...係女都狗衝...
唉...男人...港男...就係識得FF...
真係痴線…
究竟喺呢個香港，點先係一個正常既男人？
又有幾多男人可以付託終生呢？
“肯留到最後既...就係對你最真心既...”
呢句說話...好似喺邊道聽過呢？
留到最後...Patrick又算唔算係肯留到最後嗰個呢？
「有野食喇～不過睇熱喎～慢慢食喎～」Patrick夾一夾舊菜苗餃俾我。
『唔...唔該…』留到最後...
過去都真係有唔少男仔鍾意過我...
而個個都係俾我既冷漠嚇退左...
仲有好多都係未表白就已經鳴金收兵...
就只有Patrick...
而家就只有Patrick仲肯留喺我身邊...
一直好照顧我...一直好關心我...
就只有Patrick...
「做乜呆晒咁望住我丫～仲要面紅紅咁～係唔係敏感丫？無理由架喎...我已經將隻蝦夾左出黎架喇喎...」Patrick打量一下我。
『無…無…我無敏感丫～可能入左黎坐耐左有D熱姐～除一除外套就無事～』我除一除件外套...
「嗯嗯～俾我丫～放喺我道丫～」Patrick接一接過我件黑色超長外套。
『唔該…』就只有Patrick...
就只有Patrick...一直好照顧我...一直好關心我...
一直俾Patrick好細心咁照顧住，一食就食左成三四個鐘～
我地有傾有講咁～
「你知唔知上帝其實係外星人黎架～」Patrick講下D開心大發現～
『下？係唔係真架？上帝喎...』我就真係唔係幾信～
「緊係真架啦～聖經裏面成日講天上發出既聖光明明就係LED光～」Patrick扮晒科學家咁既口吻～
『LED係外星科技黎架咩？』唔係人類發明架咩？
「唔單止係LED丫～仲有電路板都係外星科技黎架～」Patrick好認真咁點晒頭。
『下？電路板喎？』電路板唔係由Steve Jobs發明架咩？
「係丫係丫～你有無睇衛斯理架？」Patrick打量一下我。
『原振俠我都有睇過下既...』黎明嗰套丫嘛…
「衛斯理咪就係“那位先生”囉～」Patrick扮晒文學家咁既樣...
『哦...』乜原振俠同衛斯理係識架咩？
我以為佢地都只係識得倪生架咋喎...
「所以呢～我地既聖誕節就係用返外星科技去向外星人致敬喇～」Patrick仲係好認真咁點點頭～
『痴線～』我真係頂Patrick唔順～
「咩痴線～講真架～我地都一齊去睇外星科技啦～」Patrick點晒頭咁～
『睇乜鬼外星科技丫～』咪傻啦～
「咪就係去睇燈飾囉～」Patrick雙眼發光咁～
『哦～』外星科技～
「好～埋單先～唔該～」
燈飾係外星科技～
上帝係外星人～
原振俠係識得衛斯理～
我真係服左Patrick～
等到Patrick埋完單...
「我地而家就出發～過定去尖沙咀準備睇燈飾～～～」Patrick好似個小朋友一樣咁開心～
『都未天黑～』而家都係四點左右咋嘛～
「過定去就差唔多架喇～」Patrick捉住我隻手搖下搖下～
『係喇係喇～』小朋友～
同Patrick搭車出到去尖沙咀～
行下街又行下商場～
好多人～好多情侶～
總係好似...好溫馨...好溫暖...
好耐都未試過...過聖誕係覺得溫暖...
行多一陣...天色都黑喇...燈飾都著喇...
睇住色彩繽紛既燈飾閃下閃下...好燦爛～
好靚...好靚...原來燈飾係可以咁靚～
以前一直都唔覺...點解而家突然會覺得靚架呢？
「雅暖～你睇下～」Patrick遞一遞部手機俾我睇。
我睇一睇個Mon...Mon裏面正正就係顯示住睇梗燈飾既我。
『做乜偷影我？』我谷一谷起塊面豬登，望住Patrick。
「咁你靚丫嘛～我咪忍唔住影低佢囉～你睇你睇～喺七彩繽紛既燈色襯托下，顯得你幾咁迷人～」Patrick賣一賣口乖～
唔...喺七彩繽紛既燈色襯托下，自己既黑白顯得更加凸出...更加特別...
『都係既～又真係幾靚既～』我都幾滿意咁點一點頭。
「咁係唔係可以繼續影丫？」Patrick古古惑惑咁問一問。
『你鍾意影咪影囉～不過要影得靚先好喎～』唔好話我唔俾機會你～
「嗯嗯！一定一定！一定會影得好靚好靚！」Patrick充滿真誠咁望住我～
同Patrick一邊睇燈飾～又一邊影下相～
影左好多好多好靚既相～
好耐都無試過影咁多相～Patrick真係影得我好靚～
人地話只要你係個男仔既全部，佢幫你影既相一定係最靚最靚～
或者...真係啦～
同Patrick睇完燈飾再食埋個聖誕大餐之後...
「甜品唔食住～因為我要帶你去一個地方～」Patrick故作神袐咁～
帶我去一個地方？想帶我去邊呢？
我就跟住喺Patrick身邊行...一直行...行到黎...
『呢道係...甜品中心？』係一個教人整甜品既中心...
「嗯嗯～你坐低先～你坐低先～」Patrick拖住我隻手...
我就坐一坐喺張圓木凳上...
「我想...親手整甜品俾你食～所以就借左呢個地方～」Patrick行一行入去個開放式廚房。
『親手整甜品俾我？』呢個Patrick...
「嗯嗯～我學左好耐架喇～」Patrick就拎左塊黑色矽膠畫布放喺雲石檯面上...
Patrick好用心咁擦淨一下張矽膠畫布後，就拎起檯上枝糖漿畫下畫下...
我好留心咁望住Patrick用唔同顏色既糖漿喺矽膠畫布上好細心咁畫下畫下...
再用一把金屬鏟仔喺畫布上撇左幾下...
再添上紅色既果粉...黃色既果粉...綠色既果粉...
再放上由鮮果烘焙而成既脆脆上面...
Patrick再喺個雪櫃裏面拎出一碟碟生果粒出黎...放到喺畫布上...彩色繽紛既糖漿上...令平板既畫布變得立體..
放好晒之後，Patrick仲要即製雪糕同雪芭...以液化氮加入雪糕及雪芭材料之後，人手攪拌...攪拌既時候白煙瀰漫面前...變得迷幻...變得浪漫...
認真做起事上黎既Patrick...好吸引...總係吸引住我...吸引住我...
Patrick將黑朱古力雪糕同白朱古力雪芭放埋喺畫布上之後：「送俾你既聖誕禮物～」
我望一望檯上一張彩色襯上黑白既藝術品...越黎越模糊...越黎越模糊...
眼淚都要湧出黎！
「雅暖...唔好喊啦雅暖...」Patrick好緊張咁走到黎我面前...
『點解...點解你要對我咁好喎？』我忍唔住邊喊邊問...
「因為...因為我真係好愛你...」Patrick想攬住我...
我一手推開Patrick：『好愛我？你可以有幾愛我呀？！曾經...有一個細我足足四年既男仔...佢夠話會我愛一生一世啦！咁又點丫？佢最後咪又係嫌我大過佢！攬住左個細過佢既師妹！你地D男仔個個都係會嫌棄大過自己既女人架啦！』
個個都係...個個都會係！
總有一日...都會嫌我唔再青春...嫌我老...
Patrick呆左一呆...行前多兩步...攬實左我：「我係唔同架...我係一定唔會嫌棄你架...我愛左你三年喇...三年黎我一直都係咁愛你...就只愛你一個...為左你我好努力咁去工作...好努力去學野...為左你我決定要開間甜品店...要你做老闆娘...要一心一意咁愛你...要好好咁照顧你...你信我丫...我真係好愛你架...」
Patrick攬得我好實...好實...好暖...好有安全感...
我俾Patrick攬到個心都軟埋...
成個心都軟晒...
『係唔係真係...開得成架？』我輕輕咁攬住Patrick...
「嗯嗯！我已經儲夠錢架喇！而家只係差在同你一齊去揀舖位！」Patrick再攬得我實D...
『咁...裝修係唔係由我設計先？』我摸下摸下Patrick背脊...
「乜你唔係做晒時裝設計架咩？」Patrick打量一下我...
『我無話我唔識室內設計架喎～』我冷眼咁望住Patrick...
「咁...咁係唔係即係...你肯俾我做你男朋友丫？」Patrick面紅紅咁問...
『有D野唔使講得咁清楚架囉...』我冷冷咁回答...
「係既係既～咁我地食甜品先咯～女朋友...」
『你都係叫返我做雅暖好D...』
「係係…雅暖女朋友～」
心裏面有條刺係唔係要正視...我就真係唔知...
之不過...自己既內心就真係要好好咁正視～
我同Patrick...開始了～
Case 13 ｜ Close File