《情困之時，我遇上了自稱情性的情聖》: [Case 13－黑白分明] PART 10
教冬甩織頸巾都只係用左兩日時間...
「咁樣O唔OK丫？」冬甩遞佢親手織嗰條純白色頸巾俾我睇睇...
正確黎講係用左兩日半...
『唔...』我拎一拎起手，仔細咁Check下Check...
不論係密度...平均度...力度都係完美無瑕...
成條頸巾就好似用機織出黎咁...
唔係親眼睇住佢織既話，真係以為佢買返黎...
唔係…唔係…
就算係親眼睇住佢織，都會令人覺得佢係偷偷地喺出面買過條返黎頂包...
係唔係真係咁厲害...
事實上，如果你係親眼睇住佢織既話，你會覺得更厲害...
因為你只要教佢一次...俾佢睇住你黎織...佢就好似一部機器咁唔停手...
仲要好快手...
仲要好順手咁織下織下...織下織下...
每一針都好準...每一下既力度都係咁平均...
完全係完美...
比起機織更完美...
「嗯？」冬甩仲係好緊張又好心急咁等梗我既答覆...
『OK丫...OK丫...』你織到咁完美...點會唔OK丫...
老老實實，我都唔知你係唔係真係第一次織...
新手上路就可以織到咁完美？
仲要織得快過我？
真係講都無人信...
「咁就好喇～」冬甩好似好興奮咁。
『你果然真係可以喺兩三日內起貨....』真係太厲害...
「都係你教得好姐～我果然無搵錯人～」冬甩帶住燦爛既微笑點點頭。
『邊係呢...係你領悟能力特別高...』係超級高...
「邊係呢～邊係呢～」冬甩繼續拎住條頸巾欣賞一下。
『放心喎～我諗你既女朋友一定好鍾意～一定會戴住佢～』只要係男朋友親手織既，就算係織到穿晒窿，女朋友都會好冧咁戴喺條頸道。
除非係你女朋友唔愛你姐...
呢句說話...
呢句“除非係你女朋友唔愛你姐”...
「點丫點丫？鍾唔鍾意丫？」Alex將條五顏六色既頸巾搭到上我條頸道。
『五顏六色咁...彩虹咩？』真係好似將成條彩虹放喺頸道咁...
「彩色D唔好咩？幾咁有生氣丫～」Alex摸下摸下條頸巾，又摸下摸下我個頭。
『仲朝氣勃勃添丫～』呢個Alex...摸我個頭摸到好似當我係小朋友咁...
話晒我都大佢五年架喇～
佢先係小朋友丫～
「哦～你諗色情野～Prefect諗色情野～」Alex無黎正經咁指住我黎笑...
『喂！係你諗埋D衰野咋～』我拍一拍Alex胸口。
「拍咩羞姐～Prefect姐姐～我地又唔係未試過...」Alex攬一攬住我條腰…
『喂…喂…唔好咁啦...學校黎架...一陣俾人見到就麻煩架喇...』我推下推下Alex...唔俾佢亂黎...
「放心喎～呢D放左學既時間...無人會經過呢道架～我地可以～可以好好咁～好好咁享受一下～享受一下刺激既...」Alex越攬越實...越攬越埋...
對手仲好似想移去其他位置...
移去我身上既其他部位...
重要既部位...
『喂！好喇！唔好玩啦！正經D！』我一手就推開左Alex！
「係係係～聽晒Prefect姐姐話～聽晒雅暖姐姐話～聽晒我既女朋友話～」Alex又扮晒正經咁...
實質都係咁無黎正經...
「點姐～覺得點姐～」Alex又古古惑惑咁既樣...
『咩點姐...』又想點姐...
「條頸巾丫～你又諗左去邊丫～」Alex繼續古古惑惑咁打量住我...打量住條頸巾...
『成條彩虹咁都已經夠晒怪～仲要穿晒窿咁～你睇下你睇下～呢道同呢道仲有呢道都插得入兩隻手指喇～』織到咁鬼核突～
「係你先窄到連手指尾都插唔入咋嘛～」Alex又古古惑惑咁望下我下面...
『鹹濕仔！』我好用力咁拍一拍Alex胸口！
「哎呀...痛丫痛丫...」Alex又扮晒痛咁既樣...
『有幾痛丫？咁細力都嗌痛...你紙紮架？』我摸下摸下Alex個胸口...
「係丫係丫…我用紙紮架...我用紙紮架...對我溫柔D啦～」Alex捉住我隻手摸下摸下佢胸口...
『又抽水…』我半推半就咁摸下摸下Alex胸口...
「俾你抽水又有乜所謂姐～女朋友～」Alex又嗲下嗲下咁...
『係你抽我水丫...』唔知羞架真係...
「係喇係喇～我抽你水喇～咁點姐～鍾唔鍾意姐？」Alex捉住我隻手，打量住我...
『唔鍾意俾你抽水丫～』我扭下扭下咁...
「我係問你鍾唔鍾意條頸巾丫～你又諗左去邊丫～」Alex又恥笑我一下...
『鍾意喇鍾意喇～咁得未丫？』真係俾呢個Alex玩死～
「我都知你一定鍾意架喇～～～男朋友親手織既～女朋友實鍾意架啦～除非係你女朋友唔愛你姐～～～」Alex得得戚戚咁既樣～
『丫～得戚得你丫！好輕挑咁喎～好叻叻啦係唔係丫？我實愛你一世既？』睇到Alex個衰樣就真係想打佢兩巴！
「就算你唔愛我既話，我都係會愛你一世架喇～」Alex又攬到我實一實咁...
『喂…喂…喂丫～』我仲感覺到Alex對手好唔聽話咁摸下摸下我個背脊...摸下摸下我個屁股...摸下摸下我對大髀...
「我愛你一世～我愛你一世架～雅暖～」Alex越摸越肉緊咁...
『喂…喂丫...Alex丫...』我俾Alex摸到個人都軟埋...
「雅暖...雅暖...」
『Alex…Alex…』
Alex塊面靠一靠...越靠越近...
我微微合上雙眼...合上雙眼...
「雅暖...雅暖...」
當我仲沈醉喺回憶之中之時...
「雅暖...雅暖？雅暖！」
我聽到有把男聲呼喚梗我既名字...
『下…下...係係！』我回一回神...
「你無野丫嘛？」冬甩打量一下我...
『無無…我..我無野丫…』無野…無野…咩野都無...咩都無...
「你...諗乜諗到入晒神咁既？」冬甩好似有D好奇...又好似唔係好敢問咁...
『無！我無諗野丫...咩諗野都無...』無...從來都無...
我係唔會再諗返起...
我唔會再諗返起過左去既事...
唔會再諗...無必要再諗...唔需要再諗...
過左去...已經過左去...再諗黎都無意思...
「嗯～你話無就無啦～」冬甩好似睇得穿我個心咁既樣...
『唔...係呢...其實你女朋友係點架？』都係唔好再俾冬甩留意我咁多…
講下其他野...轉移下話題...
「佢丫...佢有少少宅宅地咁啦～唔係好愛打扮咁啦～不過佢係做時裝Sales既～」冬甩嘴角含春咁諗下諗下。
『時裝Sales...』又會咁岩既...
又會咁岩係同時裝有關...
「係丫～好奇怪丫呵？做時裝Sales但就唔愛打扮～」冬甩尷尷尬尬咁笑一笑。
『唔...可能對得多都會有D厭掛...做嗰行，厭嗰行丫嘛…』有時都係既...對得耐左真係會無乜感覺...
仲有可能會生厭添...
「嗯嗯～或者都係啦～不過都無所謂既～我就係鍾意佢夠簡簡單單～直腸直肚～唔會收收埋埋～」冬甩帶住微笑咁點點頭。
『嗯...』唔會收收埋埋...
真係有人可以唔收收埋埋架咩？
咩事都可以掛喺嘴邊？
可以講晒出黎？
開心又好...唔開心又好...
想講就講...
真係可以咁容易講出口？
真係可以咁容易面對？
人地又真係會想聽嘛？
「而且佢仲有D大情大性添架～嬲起上黎就好似核爆咁一次過爆晒出黎～但開心既時候就勁開心～開心到乜野唔開心既事都唔記得咁～」冬甩又嘴角含春咁點點頭。
『嗯...』大情大性...
將所有感受都放喺塊面上...
俾人睇通睇透...
真係可以咁？
真係可以咁無戒心？
真係可以將個心放喺人地面前？
「我就係鍾意佢呢種性格～有乜野都講晒出黎～好自然～好舒服～唔使估估下～人與人之間本來就唔應該有AT力場～」冬甩好似好有道理咁點下點下頭。
AT力場…
如果人無左AT力場既話...會係點呢？
唔係就係...第三次衝擊咩？
「係喇～為左要答謝你教我織好條頸巾，今晚我請你食返餐丫～」冬甩盛意拳拳咁既樣。
『唔...咁客氣丫...』其實我都無教過D乜...
只係你領悟力強...睇一睇都識...
「唔客氣～唔客氣～想食D乜？」冬甩問一問。
『唔...想食D乜...』突然咁樣俾冬甩問一問...我又諗唔到食乜好喎...
呢個星期都有Patrick幫我諗...
唔使我傷腦筋諗食D乜之餘，仲有Patrick帶埋我行...
有人肉GPS，搞到我就快變路痴添...
而家突然俾冬甩咁問一問...搞到我個腦一片空白咁...
就連自己想食乜都諗唔起...
「中菜有無興趣？」冬甩見我“唔”左好耐都“唔”唔出D乜，就俾一俾意見我。
『好丫好丫～我都好鍾意食中菜架～』其實我最鍾意就係食中菜～
「嗯～我知附近有間酒樓都唔錯～揸車過去都好快到～」
『嗯嗯～』
「咁我地行喇～」
『嗯嗯～』
同冬甩執好晒D野，就一齊離開酒店Coffee。
坐住冬甩架白色既Mini Cooper，好快就黎到佢所講嗰間酒樓～
其實呢間酒樓，Patrick都有帶過我黎食～
「想食D乜？」冬甩拎起份Menu睇下睇下。
『無所謂～』之前Patrick帶我黎都係由佢發板～
「唔...咁有乜唔食？」冬甩又問一問。
『咩都食～』我又唔係揀飲擇食既女仔黎既～
「唔...咁好啦～唔該～」冬甩就叫一叫個侍應埋黎。
睇住冬甩點菜，總係好似有D唔係咁習慣咁...
唔習慣佢點得咁快...
唔習慣佢點得咁順暢...
唔習慣...唔習慣...
總係好似...差梗D野咁...
總係好似...漏左D野咁...
等到冬甩點完晒菜，我就拎起D杯杯碗碗筷子匙羹準備用D茶洗洗佢。
『係呢～你同你女朋友去食野...嘩！』我說話講到一半，先發現D茶係咁熱！
「有無事丫？」冬甩望一望我對手...
『無無…』不過真係勁熱...
「仲話無？紅晒喇～」冬甩再打量一下我...
『OK既...紅左少少姐...』仲有D痛痛地咁囉...
「睇你真係唔似～」冬甩半帶恥笑咁拎拎頭。
『唔似？』唔似D乜？
「唔似咁唔小心～」冬甩再打量我多一眼...
『意外黎姐...意外黎姐...』太耐無自己洗過...係咁上下啦...
呢排出親街食野都有Patrick幫我消毒晒D杯杯碗碗各樣餐具...
我就成個殘廢咁坐喺道得食...
係咁上下架啦...
「都係等我幫你洗啦～」冬甩拎埋我D杯杯碗碗筷子匙羹。
『唔該…唔該…』我就真係有D唔好意思...
話晒都係人地既男朋友...
萬一俾人地個女朋友見到...誤會就唔係咁好啦...
女人有時主觀起上黎...真係點講都唔聽架嘛…
冬甩洗好晒D杯杯碗碗筷子匙羹，再等左一陣，餸菜都黎到～
有好多好野食～
有D係之前同Patrick黎既時候都有點過～
又有好多都係之前未食過～
而喺我正想夾舊生春卷放入口之時...
『有薄荷葉！』我望住生春卷凸出一塊薄荷葉仔...
「嗯？生春卷係有薄荷葉架～有問題？」冬甩好奇咁問一問。
『我對薄荷葉有敏感...』差D都唔記得左添...
呢個星期以黎，都有Patrick幫我點菜...
而且每次都有佢幫我叫走晒D我會敏感既野...
搞到我差D都無留意到有薄荷葉喺生春卷入面...
好彩塊薄荷葉凸晒出黎...唔係既話...入左口...落肚又要入醫院架喇...
「食物敏感丫？你頭先唔話俾我聽？」冬甩有D緊張。
『嗯嗯...唔記得左...』都係Patrick衰...
「咁都可以唔記得？食物敏感會死人架喎～你真係～仲有D乜唔食得架？使唔使我幫你記下丫？」冬甩無奈咁笑一笑，擰擰頭。
『呃...唔使唔使...我會記得架喇...』都係自己小心D...留意多D...
「你真係呢～你既外表就好似好識得照顧自己咁～但內裏呢？就好需要俾人照顧～」冬甩恥笑我一下。
『邊！邊係呢...』我內外都係咁識得照顧自己好唔好...
「仲話唔係～我覺得...有時都真係要正視一下自己...尤其係...好似你呢種收得咁埋既女仔...」冬甩打量一下我再點一點頭。
有時都真係要...正視一下自己...
尤其係...好似我呢種收得咁埋既女仔...
「心裏面有一條刺，唔正視佢會發炎。」情性呢句話突然就喺我既腦海中出現...
心裏面有一條刺...正視一下自己...
『你地D愛情作家都係一樣～』我無奈咁笑笑口...
「嗯？一樣？」冬甩一頭問號咁。
『一樣扮晒好似好了解人咁～』好似係人係鬼一眼就睇穿咁～
「唔關事～呢D都係因為你本身既問題未解決～」冬甩又好似看破紅塵咁點點頭...
本身既問題未解決？
我本身有乜問題丫？
人人都會有問題架啦...
有好多問題都係解決唔到架啦...
都解決唔到...仲點去解決呢？
唔解決咪由佢收喺內心深處囉...
有問題咩？
唔理佢就無事架啦...
無人會在意...亦都唔需要人地在意...
乜都唔需要...亦都無必要...
我好小心咁食餐飯...好留意每一碟餸...睇清睇楚有無D乜野係我唔食得...
幾經辛苦都終於食完餐飯...
坐住冬甩架白色既Mini Cooper返到黎屋企樓下，冬甩再送到我黎大閘前...
我離遠就見到有個身影...
『Patrick？』我見到Patrick企左喺道...
仲要好似嬲嬲地咁既樣...
「你朋友？」冬甩問一問。
『嗯嗯...我朋友...』我望住Patrick塊黑面點點頭。
「哦～咁我送到你黎呢道喇～再次多謝你教我織好條咁靚既頸巾～」冬甩向我點頭道謝。
『唔...唔使客氣...』呢個冬甩都真係太好禮貌...
「記得要正視自己丫～拜～」冬甩喺我耳邊輕聲咁講一句後，就轉身離開...
我望住冬甩個背影越行越遠...越行越遠...
正視自己...正視D乜野丫？
「雅暖...嗰個邊個黎架？」Patrick行一行埋我身邊。
把聲仲好似好大醋意咁...
真心酸到隔住個Mon都聞得到...
『我咪同你講過有人搵我教佢織頸巾俾佢女朋友既～咪係佢囉～』我就真係無佢咁好氣～
「哦～」Patrick一聽到我咁講之後，就好似好放心咁。
唉～小朋友～
『點解你會喺道既？』都係問下佢做乜搵我先。
「係丫係丫～我整左D野俾你試下丫～」Patrick成個小朋友咁咁雀躍。
『俾我試下？咩黎架？』俾咩野我試丫？
「呃...方唔方便…一齊上去先丫？」Patrick尷尷尬尬咁...
『哦...方便...』係尷尬就唔好問啦...
帶Patrick上到黎屋企...
「喵～」阿Knight喵左一聲後，就好似好識做咁唔阻住我地兩個咁...
「我呢～親手整左D甜品俾你試下丫～」Patrick就喺個裝有幾包冰既袋仔裏面，拎左個盒仔出黎...
『甜…品？』我八八掛掛咁望下望下Patrick個盒仔...
「嗯嗯～俾D意見～」Patrick打一打開個盒仔...
我就見到...見到有碟...
『哈哈哈～呢舊咩黎架？彩虹球丫？』我見到有個有齊紅橙黃綠青藍紫七隻色既波放喺隻碟仔上。
「彩虹雪糕丫～我整左好耐架喇～你試下先啦～」Patrick就遞一遞隻羹仔俾我...
『唔...個賣相都幾好既...唔...』我食一細口...
「點丫？點丫？OK嘛？」Patrick好緊張咁問。
『OK喎～幾好味喎～好有...咩味呢...總之就係果味啦～係咩果黎架？』我食完一細口...又一細口...
好多種味...好多種唔同既果味...
總之就係好甜好好味！
「OK呢～我用左好多唔同既生果整架～研究左好耐～又失敗左好多次～再改良左好多萬次先整到架～」Patrick好興奮咁～
『真係掂喎～越食越好味～越食越想食～仲越食越…越食越…』我拎一拎起碟彩虹雪糕，行到去部iMac前！
我撳一撳著返部機，就畫起野上黎！
我一邊食～一邊畫～
突然好似靈感爆炸咁丫！
我一邊細味Patrick親手整既彩虹雪糕一邊畫～Patrick就喺我背後靜靜咁望住我～
一幅又一幅～一張又一張～一件又一件～
好多好多～畫過不停～
彩色繽紛～色彩鮮艷～
喺短短既一個鐘頭裏面，我就畫左百幾幅設計出黎！
『搞掂晒！Send埋俾張生～今次一定唔會俾佢Ban～』就連我自己都覺得好滿意！
「你好勁丫～我睇住你畫畫畫畫畫～好似無影手咁丫～」Patrick拍住手咁行過黎。
『全靠你碟彩虹雪糕俾到靈感我咋！真係多謝晒你～』如果唔係我都頭痛梗點俾張生抽插～
「邊...邊係呢...丫！我幫左你...咁...咁聖誕一齊過...當係回禮得唔得先？」Patrick古古惑惑又怕怕羞羞咁...
『嗯...好啦好啦～聖誕就一齊過...當係回禮啦～』呢個Patrick...又要古惑又要驚...
不過算啦～反正我就一早諗住同Patrick過聖誕架啦～
「嗯嗯！一言為定架喇喎！」Patrick就好似小朋友收到聖誕禮物咁既開心樣～
『嗯嗯～一言為定～』我都好少會反口既～
「咁...咁夜喇...我都係唔阻你休息...我...我走先喇～」Patrick又尷尷尬尬咁...
『呃！嗯...你...返去都小心D...』我遞一遞隻碟同隻羹仔俾Patrick...
「嗯嗯...」等到Patrick執返好晒D野後...
再送一送Patrick出門口...
「拜拜...」
『拜拜...』
閂一閂返埋道門之後...我就挨喺道木門...
其實...我係想留你喺道...但又好似...好似...
「喵...」阿Knight冷眼咁望住我喵左一聲...
我行到埋阿Knight身邊...摸下摸下佢D黑色既毛毛：『我係唔係要對自己...坦白D呢...唉...』