《善惡的彼岸，或許都是愛》: 2-1

「好，恭喜四位。你地而家距離畢業只差一步姐。」老者說

「吓？咁快？」四鬼異口同聲地說

「無錯。作為一隻鬼，最重要係懂得如何利用魔力。老實講，你地可能呢幾千年都唔會有機會用到頭先你地形象化出黎既魔力。因為係亡者國度入面其實無咩機會會無啦啦開片。只不過你地必需要學識點樣利用你地既魔力，先可以係往後既日子擔當一個稱職既神官。」老者說

四人一頭霧水

「實習時間！將會決定你地能否順利畢業！」老者說





「實習？」四人心想

「你地將會被分派到唔同既職位度做實習，做得好，自然就能夠畢業。畢業後，你就可以自由決定幾時去投胎。你鐘意既，可以好似我咁，留係亡者國度入面服務返幾千年先投胎又得；一畢業即刻趕去投胎又得，隨你喜歡。」老者說

「要做幾耐先可以畢到業架？」金毛仔心急地問道

「要睇你做成點啦。」老者輕佻地說「你地實習既時候會有一個師兄師姐帶住你地，你地比Ｄ心機學，話唔定可以早過佢地畢業架。」老者說

「點解你一直都唔投胎，要留係呢度咁耐？」健志問道





老者突然低下頭，感慨地說「有Ｄ野，到時候你就明架啦。」
然後老者抬起頭，抖擻精神並說：「好，你地想做咩職位。」

四鬼相視，靚女說：「……有咩職位做？」

「視乎你地想做咩啦。黎，講比叔叔知你地想做咩？」老者說