《善惡的彼岸，或許都是愛》: 1-10

又是轉眼間，大家又被傳送了。
 
「由於大家尚未畢業，所以你地既「家」就係「不甘之院」入面既宿舍。到大家成功畢業後，就可以設定返傳送去你地自己既「家」果度。」ＫＪ說：「你地既筆記地圖入面暫時就只會有「學院」、「家」、「訓練」，同埋「通訊」四個地點。直到你地成功畢業，就可以自由登記所有地點，甚至通過搜索功能黎傳送至任何地方。」ＫＪ說
 
「搜索功能？」博士問道
 
「打個比喻：你係筆記既「搜索」一欄入面寫「愛我的人」，筆記就會顯示出一張愛你既人既清單，你按一下入面既人名，你就可以自動傳送到果個人既身邊。如果果個人係活人，你就要先擔任到準許自由來往人間既職位，例如月老或者勾魂使者，先可以去到。」ＫＪ說
 
「好，如果無問題，大家分房休息先，一間房四隻鬼，啱啱好夠比你地開一枱麻雀。」ＫＪ說：「最後比少少掌聲做左你地一日導遊既我先唔該。」
 




「喂喂喂，有無投胎果方面既資料呀？」金毛仔問道
 
「投胎？丫，係係係，我講漏左添。當你地成功畢業之後，就會有投胎呢個選項架啦。總之你地而家既目標就係一定要係亡者學院入面畢業，如果唔係講咩都無用。」ＫＪ說，一邊做出一個勝利手勢，然後便按下筆記消失了。
 
 
  是夜，健志、金毛仔、博士和肌肉男四人躺在床上聊天
 
「你估我地幾時先畢到業？」金毛仔問
       
「我地而家連要讀幾多科都未知，Time Table又未有，點估到咁多丫。」博士回答道




       
「唉，我地呢班鬼就真係不甘心啦，無啦啦死左。」肌肉男說：「好似我咁，做做下GYM成部機壓左落黎，咁啱又成個GYM ROOM都無人係度，結果就咁香左，唉……」
       
  
「我係訓訓下覺果時無啦啦死的，死因我都而家都未知。」博士推一推眼鏡說

「我呢，就比班所謂兄弟放飛機而死既。講好左一齊去劈友，點知一開片就個個都走晒，淨低我一個。就算我開無雙都走唔甩啦……結果連一刀都未斬中到人就比人捅死左啦。」金毛仔指著自己心口的刀說。
 
「哼，ＭＫ仔，你根本就應該去善教之院」博士心想
 




「我……我就大家都見到啦，係比把較剪插死既。當時我跪左係旺角行人專用區，同緊我女朋友求婚。結果我未等到佢回答我，我就死左啦。」健志說
 
「唔係掛？咁黑仔？」其餘三人異口同聲地說
 
「唉，其實我成世都係一個黑仔黎架啦，我都習慣晒。只不過係估唔到我既死亡會出現係一個對我咁重要既時刻度姐……」健志說，眼中的淚光慢慢凝成淚滴，奪眶而出。
 
「唔好咁傷心啦，你試下遲Ｄ報夢比你女朋友知，叫佢燒著相落黎比大家睇下。咁遲Ｄ如果我地早過你畢業，咪可以幫下你眼睇下你女朋友近況如何囉。有圖有計傾，係咪先？」金毛仔說
 
「咁你又報下夢叫你班兄弟燒Ｄ相黎睇下丫，咁我地如果早過你畢業既，咪可以去人間幫你向佢地報仇囉。」健志笑說，其餘三人也笑著。
 
雖說鬼不會感到累，但可能是剛剛成鬼的關係，四鬼說著說著，都紛紛沈睡去了。