香港戰場: 浸大篇‧11.長天中學
11.長天中學
團隊：張明德、黃海澄、蘇莉、馬惜君、陳錫明、郭少東、何北、江國斌、胡添祐、徐少貞、張采、司徒瑞、劉敏霞、古有榮
從地庫出來，門口轉左到街口再轉左，沿福榮街直走，下一個街口就是長沙灣天中教英文中學。
快到十字路口，長天有人從校門張望，郭少東、張明德等幾個人隨即舉起手來，表示並無惡意。
蘇莉等人把守着路口，幾個舉起手的人走向學校，幾個學生開門讓所有人進去。
一個高大教師持槍走出來：「你地咩人，想做咩野?」
張明德答：「我地係浸大學生，其他人係投降嘅軍人、警察，呢位係瑪利亞嘅教師，英華嘅學生，同埋其他市民。我地有D事要過去港島，想由呢邊行去海邊，途中想經過德貞，有人託我地交樣物品畀德貞學生。」
眼前這位周處君老師，教體育科。他和學生帶領眾人上課室。一路上學生的眼光充滿敵意，尤其望向三個軍人時更甚。
周處君着眾人到一個課室坐下：「我地學校有D問題，大家都未決定下一步要點做，所以你地唔好諗住可以得到好大支援。」
接着他指向窗外：「要去德貞最快路線係沿興華街一直走，不過你地睇睇。」
何北與江國斌向窗外一望，只見興華街與長沙灣道的十字路口，有政府軍把守着。
「呢班人幾次想攻入嚟，最初唔多人畀我地守住，而家應該休息，等下一輪增援再攻。」周處君道。
「即係話，呢度遲早守唔住。」張明德說，「你地決定守定係走?」
周處君搖搖頭：「未有決定，部份老師同學覺得唔夠打，應該要投降。」
周處君請眾人到禮堂，向學生講解外面情況。黃海澄、張明德、胡添祐分別講述一路所見。台下學生聽到軍人殺人情況，莫不震驚感嘆。
學生主要分四個群體，一個是留守派，主張以學校為堡壘反抗；一個是投降派，認為實力不足反抗只是徒勞；一個是撤走派，主張撤出學校，到更多人的地方一同防守；最後是六神無主派，多數是年紀較幼的學生，這場面下也沒甚麼主見。
聽完三人敘述後，長天學生群體明顯有變化。撤走派分裂成兩班人，大部份人表示應該撤退到明愛醫院，而小部份則希望與眾人一起往港島。留守派人數大減，同學都認為難以長期留守，所以約一半人轉為投降派或撤到醫院派。六神無主派的學生亦有少部份轉投其他派別，但大部份仍然六神無主。
現場以六神無主派佔近四成，其次是投降派佔近三成，而原本人數相當的撤走派勢力大削，支持撤到醫院的人佔兩成，而跟眾人去港島的佔約一成，堅持留守的人佔不足一成。
撇除六神無主的學生，投降派佔多數。
「我覺得幾奇怪，點解你地會認為投降就無事?」馬惜君問學生。
「你覺得打得贏?打又死唔打又死，或者投降佢地放過我呢!」
「但係你聽完我地講之後，仲認為政府軍會放人?」
「咁有可能佢地會放過學生呢，我地又無做錯咩野。」
「但係我地一路行過嚟，見到被殺嘅人都無做錯咩野喎，軍人好明顯係屠殺市民，而且亦都想攻入嚟殺人喎。」
「你覺得我地守得到咩?投降係唯一出路，反抗遲早都死啦，人地係專業軍人，專業殺人。」
「如果學校守唔到，有無諗過去醫院?好多人係度，又有醫生。」
「總之我覺得應該要投降，話唔定唔會死呢?你又點知一定死。」
「如果其他人離開，你會走去投降?」
「咁又唔會，我會留低等等，但如果軍人嚟到咪投降囉。」
此時張采與留守派最近，與他們攀談起來。突然變成少數的留守派，剩下的人都是最堅定的。
「咁多人走，點解你唔走呀?」
「咁多人死，你唔去死?呢度係我地嘅地方，如果守得住，我地梗係想盡力守住。」
「但而家剩低留守嘅，少咗好多人喎。」
「係少，但仲夠嘅。」
「如果萬一守唔住，你地會點?」
「我地都唔係傻嘅，如果有大量軍人過嚟，我地都會撤退到醫院。勇武還勇武，唔理情況就係送死。」
「咁嘅情形下，撤走嘅人會帶走唔少物資，你地點算?」
「我地先扣起部份物資，起碼夠自己食先。你睇下，我地一早將物資執落背囊，如果真係守唔住嘅，一拎起就走得。不過希望唔使走啦。」
「投降派佢地好似暫時留係度，你地有無咩預算?」
「都唔預得咁多，希望佢地就算投降，都唔好開咗個門任人入嚟啦。」
江國斌正與老師商討。
江國斌道：「你地老師之間有無決定?」
「老師之間仲未有決定，呢件事上有好大分歧，似乎好難短時間有共識。」說話的是近年60歲，滿頭白髮戴着方形眼鏡的中文科老師張豐年。
「我地學校一向畀學生自主決定，老師嘅角色係從旁輔助，提供各種資訊。」周處君道：「正如我請你地上嚟講解外面情況，大家希望掌握更多資料，通過討論去達到成果。」
江國斌此時有點擔心：「但你睇睇，老師同學生似乎都得唔到共識，有人想走有人想留，亦有人想投降，只怕短時間做唔到咩野。」
張豐年說：「無錯。人越多，達到共識嘅機會率就越低，就算有共識，商議嘅時間必然加長。如果形勢唔容許再討論落去，我地就唯有按自己意願行事。」
「但唔怕人一分散，力量就會分散?到時軍人逐個擊破，大家都要死。」
「都無辦法。」張豐年望一望學生：「生死大事，唔係其他人可以話事。當有足夠資訊之後，各人有各人選擇，無辦法強求其他人跟隨自己。萬一自己決定錯咗，連累其他人亦唔好。所以希望每個人能夠獨立思考，去決定下一步行動。」
「但如果投降，就有可能畀人殺死......」
此時有個男教師突然站起，向前走向江國斌：「可能畀人殺死，呢個只係基於你地觀感得出嘅推測。有無咩實證軍方會殺投降嘅人?跟據呢個假設而要咁多學生冒險，要學生開槍殺人或者被殺，咁對得住學生咩?」
「陳老師，佢地唔係話要學生送死，唔使咁激動。」周處君向陳耳安老師道。
張豐年亦說：「我地每一個行動都係基於假設，留守係假設抵擋得住軍方攻擊，撤去醫院係假設對方肯接納學生，投降係設軍方唔會殺降。而所謂嘅證據，除非有白紙黑字承諾，否則係咁混亂嘅情況之下，所有證據都無法指出將來必然一樣。所以，陳老師，我知你主張投降，係因為唔想學生有咩傷亡，但呢一點亦都係基於軍人唔殺降嘅假設，無任何證據去講軍人一定殺或唔殺降。」
陳耳安聽罷，復又坐下來。
的確，現在所有行動都是基於假設，無人敢肯定任何行動會否成功。然而合理假設與不合理假設，始終有分別。
江國斌續問：「但留守、投降、撤退，邊一個假設生存機會較大?我地使唔使向學生提出，要諗諗邊個方案生存機會大?」
張豐年說：「可以提出呢一點，但如果指出點樣生存機會大，即是變成由我地去決定。」
沒有老師異議，張豐年續說：「我地係天主教學校，天主會安排我地嘅路。不如由我將各種情形講一次，之後係點，就由神去安排啦。」
張豐年上台，向學生講解各種選擇可能面對的情況。當他講到投降或會被殺時，陳耳安一臉不悅。
說完後，學生有5分鐘考慮，之後必須有決定。平日討論通常人聲嘈雜，但這時除了一些同學細聲問意見，大部份都在沉思。
不久，原本想投降的學生，有一部份投向撤到醫院，亦有小部份人走向留守者。現場人數明顯變化，撤到醫院的人佔四成，沒有主見的人佔三成，投降者大減至兩成，留守者及與眾人離開者，合共佔一成人。
不久，無主見的學生見到撤退人數大增，開始有人走過去。
人是群體動物，見到有人走向撤退者，其他人就會跟隨。最後的結果是，六成人支持撤到醫院，兩成半人想投降，一成人留守，其餘少數人表示與眾人離開。
大家決定了，就行動。此時此刻沒有人知道後果，但路是自己選擇，大家就走自己的路。
陳耳安和投降派學生留在學校，張豐年、周處君與學生林太華、鄭約、連漢昭跟隨眾人往港島，而留守及撤往醫院兩批人，亦分別有老師跟隨。
說是跟隨而不是帶領，因為事到如今，跟本沒有人可以帶領其他人找出路。