香港戰場: 浸大篇‧9.明愛醫院
9.明愛醫院
團隊：張明德、黃海澄、蘇莉、馬惜君、陳鳴光、陳錫明、郭少東、何北、江國斌、余慶昌、胡添祐、徐少貞、張采、鄧叔、張嬸、張達成
懷信樓四樓。
明愛醫院由不同大樓連貫起來，各樓層分屬不同部門。懷信樓地面一層本屬急症室，但早前一輪衝突，急症室已被破壞，不得不搬到更高層去。
四樓設立了臨時急症室，大量傷者在走廊等候。傷者太多了，醫院沒有足夠醫生處理，為了穩定傷者情緒，安排了護士在傷者之間登記及初步治療，劉彩霞就是其中之一。
「姑娘，幾時到我呀?」
「你等一等啦，而家止咗血，無咩大礙嘅，前面咁多人，醫生都盡快處理緊。」
「姑娘，我等咗一個鐘啦。」
「平時排街症都要咁嘅時間，今日咁多人受傷，大家畀D耐性，我地會盡快處理嘅。」
「姑娘呀，你過一過嚟......」
劉彩霞過去，一個老人坐在地上，腳受了傷。
「我隻腳咁樣，可唔可以睇先呀?」
「我幫你處理咗先，睇醫生都要排隊。」
一個男人站了出來：「等咗好耐喎，究竟有無醫生呀?」
「醫生係入面忙緊......」
那男人走上前，一手推開劉彩霞：「行開，我要睇醫生!」
劉彩霞趕到那男人面前：「大家攞咗籌就一排好隊，如果唔係只會越嚟越亂......」
「夠啦!」不知何時那男人拿出一把剪刀，插向劉彩霞，「唔好阻住我......」
嘭!
一聲槍聲，全場立時靜下來。
那男人與劉彩霞皆跌倒地上。原來傷者之中有警察，開槍擊斃了那男子。
其他護士趕了過去，只見劉彩霞的傷口剛好在心口位置，而且十分大，立時推來一張床，送進去醫生的崗位。而那個男人一槍爆頭，已然斃命。
幾經辛苦，張明德等人來到懷信樓，但原來是急症室的位置，現時十分零亂。
眾人站在走廊上，小心翼翼向前行。只聽到大樓內有嘈雜聲傳出，各人隨即緊貼兩邊牆身停下來。
樓梯傳來腳步聲，一個持槍男人走下來，向眾人招手：「跟我上嚟。」
所有人跟着那男子上去。那男子說：「早前有人衝擊醫院，下面兩層都有破壞，所以醫生搬晒上樓上。我地市民幫手睇住出入醫院嘅路，一早睇到你地過嚟，而家先帶你地去睇醫生先。」
四樓擠滿受傷民眾，受的都是輕傷。張嬸被安排在四樓等候，張達成和鄧叔留下伴隨，其他人則繼續往上走。5樓則是預備醫治較嚴重傷患的人，特別是槍傷。醫生立即走過來，看余慶昌的傷勢。
「槍傷，已止血，抬佢上床，推入A4位。」李嘉升醫生一聲吩咐，其他醫護立即行動。病房內較亂，其他人都不好進入。
醫生望着他們：「我係李嘉升醫生，你地咁遠行過嚟都無事真係好彩，有人想見一見你地，跟我上嚟。」
眾人隨李嘉升醫生往上走，很快來到一間病房。病房內有幾個全副武裝的人，也有警察和醫生。
警察吳遠輝站起來，向眾人介紹。全副武裝的市民邱天華說：「醫院多次畀人圍攻，我地負責守住，等醫生可以安全照顧傷者。你地點解過嚟?」
張明德答道：「我地有人受傷，已經係樓下醫治。另外我地想打探最新消息。」
吳遠輝側一側頭：「最新消息......我地向總部聯絡過，又希望總部增援，但警方高層無任何指示，而家在場警察係自己決定行動。」
戴着眼鏡的老醫生趙春華接着表示：「我地亦聯絡過醫管局，但局方無任何回應。另外亦聯絡過其他醫院，公立醫院同我地情況差不多，有幾間細醫院就無人聽電話，睇怕都凶多吉少。」
馬惜君按一按面前的枱面：「你地覺唔覺得奇怪?我地經過警署、醫院，都無任何消息同指示，好似有人要將每個地方切割成一個個孤島咁。」
「資訊孤島，」蘇莉接着說，「佢地想各個地方各自為政，然後逐個擊破。」
胡添祐望向陳錫明：「問題是，點解佢地要咁做?」
一時間，眾人望向三個軍人。陳錫明先開口：「之前都講過，我地係收到指令要殺死所有講廣東話嘅人，至於點解要殺人，上方無解釋指令。」
何北一臉歉意：「我地無問到原因，你知道，軍人要服從上方指令，唔需要質疑。」
邱天華說：「唔緊要，你地選擇唔屠殺市民，我地好多謝你，只係唔知道全港有幾多軍人，當中又有幾多人用行動反對屠殺。」
陳錫明說：「實際數字方面亦唔清楚，不過我知道最少調動六個旅嘅兵力，另外剛才遇到警察特別行動組，佢地明顯收到相同指令，即是說，對方武力強大。」
六個旅!
邱天華聽罷一怔。須知道陸軍編制由最大排起是軍、師、旅、團、營、連、排、班、伍，旅是由幾個團或營構成的軍事大單位，一個旅大約有七千兵力，六個旅即是四萬二千人，比全港警力還要多。
他沉聲道：「四萬二千人，佢地想殺晒香港人?」
病房頓時一片寂靜，大家都知道這個數量的軍人是怎樣的力量，竟然用來對付市民?而且能動用這種兵力，一定是政府的極高層精心策劃，軍方一致支持。即是說，整個行動都是政府一手策劃。政府用武力對付平民，唯一可能就是這個政府不是屬於人民。
一陣槍聲打破寂靜。醫院各個高位都有狙擊手，向衝過來的軍人開槍，消滅一隊後另有其他人持槍出來，拿走軍人身上的武器，是以醫院內的車火補給充足。
李嘉升問張明德：「你地下一步點做?」
「我地有D重要資料要拎去港大，陸路似乎無可能，想去海邊睇睇有無船。」
「由呢度去，穿過工業區之後，再過幾間學校就會到碼頭。要唔要咩補給?」
「我地想休息一下，補充食物、水同子彈。」
「好，我帶你地去休息。」
李嘉升帶領眾人到附近一個空出來的病房休息。眾人躺在床上，頓時覺得身體一鬆。戰爭令無辜市民神經緊張，然而，是誰要發動大屠殺?是誰一步一步逼市民到死角?
半小時後，眾人收拾行裝，吃了一點東西，再往下走去。
出發前，他們到5樓探望余慶昌。
余慶昌一望，就知道又是出發的時候：「可惜我唔可以陪你地繼續走。」
黃海澄說：「你嘅新任務係要保護醫院，所以要盡快好返。」
「哼，」余慶昌望一望自己受傷的手，「睇怕都要一段時間，希望我好返之後唔使再打，你地小心D，盡量唔好同敵人正面衝突。帶咗後生仔嘅遺物未?」
黃海澄摸一摸衣袋：「帶咗。」
余慶昌道：「準備好就快D走，越快到港大越好。」
李嘉升醫生一臉疑惑：「其實你地咁急去港大做咩呢?」
余慶昌說：「我都唔知呢班學生真正目的，不過如果佢地要做嘅，就一定係好重要嘅事。我信佢地，咁重要就唔好遲，快D走啦。」
李嘉升道：「離開嘅路有兩條，我帶你地從車路出去。」說罷領着眾人出去，回頭望一望余慶昌，「你好好休息啦。」