《何家身家何家分》: 1-3

「你邊度讀㗎？」「我讀Space㗎！」「Space？讀太空呀？嘩好勁喎～」
親戚們的廢話真是難頂透。『asso就asso啦，space乜姐，真係CCCU都好過你間space啦。』我對媽媽竊竊私語。的確，和親戚應酬可不是我的強項，尤其被問道凡是社運人都很怕的問題，也就是社運的問題，真的不好應付。可惜，哥哥毒得很，連說話都不會，而且當插畫的他也很怕被問到收入的問題，免得尷尬；兩位姐姐則太忙太累，根本沒有閒情逸致和親戚們做小組討論。

「點呀，喂，嗰個乜嘢『佔中』呢，咪又係俾人清咗場？」頂，今鑊真係左膠累事；難道要為這群「政治BB班」的朋友第一課就談何謂左膠？別說笑吧。『冇錯，場就清咗，市民生活漸漸恢復正常。但係我會話，雨傘革命嘅失敗，唔代表唔會有下一場革命。831決定就落咗喇，但係我地都要明白香港人係唔會袋住先嘅，咁我地輸咗，都唔代表北京政府贏咗......』

突然覺得自己左膠上身。

「阿姪仔，你講嘢呢......真係唔錯！」四姑丈不夠爭辯了的慣常反應，就是以笑遮醜。看他笑得露出那黃色的牙齒，真想一拳打過去。「但係呢阿怡，你家姐、阿哥都唔玩政治，你點解要玩呢啲嘢嘅？」轉移視線？哈哈，這可不難應付呀。『其實呢，作為社會公民嘅一份子，我地係有責任參與社會時政嘅。你睇到佢地無所謂玩政治，但係其實佢地都會關心政治，因為佢地知道政治同生活息息相關......』

但對於我來說，還有更難應付的問題：「喂，有無拍拖姐？」頂你，大伯你問些甚麼呀。「聽聞搞社運好多女溝嗰喎。你睇下，嗰個乜嘢王慕鋒，樣樣衰衰咁，都叫溝到女啦！」『我冇女，得仔姐！』





媽媽的雙眼和她的嘴一樣流露出錯愕，親戚們的面容像板起來一樣。叔叔則出奇地流露出笑容。是的，肯定是講錯話了。

『講笑姐！哈哈哈哈！我意思係，我無心儀對象呀！』氣氛總算回復正常－還好，差點變成出櫃。「咁你快啲搵返個啦！我地以前喺鄉下呢，真係㗎，12歲呢就要結婚㗎啦！」三姑丈總算幫忙打了個圓場。

「喂，唔講喇，時候唔早喇，我地要返屋企喇喎！」媽媽把一切話題終結掉。然後大家各自回家去。對了，明天一早，媽媽和爸爸，就要往福建繼續和親戚們講數；大家姐要飛加拿大。也就是說，家裡應該會只剩下我、二家姐和阿哥——只是如果我帶男朋友到家，不知道二家姐和阿哥會否有甚麼微言。

這夜回家後，收到兩個訊息：「KY，你聽晚得唔得閒？」來自阿欣的訊息，提醒了我明天是平安夜。對了，阿倫明天應該會約我賞燈飾呀。「Sorry ar 阿怡，聽晚我有嘢做呀，陪唔到你呀！」

唉。平安夜都要毒自過？嗚......即是可以去旺角鳩嗚了。Hold on，欣搵我做咩？




『得閒呀，做咩？』
「想同你去旺角鳩嗚囉！btw，你唔係要陪男朋友嘅咩？」
『佢......話有嘢做』
「吓，平安夜都唔陪男朋友咁衰？有咩緊要過男朋友喎！」
『well...idk :(』
「......咁聽晚六點鐘巴士站等？」
「okay :)」

「喂！」大佬一手搶過我的電話——幸而剛好按了電源鍵鎖起電話。『拎返嚟！』
「細佬你咁唔得㗎喎，有仔都仲溝女？」『細聲啲啦，老母聽到呀！』我可不想剛才的事情重演。「你呀，好心就正正經經搵個女朋友啦，好地地竟然搵仔嚟溝。」『關你咩事呀？』「關心你姐！最好你聽日就醒定啲，我唔會唔聽警察話㗎，你知我平時點㗎啦。」





阿斌真的好多事呢，但是偏偏又政治潔癖得很要緊。真的搞不懂，大家姐搞工會、二家姐做左膠，我至少都算是行動參與者；他連網絡廿三條都說不要緊，說自己小心點就好云云。他真的很搞笑，常常說「個人責任」，說要個人迎合社會。我真的不太懂我這位好哥哥在想甚麼。