【高登英雄世紀】Golden Heroes Universe　: 第八話 (四)

第八話（四）
角色：輝葉、？、？？


我係一個警察，雖然我知道我既工作不被重視，但我堅信我現在做既事係維護正義，為更美好既香港作出貢獻。


噚日夜晚，我本來被委派調查曾鈺誠被謀殺案，但唔知咩原因，上頭停止咗我地既工作，由其他人接手。






我被調派到去調查另一宗案件，係不同既地鐵站都接到報案指見到巨型怪物，我唔相信呢個世界有任何怪物，我只係相信呢個世界有異人同亂用異能既人。


根據手上既資料，目睹怪物既人總共有十五個，佢地全部都係地鐵職員。我知道同一時間十五個人講同一個大話既機率係低於係賽馬日連續中兩次頭馬，即使情況有幾迷離，搵出真相就係我既工作。


係報告上面寫咗香港地鐵站既維修工人對怪物既描述，怪物全身白色，大約有兩米半既高度，而且身後有五條尾巴。當怪物見到人類就會立即逃離現場，幾乎無任何人見到佢多於兩秒。


係迷幻藥？還是地區起咗變化令人產生幻覺？如果真係一隻體型比人類大兩倍既怪物，佢好難突然出現然後又完全無晒蹤影。我更加唔相信地鐵站既閉路電視完全錄影唔到佢地口中所講既怪物。佢地當中一定有人講大話，一定有利益係當中。





此時，輝葉右手突然抖震得非常厲害，似超高速般左右搖動

「　又係咁，自從嗰次之後，我既身體好似唔受自己控制，身體活動既速度快過我既思想，感覺就好似靈魂深處有野好急速咁控制緊我．．．」


「　呃！」


輝葉用抖動既手一拳打向香港站的某月台的牆壁，途人都報以奇怪目光望着他。






「　我要專心，要好似劍道中所講　－　人、氣　一體，以靜制動。我要觀自己既氣，睇自己既心。」然後，輝葉用貼在牆壁既拳頭撐起自己身體，繼續前往月台的另一面。


「　啊，阿ｓｉｒ，我就係當日當值同事既組長，嗰位同事雖然為人有啲口花，但我相信佢絕對唔係為咗呃工傷而講出呢個大話，你知啦，要工傷都有其他藉口啦，唔需要咁大陣仗，不過講開又講，都真係幾多同事因為見到怪物而放緊工傷假．．．」


無錯，應該從利益方向埋手，只要有一個人成功呃到工傷，其他人就跟隨，所以就一個接一個咁話見到怪物，一定係！


我緊隨地鐵站維修組既組長落去中環站無人使人既月台，嗰度就係其中一個目擊怪物既現場。


「　嗱，阿ｓｉｒ，嗰度就係我同事發現怪物個地方既入口，不過呢，你知啦，呢排咁多怪事發生，又話神秘人襲擊六警，又話議員被謀殺，噚日仲話有大爆炸添，我都係留係度等你，你入去盡情睇睇啦，我好識做既。」維修組組長只懂傻笑掩飾佢既恐懼。






世界上真係好多蠢人，因為一啲其他人既幻想令到自己恐懼，我唔會怪佢地，但呢一種人將永遠都唔會成功。

我獨個走進去月台既隧道。我一直向前走，因為當時環境異常黑暗，我手上只有一枝電筒，視線非常狹窄，我需要更加小心。


呢個情景令我諗起細個既時侯，我同細佬貪玩走咗入河流旁既下水道通道，但忽然之間落起大雨，天氣係一小時之內變黑色暴雨。但係我同細佬已經係下水道入面盪失路。突然之間，我個心跳停止咗數秒，但我既思想仍然清晰。心跳停止既數秒，我感受到前所未見既危機係我背後出現，當我回過神，我就知道背後將會有水漲，點知，當時既預感完全正確，而我既預感亦都救咗我同細佬一命。


仲有數百米就係呢個維修站既盡頭，我停止前行，因為我又再次有心跳停步既感覺。


唔可以，即使有任何危險感覺，都唔會阻止到我要查出真相既信念！






我一直向前奔跑，我要走到真相既盡頭。誰知，真相出現係我面前既時侯，我想起人生裏最大既遺憾。


「　對唔住，小六，哥哥咁多年嚟都盡力想同你團聚，但今可能搵搵返你之前，我日我要行先一步．．．」


係我面前出現既係一隻發着微光，身型極大既狐狸，佢雙眼看着我，動也不動。


第八話（四）完