【高登英雄世紀】Golden Heroes Universe　: 第八話 (三)

第八話（三）
角色：瓦爾基里Valkyrie，？？，？


人生就是要經歷死亡，你才知道為什麼要生存。


我從小就生活於一個幸福既家庭，父母都好錫我。我曾經認為我係世界上最幸運嘅女孩。






但現實世界總係會妒忌你嘅幸福，好似要一刀一刀咁割去你嘅快樂，當割到你體無完膚，又會送你一個希望，等你追隨你嘅目標而生存落去。


當我仍然係十五歲嘅少女，一個晚上改變了我一切幸福嘅生活。


我父親係一個商人，佢嘅公司係負責入口俄羅斯嘅金屬再轉口到其他地方。公司規模非常大，而且因為爸爸嘅智慧，所有員工都非常願意追隨佢工作。如果唔係嗰次事件，大家都睇到公司可發展嘅將來。


因為工事嘅關係，我地一家人經常需要同俄羅斯人聯宜。坦白講，我對佢地無咩好感。從佢地嘅眼神我可以睇到佢地嘅野心，想佔盡一切利益嘅野心。






嗰個晚上，我係屋企嘅大宅入面，當時我正閱讀北歐神話入面嘅女武神 Valkyrie - 瓦爾基里。而父母就係下層享受緊佢地夫妻嘅甜蜜。我父親好疼錫我母親，佢總係會做好多浪漫嘅事去令我母親開心。


佢放低手頭上嘅工作，正在同母親一齊研究甜品食譜。


突然，我聽到玻璃爆破既聲音，我聽到地下大廳位置數塊玻璃被人敲破。有一班說俄羅斯語既人闖入我屋。雖然從對話當中我聽到父親同佢地唔認識，但憑我多年被迫同俄羅斯人聯宜，我好肯定闖入既人當時就係講俄羅斯語。






我聽到父親希望同佢地談判，但俄羅斯人語氣越嚟越兇惡，呢個時侯我已經打電話去報案中心。

數下機關槍既聲音，我再聽唔到父親既說話。只係聽到零聲母親既涰泣。


然後，有一個沉重既腳步聲由大廳慢慢走上二樓，係無辦法既情況下，我只好躲係衣櫃。


腳步聲越嚟越近，我蓋住自己既鼻，盡量保持接近無聲既呼吸。腳步聲越來越接近，佢將二樓房門逐一打開，由客房到廁所，直至我既房間。佢打開每一間房門時，都聽得出佢會花時間仔細搜查，我知道若果佢嚟到我既睡房，佢必定可以搜尋到我躲在衣櫃。


腳步聲非常接近，我聽到睡房門被打開，佢仔細搜查我既房間，由電腦枱，睡床，化妝枱，最後走到衣櫃面前。雖然咁做根本毫無意義，但我仍然用力拉實櫃門，希望用最後一點力氣拼搏。






我聽到佢雙手已經放係櫃門上，正當佢準備將門拉開，我聽到有另一個人闖入大廳，


樓下傳嚟另一個俄羅斯人既呼叫，以我認識有限既俄羅斯語，我勉強聽到呢個人呼叫No. Four。係衣櫃門前既人立即跑回去大廳，但佢唔知用咗咩法術一下子將我既睡床燃起火焰。


佢走過既每一間房都被燃起，就好似無需要助燃物，物件就自然起火。


睡床已經被雄雄烈火燒起，正確嚟講，應該係整棟別墅都被燃點起嚟。我最終抵受唔住濃煙，離開咗衣櫃。但火已經燒得十分劇烈，我幾乎認唔出我既屋企。


我頭頂上既書架亦同樣受唔住熱力，整個倒下，當時我唔察覺，書架一下衝擊撞在我後腦上，我頓時眼前一黑仆係地上，但仍然有知覺。我發覺我既眼前唔係一黑咁簡單，而係我失去咗視覺，完全睇唔到野。但我唔想死，我仲有好多夢想要去實現，我應承過父母要入香港大學，要成為佢地既師妹，我仲要搵到我人生中最愛既人，兩個人心靈全無距離咁渡過下半生。






我用僅餘既力、觸覺同聽覺爬起身，繼續走向地下。當我走到大廳，我已經聽唔到人聲，只係聽到周圍既環境都被火燃燒既聲音。我開始失去方向，無論我走去邊，前面仍然係火焰，好似闖進咗地獄一樣。

我唔得喇，我唔夠氧氣，身體都開始無力。


係呢個時侯，嗰個人出現，佢一手將我抱起，我感覺到佢係一個年青人。雖然我睇唔到，但我感覺到呢個人將附近既火焰用冰凍既物質弄熄。佢將毛巾蓋係我面上，一下子毛巾亦變成冰凍，但我開始呼吸唔到，開始失去知覺，呢個時侯，嗰個人割開佢既手腕，將血流入我口，我漆黑既視覺突變得敏銳，雖然睇唔到外間環境，但視覺上出現咗好多重幻覺，而這些幻覺將我從休克既狀態救回來。


我想，這可能是奧丁捨不得我這女子就這樣死去，派佢既兒子嚟打救我。


係混亂既情況下，環境一百八十度改變，由灼熱而滿怖濃煙既空間，變成空曠既高空。


我睇唔到剛才發生既一切，但肯定既係，係我身邊既係一位英雄。






嗰個晚上，我一直係呢位英雄既身邊，因為無咗屋企，我邊度都去唔到。我們二人坐係一個高空，好似係大廈天台既位置渡過整個晚上。


直至第二朝早，生命好似完全改變，我以往住既整棟別墅被燒成灰燼，警方唔單止無話我知搵到我父母既好消息，反而話我知，我爸爸係一個月前已經將公司股份全部轉讓，有律師證明，而佢所有既家庭資產包括剛才被燒毀既別墅都已經唔屬於佢。呢一刻我連去醫院檢查既費用都無。


我唔想相信佢講既任何說話，因為我眼睛睇唔到事實，我唔會接受呢種命運。


當時我不知所措，無咗屋企，我唔知我可以去邊，無咗父親，無人教我以後要點做。我走到去後巷痛哭。


「　人生既路一向都係由你自己去走，每一個陪你走過既人都只係過客，佢地離開，你只可以感激佢地。但呢刻開始，你要成為你生命既主人。　」






昨晚救走我既神秘人忽然出現，我想佢應該一直係我附近看着我。


我既視覺變得好奇怪，好似若隱若現，但又唔係真的睇到現實情況。我只係模糊咁見到一個黑色衫既影子。佢放下一個紙袋，最後我知道入面有一條鎖匙，一個地址同一堆現金。


當我想走過去捉緊佢既時侯，佢又離我越遠。最終，嗰次成為咗我地最後既會面。


慢慢我就係嗰個人既地址上生活落去，我無令我既父母失望，考入去香港大學。五年後既今日，我亦都如嗰個人講「有自己既生命」。然而，我既視覺係嗰次事件後已經（完全）康復。但我得到一啲好有趣既東西，我可以控制先前失去視覺時見到既幻覺。其實講清楚啲，嗰個唔係幻覺，係一個新既視覺空間，我可以將我接觸過既物件收藏係呢個空間裏面，當我打開呢個視覺，就可以隨意召喚出我收藏咗既東西。

但遺憾既係，我一直都找不到當時救我嗰個人。


我既生命已經重回正軌，直至上星期，我收到一張相片，相片裏見到當時仲穿着睡衣既我，而背後就坐着一個看不到臉孔，着黑衫既人。呢個係我第一次咁清楚望到嗰個人既身影。


相片後面寫着一個時間，一班列車，我知道這想法好荒謬，但即使有少許機會，我都盡力去搵到佢。


最終，我上到列車到了中環站。



第八話（三）完