【高登英雄世紀】Golden Heroes Universe　: 第七話 (二)

第七話（二）
角色：Devil INDIGO


如果要做一個英雄，我一定要做到轟轟烈烈,，成為最觸目既一個。

我就係藍魔　－　The Devil INDIGO。


https://www.youtube.com/watch?v=uCg2BoKiuOM






一個身穿藍色緊身衫既蒙面人，突然出現係國際金融中心既大廈外牆，佢用藍色噴漆噴出以下字句：


「　我是你們的英雄，The Devil INDIGO！」


每個字大約五米乘五米既大小，當佢每噴完一個字，就立即變成一團煙，然後在另一位置出現繼續噴字，地上既警察亦無動於衷，最終整棟國際金融中心較上既外牆都被噴到充滿藍色既字句。






佢最後用更大既字型噴上：


「祝　藍詩儀　生日快樂！ 」


我就係藍魔　－　The Devil INDIGO。雖然我擁有穿越空間既能力，但係我唔會去銀行偷錢，呢個係我做英雄既原則。






藍詩儀係我既家姐，亦係我唯一既親人，佢對超級英雄非常着迷，由２００８年開始，每一套英雄電影佢都會買優先場第一時間去睇。而且佢仲特登飛去美國Comic con　同 Robert Downey Jr. 影相。其實都唔算係咩合照，只係距離比較近既位置度比相機攝咗一下，因為比佢更着迷漫畫既人大有人在，同巨星影相己經唔輪到佢。


家姐對近期香港出現真實英雄既事件非常着迷，雖然有好多唔同既傳聞話有好多英雄嚟咗香港，但出名既就只有係ＹＯＵＴＵＢＥ被拍到無數影片既　「死靈」。


雖然憑佢既動作，我都可以估計到死靈除低面具後都會係一個瀟灑既人，但係完全見唔到樣貌既情況下，家姐對一個人如此着迷真係令我妒忌。因為事實上，我都可以成為一個比死靈更有魅力，更多Fans既英雄。


我要第一次係傳媒面前出現就成為最觸目既一個！我要成為高登每月之星！


所以我特登揀咗家姐生日既日子，成為一個英雄去為佢祝福，呢個係我可以做既最大付出。






完成咗國金既噴畫，我諗我而家已經成為網上紅人，不過我仲未滿足，我要做盡一切警察都做唔到既功夫，我要建設一個最潔淨既香港。


第一個最容易遇到罪惡既地方就係旺角，目的地只有一個　－　砵蘭街。


「　壞事做盡既人，我今日係嚟警惡懲奸，你地醒目既就盡快釋放所有良家婦女，唔係既唔好怪我唔客氣！」我走入去砵蘭街其中一間叫做開心指壓既色情場所，入面既燈光令我好不安，但係做正義既事，英雄係唔會咁容易被騷擾到！


但奇怪，作為一個英雄，當我大聲宣言之後，在場既紋身漢同女士完全無反應。

「　細路，呢度無良家婦女喎，你要叫雞既就入房等，玩ｃｏｓｐｌａｙ就去隔離ｃａｆｅ，唔好阻住搵食，唔係我對你唔客氣呀！」坐係櫃枱既紋身漢好似對於我既出現完全唔驚。


我再望望周圍女士既外貌，確實無一個似良家婦女．．．






我唯有灰心咁離開。


一個人可以有唔同既目的，但係一個英雄既目的就只有一個，就係維護正義。我相信現實既英雄會好似電影入面一樣，努力提升自己，打敗自己既敵人。因為我地每個人都明白，能力越大，責任越大。


身穿藍色既英雄衫，係旺角夜晚既街頭會非常觸目。係街上面，周圍既人認得我，有少女走過嚟要同我合照，呢一刻，我認為我已經超越咗Ｒｏｂｅｒｔ　Ｄｏｗｎｅｙ　Ｊｒ．


當圍觀我既人越嚟越多，我就係佢地面前表演我既能力，係群眾上面不斷咁變成煙霧，然後又再出現係大家既面前。


「噢，弊了，警察嚟喇！」雖然我同警察一樣都係維護正義，但始終都係身份有別，我需要暫時迴避一下。






一瞬間，我又再次化成煙霧，不過今次我轉移去一個更遠既地方。但因為頭先情緒太過興奮，異能有點失靈。


「　我究竟去咗邊度．．．　」


第七話（二）完