我的臥底日記: 第五節
今日係2012.5.23
亦係我做咗臥底第9個月..
雖然我而家人工有雙糧,
又可以袋黑社會搵返嚟份收入3成錢..
但我依然未儲到首期買樓.
我依然係眾多香港人眼中嘅失敗人..
可能你哋會問..有份雙糧..有黑社會嘅收入…應該搵唔少..
但事實剛剛相反..
因為我為咗要收到更多風..
我要不斷出席各式各樣飯局..酒局..
有時為面子..仲要我請埋d契弟飲酒..就算無錢都要局請..
因為做得我哋哩行..一定要充大頭鬼..唔可以俾人知你撈唔掂…
所以幾窮都要同人爭埋單…
如果俾人知你撈唔掂..
你係黑道工作更加愈嚟愈少工作..更加愈少人搵..
亦因為充大頭關係..而家我黑社會個份收入..差唔到月月清…
有時仲要洗埋本身警察份糧..
唉..講到哩到..我都好灰..
錢又搵唔到..自己又無身份…!
有時都唔知自己係咪仲係差人…
而家..身邊朋友全部都係黑道中人..大多數都係好人.…
有d朋友真係會幫你..份人又講義氣…
有時佢知我唔夠錢會借錢俾你..
見你撈唔掂,佢哋會介紹D工俾你..
其實我自己都有私心..有時你都唔忍心報料俾苗sir拉佢檔嘢..
仲有…我而家成日見到d差人..
就算身無屎都潛意識都避開d差人..
唉..我都唔知復職個日..我自己習唔習慣到..
唉..究竟我攪咩..錢又搵唔到..又攪到我而家人唔似人..鬼唔似鬼..
其實今日除咗..係我做臥底9個月嘅日子..
仲有今年係我一年一度..
我約返前度-YOYO..見面嘅日子…
講返yoyo先..
yoyo佢係我分咗手十年嘅女朋友…
大家分咗手之後..大家都承諾大家係每年嘅5.20見面..
我哋亦都維持咗哩個”習俗”都十年了..
我哋每次約會…話題都係講返大家近況..講吓大家最近點…
基本上個一日大家都會坦坦白白..感情事..屋企人..工作..就算自己連屋企隻寵物
..都會攤出嚟講..
或者就係坦坦白白..大家可以係哩一日可以釋放下一下自己..
又或者咁講…每年嘅5.23算係我同佢心靈慰藉嘅日子…算係我同佢互相總結一下大家哩一年嘅得與失.….
唉…但今年真係好唔同…
我今日問咗自己好多問題…
而家我係一個臥底…究竟我仲好唔好出席哩次約會?
而家我係一個臥底…究竟我仲面唔面對到佢?
而家我係一個臥底…究竟我仲可唔可以對佢坦坦白白?
但其實我心中都已經俾咗個答案自己..
你叫我對佢唔坦白?我真係做唔出…
你哋唔好問我點解…或者哩十年裡面我仲鐘意佢掛..
又或者唔想失去咗個朋友掛…又或者我就係個種人
“以朋友的名義..愛著一個人”
其實我係有諗過今年唔出現..
但佢電話同我講話有重要嘢宣佈…
咁我對住佢..我永遠都唔識拒絕..最後我都應承咗出席..
唉..不過幾大就幾大..燒賣就燒賣…..去到先見步行步啦…
準時3點..我到咗同佢去開間CAFE…
一入去到門口..已經見佢搵咗位..等我嚟.…
我一坐低..就望到佢惹人憐愛嘅面孔..
我真係對唔到佢講大話..唉…
YOYO笑容滿面對我說: 「HI…最近點?」
我: 「我最近?咪又係之前個份工」
yoyo: 「之前個份工哩?你之前唔係話做考差人架咩」
下?咩我有同佢講過考差人咩..我自己都唔記得?
唉….我好想答佢..無呀..考到啦…仲好叻叻做埋臥底…
但奈何我唔可以咁答佢…
我作狀了一個失望表情說: 「無呀..考唔成..過唔到體能囉..」
yoyo:「唔去再考嘅?聽人講而家易考好多..而家好似體能取消咗引體上升..應該好易過架…再考啦…」
唔撚係掛..引體上升唔洗考?仆你個街呀..想當年我操引體上升操咗好耐架..
怪唔知而家新入行D差人體能咁撚差…
我: 「好啦好啦..聽你講我會去再考..」
由細到大都係..佢講每一句嘢..我都無法拒絕…
即係咁..如果..今日佢叫我唔好做臥底..我估我都會聽佢話唔做..
yoyo:: 「係哩..你仲係無拍拖?仲成日出去玩識女仔?」
我: 「無啦..無去玩啦..而家都唔細啦..諗住搵個女仔正正經經結婚算啦..」
yoyo嘟起個咀講:「係啦..正正經經啦..聽你咁講仲未搵到女朋友啦?」
我以笑遮醜:「哈哈…唔好講哩D啦..搵唔啱都無計..」
唔通我同你講…”無呀..我識/食好多女仔..但無一個好似你咁..會令我愛上佢”..
定係咁講”我仲未放低你..次次都搵d女仔同你比較..都係發現你仲好?”
唉…
yoyo:「快d搵返個啦..你都要成家立室架..」
d女仔就係鐘意講哩幾句…”成家立室”
咩女仔都係同我講哩D…
我: 「知道架啦..你唔係話有嘢同我講架咩?」
yoyo: 「我要同我男朋友結婚啦!」
我: 「下?同個律師男朋友?」
yoyo「係呀..我都有人要啦..所以你都盡快搵返過啦..你得架!」
我搖搖頭講: 「得啦長氣..會搵架啦!」
雖然我一早知道會有哩一日..但我個心個時都依然痛一痛..
yoyo手指係個杯到打轉: 「努力d工作啦..你有份穩穩定定嘅工作..咁個女仔先有安全感..講真….如果想當初你..….哈..都係無嘢」
我:「哈哈..你知我貪玩架啦..無當初架啦…」
當初?無啦..無當初架啦…
我哩種無樓無事業嘅人..邊有可能俾到幸福佢呀..
yoyo: 「所以咪係囉..定性啦..唔好再錯過身邊d女仔..」
講到哩到..我個時個心真係好痛好痛....最唔想發生終於發生啦…
眼前哩個女仔終於結婚啦..我十年嘅單戀生活終於要完啦..
我有時諗..如果個陣時..我無做臥底…而係到當梗差..
我會唔會搶返佢?不過哩個世界邊有如果..
都係個句..我俾唔到幸福佢..同埋敵人太強大…
正常人都唔會因為筍盤..而簡我哩個廢物…
當日..我送咗佢上車之後..
我立即拎起IPOD播歌…諗住嚟治療我心中嘅傷痛..
唔知係個天玩我..定係咁啱得咁蹺..
ipod好諷刺咁播起..My Little airport首”RM1210”
「或者是過了今年
或者是過了明年
你說會與他結為夫妻
永遠不變
最好是今年
我說不要等明年
既然你已說好
從那天起我們不再見
然後我步入中年
然後我步入老年
我或已經忘記
有否到過你婚宴
而我不想忘記那天
我們遇見的那年
那年吃過幾多薯片
看了幾多套港產片？
知你們不會改變
你們計劃了多年
就趁這之前
我仍願繼續發展
然後我只會等你來電
不會給他發現
就算你為兒女改名
我都會給意見」
唉…. 一聽到首歌一詞一句..就覺得首歌係講梗我自己..
尤其係哩句…”而我不想忘記那天
我們遇見的那年 “
而我聽到哩一句..我就再止唔住眼中嘅淚水..
男人無錢做什麼都成不了..或者真係”男人唔可以窮”
男人無錢..就算想追自己鐘意嘅人都無勇氣..
或者就好似太宰治講嘅一樣…
「財盡緣絕。並非男人沒錢就會被女人甩掉，而是男人只要一沒錢，就會意志消沉，變得頹廢窩囊，最後就變得自暴自棄,連笑都沒有氣力」─太宰治《人間失格》