衝動性.行為: 第三十一節
在美麗花園上班只一段短時間便迎來翻天覆地的改變，說實話，心裡有點不是味兒。
我，駕駛著的是一艘航空武艦，還是下沉中的鐵達尼號？
「阿詹！你冇野呀？唔出聲嘅？」曾生不耐煩哋道。
「呀......無事，只係消息太過突然，一時間個腦轉唔切。」
曾生說：「下一步你要做嘅就係盡快安排補選委員，同時間上次開會講聘請顧問嘅工作都要同步進行，到時就搵佢哋拍板聘請顧問，再進行大維修招標。記住呀！講野小心啲，我哋管理公司嚮大維修裡面嘅角色只係負責協助，有咩事就等啲住客同法團自己鬼打鬼就得，明白未？」
「我明啦，曾生！我知點做，你放心！」
「咔察！」沒有一聲再見，聽筒傳來的是曾生清脆地掛斷電話的聲音。
我沒有太在意，腦裡縈繞的是法團成員辭職的原因。
他們是因為當晚的法團會議被住客質問，抵受不住壓力而辭職嗎？如果真的是這樣的話，他們未免太窩囊。如真的是這個原因的話，辭職對他們來說，可說是解脫。
Doris行進我的辦公室說：「詹生！施主席落咗黎搵你呀！」
「施主席？」我沒有多想，急步的行到管理處的接待處。
施主席買了一些西餅到來，並主動的分發給管理處內的同事。他臉帶笑容，盡量裝著自然的向其他同事說一直以來辛苦了各位，只是我看得出，他的笑容是強顏歡笑，心底裡是落泊的失落。
「施主席！」
「阿詹！我買咗啲西餅俾啲同事，你都過黎食呀！」
「唔駛啦.......你搵我有事？」
施主席尷尬的笑了一下：「有冇時間同我行下？有啲野我想同你傾傾。」
「好......」
離開管理處，與施主席行了屋苑的多個位置，所到之處，他也細說曾經自己處理過的屋苑事件，也告訴我將來有什麼要我留意的事，感覺像交代身後事般讓人沈重，氣氛讓人窒息。
施主席行到了會所的戶外泳池，停下腳步道：「阿詹，你知唔知呢個泳池曾經浸死過人呀？」
「我唔知......但件事應該處理得好好，至少行內我哋冇人知道發生過件咁嘅事。」
施主席轉身又指著屋苑的車路出入口說：「呢度幾年前亦都曾經發生過交通意外，所以你見到車路入口置加咗路拱，希望可以減低車快速。」
聽到這裡，我按捺不住問：「施主席，你係咪辭職唔再做美麗花園嘅法團主席？」
施主席黯然的笑了一下：「估唔到咁快曾生就話咗俾你知我哋所有人一齊辭職，唔再做屋苑嘅法團成員。」
「點解咁突然？係咪因為之前開會俾其他住戶質問而嚇親？其實呢種情況真係好正常，我之前每次開法團會議，傾大維修同加管理費就必定有人出黎質問，所以你哋唔駛擔心，真係好正常，只要你哋同其他住客溝通多啲，佢哋一定會明㗎！」我嘗試遊說施主席打消辭職的念頭，雖然大家相識只一段短時間，可是我不想重新再認識一個人，重新再湊一個新的主席。
「唔明㗎！冇人會明我哋！我哋做咩都好，嚮住客嘅心裡面，我哋都只係一班衰人。」
「咁你信我呀！你哋搞咗成年都搞唔掂黑社會漏水嘅事，我啱啱搞掂咗啦！你應該要信我，信我嘅能力！我哋一齊搞好美麗花園！」
施主席搖搖頭，深呼吸了一下後，從褲袋裡拿出一張紙，並交到我手上。
我把紙張接過，發現原來是紅衣男所派發的宣傳單張。
看著手中的單張，施主席雙眼茫然，說不出的空洞，感覺就像一個人剛從醫生處聽到自己身患絕症的情況相似。
單張內的內容我曾經看過，內裡列出了各委員的住址、家庭成員、聯絡電話和工作哋點，簡單點說，就是自己的私隱已經赤裸裸哋，毫無保留哋公開予美麗花園的住戶。
施主席說：「而家搞成咁，我都已經再冇心做落去，我自問自己對屋苑盡心盡力，估唔到有人會誤解我，我哋真係冇貪污，真係冇！」
「嘅然你冇，咁點解唔做落去？你咁樣即係同人講你身有屎，咁咪正中下懷？」
「上次開完會，我哋都仲諗住撐落去，諗住同多啲住客傾計，佢哋會明白我哋，但係而家情況已經演變成我人生受到威脅，住址電話工作哋點，咩都俾晒人知，我在明，人哋在暗，我真係唔知下一步會搞成點，我唔想連累到我屋企人……」
「施主席……」
「唔好再講啦，我已經六十五歲，有時間我不如去湊孫，享下天倫之樂，你係叻仔黎，黑社會咁麻煩嘅事都搞得掂，我相信今次大維修嘅事你都一樣可以處理得好好。」
「我只係盡返我本份，施主席你太過獎啦。」
施主席捉著我的右手，這讓我有點尷尬，他說：「美麗花園就交俾你啦！我知道你一定可以幫到屋苑嘅居民，接落黎大維修嘅事你一定要好好跟進，知道嗎？」
「知道，放心交俾我啦！」
第一次被人倚賴，被人寄予厚望的感覺很特別。
我感受到施主席的不捨，亦感受到即使在臨別之時，施主席雖身不由己，卻想美麗花園的居民可以安居樂業。
作為神的使者，亦作為美麗花園的管業經理，美麗花園這艘航空武艦絕對不會被撃倒，會昂首闊然的前進下去。
與施主席道別後，我回到管理處處理餘下的工作。
阿健回報黑社會店舖內的清潔工作已經完成，而承辦商亦已經承諾今日下午進場，不分晝夜的進行維修工作，相信三日內必定可以將污水及去水渠更換好。
而接下來，最緊迫的工作便是盡快補選委員，成立新的業主立案法團去跟進大維修工作。