衝動性.行為: 第二十八節

與基哥的搏奕可說是輕鬆愉快。
 
一早已經預見這種賣毒品的垃圾黑社會，腦袋轉數也快不到那裡，只要略施小計，要他們叫我做契哥都仲得。
 
基哥還像哈巴狗一樣滿意的笑著。
 
「基哥，仲有冇野要我幫手㗎？」我問。
 
「嘻嘻，其實仲有一樣野想同你傾嘅，你都明白生意難做，我之前自己嚮天花度開咗個洞黎擺貨，我知道到時你哋上去嘅話一定會發現到，我想問個洞你唔封，俾我擺野咁得唔得？」
 




終於，基哥也開始露出了狐狸尾巴，從一開始他的態度轉變之快已讓我感到一點詫異，原來他最終目的，是想我隻眼開隻眼閉，讓他在天花上擺放毒品，即使被人巡查，亦不易被人發現。
 
「你啲貨係……」我明知故問。
 
「都係尿片呀，衛生用品嗰啲，冇特別野嘅。」
 
「咁……好啦！我諗問題唔大嘅，不過如果有咩事我要你清場，你一定要盡快同我處理好佢。」
 
「好！好！冇問題！咁我唔阻你做野啦，我去返間鋪跟埋啲手尾先！」
 




「好！」
 
基哥轉身變走，而我則軟癱了的坐著，危機解除，頓感全身無力。
 
事情發展出奇的順利，既可解決之前投訴的漏水事件，現在亦減退了將來與基哥他們的磨擦和衝突，想到這裡，不得已的再一次讚賞自己的聰明。
 
對！事情既然沒有彎轉，那麼我們便要靠自己再創出另一條道路，創出只屬於詹瑞仁的道路。
 
在我還在沈迷於自己的表現時，Doris卻緊張的跑入我房問：「詹生！你同班黑社會講咩呀？佢哋有冇恐嚇你呀？要唔要幫你報警呀？」
 




「恐嚇？冇，我都係同基哥傾下計，冇咩特別。」
 
Doris敬佩的說著：「你好勁呀！之前個個經理都搞佢唔掂，你一黎到就搞得掂。」
 
我謙虛的回應：「其實我只係好運，好運到咁啱去水渠同污水渠同時爆，如果唔係基哥一樣唔會俾我哋開工，我哋都係做唔到野。」
 
「唔止咁，你同班黑社會嘈嘅時候真係好勇敢呀，我初頭以為你咁後生，一定做唔手掂，估唔到你咁英勇。」
 
「好啦！讚美我嘅說話講到差唔多啦，快啲做野啦！」我說。
 
剛才的一役，的確可以流傳萬世，我對同事對我的讚美當然感到高興，只是後續還有很多工作要做。
 
我立刻致電自己一直合作開的承辦商，要求他們於今日內盡快到場並日以繼夜地施工。其實，要維修和更換污水渠和去水渠並不困難，只要物料齊備，基本上兩日時間已經可以完成有關工程。
 
緊接，我把此好消息通報法團成員，並要求他們盡快以電郵回覆同意工程進行。他們對纏繞了接近一年的事件得到解決而非常高興，當然，讚美之聲又是不絕於耳。




 
正打算跟進屋苑的其他事項之際，只見保安主管阿才氣沖沖的走進來。
 
「咩事呀阿才，有緊要事搵我咩？」
 
「詹生，有麻煩事！吓！吓！」阿才上氣不接下氣的說著：「有兩個住客攞住一大叠宣傳單張放入其他客嘅信箱度，我哋阻止唔到佢，吓！吓！」阿才把單張遞給我看。
 
單張的內容為「法團成員好大喜功，私吞公款，與管理處私相授受」，而且單張內還印上了法團成員的相片和住宅哋址。
 
果真，他媽的一波未平，一波又起。