衝動性.行為: 第二十七節

黑社會反被我迫到了牆角，管理處又再一次取回了優勢。
 
基哥出奇哋冷靜，也許作為話事人的他亦開始感覺到，面對我聰明如此的詹瑞仁，靠嚇已經再不能再嚐任何甜頭。
 
基哥說：「好！我哋要整理一下鋪頭裡面嘅貨物，三十分鐘後你再安排同事過黎幫我哋跟進。」
 
「好呀！冇問題！」我示意阿健替我安排人手跟進。
 
基哥示意其他黑衣人先行離去，回到藥房執拾物品，他行到我的身邊說：「阿詹！我有野想同你傾一傾，唔知邊到方便呢？」
 




我二話不說：「咁入我房啦！」
 
「好！」
 
在氣氛稍為緩和的情況下，阿健和保安部同事回到自己的崗位工作，而黑衣人則在基哥的指示下和平散去。
 
阿才本想安排同事在門外守候，我著他取消有關安排，因怎算這裡也屬於自己地方，沒有「隨從」的基哥只是一隻沒有腳的雀仔，根本不足為患。
 
我很有信心，事情發展到如此哋步，要解決積存已久的去水渠滲漏問題，今日必定可以有個答案。
 




基哥隨便的找了個位置坐下。
 
我問：「基哥！有咩想同我傾？」
 
基哥笑了一下：「阿詹，你都好本事，咁後生就可以做到呢個屋苑嘅經理，不過你知唔知，嚮到做經理一啲都唔容易㗎？上一個經理想玩野，最後都俾我哋嚇走咗。」
 
我知道，基哥的說話在恐嚇我如果再與他們對著幹的話，我將會被他們騷擾。在策動昨晚行動計劃之前，我已經想過多個可能性和將會遇到的危機，可是我根本沒有退路。我要好好賺錢給母親作醫藥費，主任級的收入已不能支付昂貴的標靶藥物，再說，作為神的使者，我相信自己必定能夠完成使命，不會在此倒下。
 
「嚇走？哈哈哈哈！」我拿了一根香煙點起，徐徐抽著：「基哥，我知你哋係黑社會，不過香港係法治嘅哋方，我唔會驚你哋，我亦都認為你哋嚇我唔到。」
 




「年青人，你在明，我在暗，你以為你真係夠我玩咩？」基哥神情嚴肅的說著。
 
「我只係一個普通人，返工放工，我只係想做返自己嘅份內事，所以我唔會玩野，不過，如果有人想玩野嘅話，我都必定會奉陪！」
 
「好！好！有膽色！我欣賞你！之前嘅人見我惡少少，大聲兩句就怕到死，其實我個人一向都係講道理嘅，你試諗下，佢哋話換喉但要一個星期，你知道咁樣對我真係有好大影嚮，我藥房嘅生意咁好，冇咗嘅生意額邊個俾返我？我問上一個女經理點算，佢話冇得搞，仲要報警搵反黑組過黎搞我，我都係迫於無奈之下先至搵人嚇走佢！你要記住，我真係得個嚇字，我冇傷害到佢！」基哥委屈的說著。
 
我在他面前裝作點頭同意，心裡面卻對這種人十分不屑。
 
見我點頭同意，基哥神情稍為輕鬆了一點，他續說：「而家兩條渠都爆晒，我真係做唔到生意，損失好大，除咗搵工程部同埋清潔部黎幫手之外，下一步你哋諗住點做？」
 
從他的語氣我開始感覺到基哥已經放下身段，我開始覺得自己像一個馴獸師，用強權和高壓政策把基哥好好統治，或許，下一步只要再耍一點手段，我便能好好的把他馴服。
 
「下一步要做嘅就係搵承辦商過黎一次過視察再報價，之後睇返幾錢，如果太貴我哋要俾法團審批，審批完成之後就可以動工維修。」
 
基哥眉頭一皺，不解哋問：「咁……即係要幾耐？」




 
我故意耍基哥道：「承辦商過黎睇場要一日；跟公司程序報價至少要三份，需時三日；之後又要同承辦商做議價，要兩日；最後俾公司審批要三日；法團審批又要一日，做工程要預返三日，前前後後加埋你預返兩星期啦！」
 
被強制停止營業兩星期，基哥以吳若希的聲音道：「吓？真係㗎？阿詹！你真係要救救我，我唔可以停兩個星期㗎！好多人等住我開飯㗎！」
 
「基哥！呢個只係正常情序，不過以基哥你嘅面子……」我作狀的思考了一下：「三日！只要三日我就一定幫你搞掂，等你可以早啲開返間鋪！」
 
「好！非常好！哈哈！」基哥聽到由兩星期縮減成三日後，興奮得拍枱大叫：「阿詹！你敬我一尺，我敬你一丈，你呢個朋友我今次交梗㗎啦！以後有咩事，即管搵我，我一定同你諗掂佢！哈哈！」
 
終於，在我的馴服下，基哥已經變成了冇牙老虎。。