衝動性.行為: 第十三節

大部份業主會疑問，究竟管理公司在大維修內飾演什麼角色，又或者在已支付了管理費和經理人酬金的同時，作為業主應可以盡情地及毫無憐憫地去差遣管理公司處理所有維修項目內的事項。
 
大部份人有一個美麗的誤會，以為管理處內的工程部同事每一個也是「鐵甲萬能俠」，他們無所不能無所不曉，除了整飛機大炮之外，工程人員應該每一項維修工程也可應付自如，那管是更換水泵，防漏，煤氣及石油氣……
 
這是一般人對物業管理的謬誤，在有限度資源和只合乎最低工資聘請的技工下，更換水泵或維修電子通訊設備等工程事項，管理處一般會把工程外判以確保專業質素。
 
那其他業主又會問請技工駐院豈不是浪費人力資源？如果業主認為單位跳掣，漏水等事項可以等一至兩天報價維修跟進的話，我會同意這個說法。
 
在剛才那年長男住客提問有關管理公司為何不可兼任顧問之後，其他旁聽住戶無不起哄起來。
 




我說：「管理公司誠如其名，其主要職責主要係做屋苑管理，有關建築或大型維修等事項，管理公司一般係唔會參與，如果到時兼任維修顧問而令到管理質素下降，咁就即係顧此失彼，所以參考返其他屋苑，法團會聘請顧問做標書同監管工程，而管理公司就主要負責返屋苑管理。」
 
「咁如果我地相信你地管理公司，另外出錢請你地做顧問，而管理公司又另外派一隊人黎做野，咁咪唔會影響管理質素囉。」
 
「再一次多謝呢位住客既提問，亦多謝你對我地管理公司既支持，不過咁樣做管理公司響呢個情況下面又做唔到第三者既角色，而且最重要係我地公司對於大型建築工程冇相關經驗，所以我地今次係唔會擔任顧問既角色。」
 
其他旁聽住客聽罷我的講解後，也許明白到在正式公開聘請大維修顧問之前根本沒有多少討論的空間，而且現時亦未知道要付多少金額的大維修金，所以大部分人的情緒亦相對冷靜。
 
施主席此時行到旁聽住客的前方說：「各位住客，多謝你地今晚既出席，黎緊法團會就大維修事件公開聘請顧問，有關資訊我地會即時貼響大堂出入口俾大家查閱，我響到向大家保証所有事我地都會做到公平公開公正！今日既會議我宣佈正式結束，有咩意見亦都歡迎各位隨時聯絡我地，多謝大家！」
 




其他人聽罷紛紛離座回到自己平台大堂的通道。
 
「呼～」我不禁舒了一口氣。
 
對於第一次由自己主持的法團會議表現，我是感到滿意的，與我一直憧憬那不亢不卑的表現亦相距不遠，我不禁暗自的讚賞自己。
 
也許是剛經歷讓精神極度繃緊之事，在精神稍為放鬆的情況下，我感到一點暈眩。
 
「阿詹，今日表現唔錯！我地以後就靠晒你啦！」施主席行到我的面前說。
 




「客氣！客氣！我只係盡返自己本份，亦希望我既到職可以幫到屋苑。」我謙虛地回應著。
 
陳小姐說。「我都估唔到你咁年青，講野咁有大將之風，今日好在有你，我地之前真係未試過俾其他人質問，我地真係唔知點應對！」
 
接著，又是廖牧師和同行林先生的連番讚美，這讓我有點害羞。
 
一直以來，在住客希望以$10支出換來$100服務的屋苑裡，作為管理處的前線或後勤職員也好，我們被住客讚賞的機會並不多，因為住客找我們的原因永遠是要求協助和投訴，打從一開始，物業管理便是一個被人責罵和發洩的行業。
 
差不多接近凌晨時份，法團成員相繼離開，其他同事則忙著清理場地，希望盡快把場地還原。
 
在我正協助同事搬運物資期間，一位女士行到我的面前說：「詹經理，你好！我有啲問題想請教你。」
 
我立即抬頭，只見一個年青少婦一臉茫然的手推著嬰兒車，她外表看起來清秀甜美，即使已經生了一個小孩，可是也遮蓋不了身體散發出的青春氣息，她的皮膚白滑，感覺跟年青時的周慧敏有幾分相似。
 
我發現自己就像電影內的老土橋段一樣，身體「咔察」一聲的定了鏡一樣，呆立當場。




 
「詹經理！詹經理！你聽到我講野嗎？」她續問。
 
我魂魄稍定，回道：「聽到！聽到！我有咩可以幫到你？」
 
她憂心地道：「我姓謝架！想問如果我沒錢交大維修既費用咁點算？我…..我真係無錢……」
 
「……其實民政事務署會提供免息貸款，而佢既還款期最長可以去到60個月，稍後時間我地管理公司亦都會聯絡有關部門，要求佢地提供小冊子或派人到場講解貸款既安排。」
 
「咁而家大約知到要俾幾多錢未呀？」
 
「而家我真係答唔到你，因為我地仲未聘請到顧問，而且我地亦都未公開招標。」
 
「咁……我明白啦，唔該晒詹經理……」說完，她便轉身離開。
 




望著她的背影，我隱約感覺到她散發著一種黯然的失落和淡淡的憂傷。