[真人真事]那些年錯過的愛情: 中三４５
某一日放學，我同北仔去粗口啊伯打開果個籃球場打波
北仔：「啊傑，今日幫我練防守，你負責進攻得啦」
我：「OK,但係我打一陣就走架啦」
我同北仔打左幾場一打一後就坐低休息。休息果陣我就慣性睇一睇電話，竟然見到啊飛打左幾個電話比我，於是我立即回覆佢
我：「喂，打比我做咩呀？」
啊飛：「你肯聽電話啦咩？快Ｄ去我學校啦」
我：「我出左去街場打波喎，遲幾日搵你啦」
啊飛：「唔係搵我呀屌你！係你既好朋友藍藍係學校拗柴，我依家又要出去打友誼賽，你快Ｄ去接人地啦」佢邊笑邊講
我：「下...拗柴？咁我依家去搵佢啦」
知道思蓓拗左柴後我就立即離開球場搵佢，由於係呢個球場去佢學校要經過一段好長既路，所以去到佢學校果陣已經汗流浹背。當我經過一條斜路，我就係學校門口見到思蓓
我：「喂...咁唔小心呀...」
思蓓：「估唔到你真係黎左喎...我仲以為啊飛呃我」佢講完笑得好開心
我：「受左傷仲咁開心...你行唔行到路呀？」
思蓓：「有人接我咪開心囉...我依家緊係行唔到啦」
我：「咁...不如行返去市中心搭的士返屋企？」
思蓓：「揹我返屋企唔得咩？」佢以一個得意的樣子說著
「唔撚係掛，呢到行返你屋企差唔多要一個鐘」我心想
我：「咁呀...上黎啦！」雖然我心中不情願，但我還是紮了一個馬
思蓓：「你認真架’？係咪架？」佢笑著說
我：「上黎啦大小姐...慳下錢幾好呀」我笑著說
揹左思蓓後，我就開始行呢條漫漫長路。說實話，思蓓的體重根本不是問題，只是路人的眼光令我有點尷尬。我前面揹住思蓓的書包，後面背著思蓓。這好像引起很多人奇怪的目光。路上我打左個電話比北仔，吩咐佢幫我KEEP住個書包同校服恤衫就開始行返屋企。
思蓓：「哦...你岩岩打完波黎！唔怪得著住件黑色底衫周圍走啦！」
我：「打左一陣姐...黑色先型！」
思蓓：「車...係啦，你究竟夠唔夠力揹我架，我驚你中暑」佢笑著說
我：「太陽都落山啦...點會中暑。而且...」
思蓓：「而且Ｄ咩？？」
我：「而且...我揹你果陣有得摸下你隻腳抽下水，唔緊要啦」我笑著說
思蓓：「你個咸濕仔...你唔可以同人講！」佢聽到後也笑了
我：「得啦，我唔會同人講摸過你對美腿，一個兄弟都唔會講！」我大聲地說
思蓓：「細聲Ｄ呀羅子傑！」佢輕輕打我個頭
我：「得啦，仲有漫漫長路。不如搵Ｄ野傾啦」
思蓓：「你想傾Ｄ咩先...你問我野囉..」佢邊挨著我背後邊說
我：「咁...你仲記唔記得我地點識對方？」
思蓓：「記得...２４號仔...踩單車我叫你走開呀ma...果日係二十一號」佢笑著說
我：「痴線架...你連幾多號都記得！？你仲好記性過我」
思蓓：「我有講過我有寫日記...其實我記憶好差架，但我會記低晒Ｄ野」
我：「睇黎你記低左好多野」我隨口說出
思蓓：「記低「佢」既野比較多...」思蓓說佢字特別高音
我：「頂，唔係你新既心上人黎掛！？」我大聲地說
思蓓：「唉，無野啦！請你繼續向前行！」
我：「又收收埋埋...心淡...」
思蓓：「不如話你自己蠢...羅子傑...」佢邊笑邊說
我：「係啦，岩岩你話我地相識果日係二十一號...咁上次你係醫院比我老豆果個二十一號有咩意思？」我笑著說
思蓓：「你咁好記性架咩？仲記得我簡二十一號！？純粹...諗起我地係果日相識...」佢挨在我背後笑著說
我：「原來有特別意思架...？其實我記性自認天下第一，十年前係幼稚園讀左一年去左加拿大果個女仔我仲記得佢個名！」
思蓓：「緊係有啦！你講到尾...都係因為女！！」佢打我的背說著
我：「講笑姐蓓姐！不過係事實黎既」我自豪地說
思蓓：「哼..咁你簡果個３號又有Ｄ咩意思呢？」
我：「３號其實無咩特別意思...佢只係我最愛既球星著既一個號碼」我尷尬地說
思蓓：「原來係咁...我仲以為有咩野特別」佢失望地說
我：「喂，你唔係唔開心掛？」
思蓓：「你痴線架咩...無啦啦話人唔開心...」
我：「我見我講完３號無咩野特別後，你又好似有小小失望，我咪問下你囉」
思蓓：「你揹住我都睇到？你一定識讀心術」佢笑著說
行緊返屋企途中，我見大家有時無咩野講就諗到個方法引佢笑
我：「喂，有無睇過火影？」我向思蓓問著
思蓓：「你問黎係咪多餘...緊係睇過」
我：「你知唔知火影入面Ｄ人點樣跑？」
思蓓：「知呀，你又想點？」佢邊笑邊說
聽到思蓓咁講，我就模仿住火影入面既跑步方式揹住佢跑起黎。
我：「喂，似唔似？似唔似姐？」我邊跑邊問
思蓓：「頂...你條友真係傻架喎...」佢笑著說
最後，去到一個巴士站果陣，我地兩個就坐左係到休息一陣
我：「好累呀....比我坐十分鐘」
思蓓：「你唔累就假啦...揹住我咁重...你仲KAI到扮咩火影」佢笑著說
我：「你有所不知啦...我係好朋友面前先會ON9起黎」我傻笑著說
思蓓：「好朋友...抹下你Ｄ汗先啦」佢遞左包紙巾比我
接過紙巾後我就睇一睇電話，發覺時間不早後，休息左幾分鐘便叫思蓓起行
我：「喂，行啦。 差唔多天黑」我企起身說
思蓓：「好眼訓呀...坐多陣先啦...」
「屌，我熱到條校褲濕撚晒都未出聲」
我：「我揹你姐...快Ｄ返屋企訓教啦」我行去佢身邊伸出手
思蓓：「唉，好啦」
我過去扶住思蓓起身後就揹起左佢，唔知佢係咪真係好累，沿路上佢都無咩點出過聲。
我：「喂...訓左覺呀你，唔出聲既？」
思蓓：「哦...未呀，不過差Ｄ訓著」佢笑著說
我：「返到屋企你就沖個涼，聽朝去睇個醫生」
思蓓：「嗯...」佢挨在我背後說著
行左一陣之後我就諗到一個問題問佢
我：「係喎，你之前咪係巴士到話要習慣無左你之後既日子，咩意思呀？」我笑著問
過左十幾秒後，思蓓仍然挨左我身後沒有回答，我就知道佢訓著左。於是我就唔講野驚嘈住佢，靜靜地行返佢屋企。去到佢屋企門口之後，我就叫返佢起身，佢開左門之後就拎左Ｄ野去沖涼。我就坐左係佢個客廳休息一陣，順便係佢個雪櫃拎左Ｄ冰出黎準備一陣幫佢敷冰。當佢沖完後照顧左佢一陣，我就返屋企
思蓓：「今日...多謝你陪我顛...咁遠都行返黎」佢笑著說
我：「傻啦，你有事就打去我屋企啦。你今晚訓覺記住傷左果隻腳要搵野墊高佢」
思蓓：「得啦，唔送你啦今日」佢推我出門口
我：「好啦，你早Ｄ休息啦，拜」