[真人真事]那些年錯過的愛情: 中三１４
夜晚十點，我踩左家姐架單車上去佢路口個天橋等佢。到左之後望一望電話，原來我早到左五分鐘。我就企係天橋上面等。等到十點，終於見到佢踩住架單車黎。原來思蓓係一個準時既人。佢推住架車行黎果陣，我就同佢講
我：「點呀..加埋贏左幾多站呀..？」我模仿陳冠希既語氣
思蓓：「你睇戲睇上腦呀...又頭文字Ｄ...」佢笑左一笑
我：「叫我出黎做咩呀...食風？」
思蓓：「陪你過生日姐...仲有兩個鐘，傾下計啦」
大家傾大家既學校話題，佢好似對我學校既人同事都好有興趣。於是我就講我堂上有咩玩，今年學生會選舉，足球隊省尻人，中一Ｄ柒野比佢聽。
思蓓：「你上堂會睇書！？睇漫畫？」
我：「穿越時空果Ｄ囉...個類小說故事最好睇」
思蓓：「咁...如果你有得回到過去，你會唔會選擇唔想識我？」佢望住我問
我：「唔想囉...因為一識你就搶左我個十蚊心心」我講笑咁講
思蓓：「你咁架...你個綠色十蚊心心我仲留左係到..無用過架」
我：「下！？你講真？」我以為佢拎左黎買野食
思蓓聽到我咁講，就係佢銀包入面拎左呢個綠色心心出黎。我望住呢個心心，的確係我當初比佢拎走果個黎。
我：「做咩留黎做紀念？係咪摺得好靚呢？」我講笑著說
思蓓：「靚啦靚啦...係啦有Ｄ野比你，伸隻手出黎」
我伸左隻手出黎之後，佢就係袋入面拎左條黑色手鏈出黎，再幫我用手鏈既兩邊扣扣住我隻手。
思蓓：「點呀？靚唔靚呀！？」佢好開心咁講
我：「生日禮物？！貴唔貴架！！」
思蓓：「傻啦，你鍾意就得」佢笑住應我
我：「好靚...多謝思蓓」我怕怕地羞咁講
思蓓：「呢條鏈質地防水架！你打波沖涼都唔洗除，帶住一定有好運架！」
我：「哈...咁我永遠都唔除架啦」
思蓓：「講得出做得到呀你」
傾多一陣計之後，思蓓就望一望手上既電子錶同我講
思蓓：「仲有一分鐘就係十二點。姐係羅子傑既生日，最後十秒你要一齊數出聲架」
我：「咁婆媽架你...生日姐...」
思蓓：「41.40.39.38.37...」
數到最後十秒，思蓓就篤我條腰叫我一齊數出聲。我比佢逼之下就跟住佢為自己生日倒數
我＆思蓓：「6..5..4..3..2..1..」
思蓓：「十二點啦！羅子傑生日快樂！」佢係天橋上對馬路叫著
我：「夜晚唔好叫啦...」我望向佢講
當我望向佢果陣，佢無啦啦攬埋黎我到。雙手攬住我條腰，係我耳邊細細聲講左生日快樂就鍚左落我個咀到。我伸手攬著思蓓，但我口上沒有配合她的吻。十秒過後，我更用雙手細細力推開佢，捉住佢膊頭望住佢。
思蓓：「...羅子傑...做咩...」佢雙手攬著我腰說
當思蓓親吻我後，第一個反應係驚訝，然後就係開心。當我想回敬返佢個陣。我
突然間腦海諗起一個人，令我慢慢推開思蓓。呢個人就係啊靜。
小六個陣啊靜錫左我塊面後，我以為佢對我有感覺，我地可以有機會一齊。但最後原來只係我一廂情願。當我去啊靜學校門口等佢，見到啊志拖住佢走。由個一刻起，我就對自己冇信心，更對愛情失去信心。即使愛上別人我都係收收埋埋，冇表達出自己既心意。
當思蓓錫落我個咀到，我好驚訝又好開心。頭一兩秒更唔識反應。無可否認，唔知由幾時開始我心中對思蓓已經有了感覺，已經超越左朋友同好兄弟既界線。呢一吻後，我更害怕佢係下一個啊靜。
而且我仲未清楚，未清楚我愛的是啊希還是思蓓。我認，我係對愛情無自信無信心既人。我更加係一個愛情白痴，唔係點會比你地叫佛祖。
我慢慢推開思蓓後，雙手捉住佢膊頭望住佢，佢仍然攬住我腰。大家對望左一陣後，思蓓就開口
思蓓： 「你係咪...唔鍾意我？」佢雙眼有淚光
我： 「...」見到佢想喊我更加不知所措
思蓓： 「唔出聲...姐係拒絕左我...？」
我： 「思蓓...我..」
思蓓： 「...我只係...想話比你知我既心意..我鍾意左你...」
我： 「...我..」見到佢雙眼紅晒咁講出口，佢個樣令我講唔出口又想喊，可能我天生係一個感性既人吧。我第一次明白咩叫做有口難言
思蓓： 「明架啦...唔洗話比我知你既答案..我唔想聽到你親口同我講你唔鍾意我...拒絕我..生日快樂..我走先」佢講完就推住架單車準備離開。
我： 「思蓓...喂思蓓」我係後面叫著她
思蓓聽到我叫佢，反而推住架單車行得更加快。當佢行左幾步，我就跑上去企係佢面前
思蓓： 「做咩呀...」佢以沙啞的聲線同我講
我： 「思蓓...我冇話要拒絕你呀..」我雙手捉住佢膊頭講
佢停左架車望住我，大家對望住無出過聲，但係我已經諗好點同佢講，只不過我唔夠膽。
思蓓：「咁依家姐係點..」佢撥開我雙手
我：「其實...不如比多Ｄ時間大家...件事對我太突然...」我低著頭說
思蓓：「時間？係咪你唔想見到我傷心..唔想我太難過依家敷衍我呀！」
我：「唔係...我覺得我地好似未夠了解大家..」
思蓓：「真係咁簡單？就係咁！？」
我：「係...不如比時間大家諗清楚啦...我唔想太馬馬虎虎就同你拍拖..呢個係我第一次黎架喎...」
思蓓：「姐係...你對我有感覺..!?」佢講果陣開始漸露笑容
我：「....有！但係你比Ｄ時間我諗清楚先，得唔得？」我吞吞吐吐講出呢句說話
思蓓聽到呢句說話後，面上露出一個好燦爛既笑容。最後佢仲笑左出聲。不過我就唔知道佢笑緊咩，笑笑下佢就攬住我，頭依偎係我胸口上
思蓓：「羅子傑你好蠢呀...好蠢好蠢..」
我：「你蠢Ｄ...」見到佢呢個舉動我呆左一呆
佢攬左我一陣，就抬頭望向我講
思蓓：「你真係無呃我！？...真係需要時間了解對方！？」
我：「我無呃你呀！！」我好大聲在天橋上說出
思蓓：「好..我比三個月你。三個月後係我生日，我想係我生日當日聽到你既答案..得唔得？」
我：「三個月...！？...好，我答應你」
思蓓：「我比三個月你...你唔好諗住拒絕我呀！」
我：「今日唔會呀...三個月後就唔知啦..」我傻笑住講
思蓓：「我都唔知你係咪認真...伸你隻手出黎！」佢扮嬲咁講
我伸左隻手出去後，佢就無啦啦咬落黎。咬左十幾秒先肯放手，我當然仲慘叫左十幾秒先得到解脫。
思蓓：「呢下係罰你...一開始唔答我！得我自問自答！」
我：「我點會估到你表白姐...」我禁住比佢咬完既位置講
思蓓：「好，我要你送我返屋企」佢講完扁住咀望住我
我：「得啦，一定送你..」我禁住隻手返去拎單車
我地兩個人一人踩住一架單車，慢慢踩住咁傾計。到左佢屋企之後我就送左佢入去。我踩返屋企期間，諗返岩岩同思蓓講既野，竟然自己無啦啦笑出黎。第一次有女仔錫我個咀，向我表白。今次佢真真正正清醒地攬住我，唔係好似當日醉左咁當左我係前度JOE。我踩返屋企諗返岩岩既情節，一邊踩一邊望住條手鏈傻笑。
其實，我諗我心中已經有了答案。只是，我不敢踏出第一步去愛。