[真人真事]那些年錯過的愛情: 中三１２
第二場學界比賽當日，咁岩係放學時間後係體育館打。呢間體育館係我地學校附近。令到好多自己學校既同學都有黎睇。望到呢個場面，我又諗返起上年甲組比賽既時候。
我到左體育館後，就同對面幾個球員握下手傾下計。今日敵隊球員入面有幾個係我街隊既隊友，我知佢地大部分主力既優點同缺點，本來我地正選好有優勢。但教練偏偏鬥氣唔出啊洪同啊格，反而換Ｄ二線後備做正選頂佢地兩個既位置。
「一陣正選，北仔,DAVID,啊傑,啊角,炎仔打住先」
我：「竟然換無經驗既北仔同唔識打全場既DAVID...」我向啊洪講
啊洪：「我諗佢唔會雪我同啊格咁耐既...你同啊角頂住先」
開場前五分鐘，場館門口有幾個人大大聲聲咁傾住計入黎。佢地有男有女，幾條友霸左一張長椅坐。我望向呢班人，入面竟然有人叫我
「啊傑，呢邊！」呢幾個人之中有個男向我揮手
原來揮手呢個人係啊飛。我提過我今日係佢學校附近有比賽之後，佢就帶左幾個人黎支持我。我向佢揮返手後，佢指向其中一個女仔。我望住佢指果個女仔，竟然係思蓓！見到佢無啦啦睇我打學界我都好愕然。佢向我做左一個拳頭手勢後，我就做返個拳頭手勢回應佢。呢個手勢對我地黎講是加油的意思
比賽開始左之後，我地因為有兩個新手在場，令到開場失分不少。對手雖然比我地弱，但防守比我地更積極。佢地防守得好之外，補位都好快。咁岩啊飛坐係我進攻個邊，佢就提一提我
啊飛：「啊傑！你冇空間射波，叫個１２號幫你擋！」１２號姐係北仔
「屌，係喎。局外人永遠都係清楚Ｄ」
對面射罰球果陣，我就叫左北仔同炎仔埋黎，講Ｄ戰術比佢聽。
我：「北仔你唔知點打全場唔緊要。一陣你見有人想傳波比我。你就企定定係三分線一兩步做擋，幫我擋住Ｄ人」
北仔：「企定先得？」
我：「係，你唔洗企落籃底架啦。企上中距離。你企係到擋我就有位射波。炎仔就會傳比我」
炎仔：「OK，可以試下咁打」
北仔：「嗯...明架啦，加油」
當時打左一節半，但不知不覺已經落後九分。今場輸左就係分組賽出局，所以兩隊都打得好拼命。北仔雖然無咩經驗，但係跟指命做野又幾好。北仔幫我擋同炎仔睇時機傳波比我之後，我就有空間射波，好快就入左兩球三分。對隊見我地追到只差三分就叫左個暫停，但佢地始終防唔到我地。雖然我地教練叫我地三個唔好咁打，但好明顯我同炎仔北仔都無聽佢講野。啊角知道我地三個做緊戰術果陣就專心幫我地搶籃板。半場完結前，我再入多兩球三分。上半場完結時，我總計已經入左四球三分了。此時我控制不了自己興奮的情緒，竟然在體育館大聲地叫起來。
「啊！！！贏呀！！！」
啊洪：「廢話！緊係啦！！」
教練：「好！KEEP住咁打啦。啊格同啊洪照樣唔出住」
教練講完之後，啊格就行埋黎拍一拍我
啊格：「你得既，頂住先」
我：「領先緊幾分，應該頂到」
啊格：「有位就射啦，唔洗驚唔入」
下半場開始左之後，對面就轉左人盯人戰術。面對住單對單嚴密防守，我地係接波方面就出現困難。對面防守我既仲係街隊入面最快既隊友－啊康。我諗盡方法拎到個波後，無啦啦又多左一個人黎守我。經隊友提醒下，原來我接波之後。本身防守DAVID既人就會走埋黎防守我，應該是害怕我今天精準的三分。比賽入面有兩個人守住自己，我都唔知係好事定壞事。
對面用左呢個防守戰術後好成功。我地由領先變成平手。再由平手變成落後。但係我地個教練仲係一成不變，依舊都係用死一套。直到最後五分鐘落後兩分，佢先換左啊格同啊洪出黎。但係佢地唔知係咪因為坐得太耐，佢地好似未熱身咁，打唔返平時既水準。雖然佢地有出場，但一切都太遲了。最後我地學校以一分落敗，我地同對面球員握個手之後就上左看台聽教練訓話。望住呢場本身贏硬既比賽就咁輸左，我愈黎愈唔鍾意不滿同憤怒。
由於我地分組賽有三場，依家既情況已經輸左兩場。換言之，我地就算下一場贏返都無機會出線。本身呢一年好有機會有頭八，呢個打擊對我地黎講太大。輸左之後，教練嬲到係到踢牆。我地就坐到咩都唔講，好明顯有幾個隊友已經喊緊。聽教練講完Ｄ廢話之後，我就自己一個快步行出體育館返屋企。心情唔好之下真係唔希望再有人煩我。但當我出到體育館門口，見到啊飛同思蓓係到等我。
當我出到體育館門口，見到啊飛同思蓓係到等我。我望左佢地一眼後，佢地兩個就走埋黎
啊飛：「唔好唔開心啦屌，請你食新地筒啦」
思蓓：「係囉你好勁架啦！一場五球三分！果然係２４號仔！」
見到兩個好朋友係門口等我出黎同我講鼓勵說話，心中有種莫名既感動
我：「你識鬼邊個係２４號咩...」我笑住同思蓓講
思蓓：「啊飛同我講左啦！笑返咪好囉！」
我：「我仲以為你地等我出黎笑我輸波...做咩咁好死？」
啊飛：「唔好咁諗我地...！行啦，請你食新地筒」佢捉住我一邊手臂
思蓓：「係囉！多謝啊飛！」思蓓捉埋我另一邊手臂
啊飛：「唉，見係你請埋你啦」
最後，我比啊飛同思蓓一左一右，一人捉住我一邊手臂拉走左我。啊飛係我好兄弟可以理解，但思蓓做咩肯捉住我隻手臂？我岩岩打完波成身汗，佢做咩肯捉住我隻手行？佢唔介意？行左一段路後，啊飛見我情緒好返小小就放左手。但係思蓓仍然捉住我隻手臂無放手，我望向佢好似唔係太在意咁，我又唔夠膽出聲問佢。於是，佢就係咁挽住我隻手臂行。去到Ｍ記，啊飛買左野出黎之後，我地三個就一齊食住等巴士。上到巴士之後，佢先肯放開手。
返到屋企之後，我情緒已經平復不少。我傷心失望果陣，有兩個好朋友企係我身邊支持我，扶返我企起身。輸左呢場波之後，我先發覺真係會有朋友關心我，鼓勵我。今日思蓓拖住我唔放手，係咪只係我覺得有問題？佢仍然當我係好朋友？好哥哥？今日之後，我先知道友情既可貴。