[真人真事]那些年錯過的愛情: 中二３２
藍藍：「多謝叔叔！我今晚屋企都無飯食，嘿嘿」
老豆：「喂傑仔，快Ｄ去招呼人啦」
我：「得啦，你去廳坐陣先啦」我向藍藍講
叫左佢坐係到之後，大家就係到睇電視傾計等食飯。煮飯果陣都係我老豆煮，啊媽就坐低同藍藍傾計
啊媽：「藍藍你依家搵到男朋友未呀？」
藍藍：「仲未呀，我想讀完書先拍拖」
「屌，你明明岩岩先分左手」我心中想著
啊媽：「你讀書成績OK？？」
藍藍：「一般昨，我自己同媽媽都想去外國讀書，應該下年先去」
啊媽：「出國讀書好呀，傑仔家姐都去左美國啦」
藍藍：「我想去英國呀...」
老豆：「食得啦！」佢拎住兩碟野行出黎
藍藍身為客人，竟然主動幫手拎野。身為主人家既我就坐到睇住電視，回覆啊希既SMS。自從拒絕左啊嘉之後，佢一日都有搵下我幾次，內容全部都係叫我應下佢之類。但係我只係扮唔到。睇左啊洪叫啊希做老婆後，我都唔想回覆啊希既訊息，佢搵我傾計我都係大多數以單字回應。我覺得，啊希已經唔係我所認識既啊希，佢好似有好多野都唔比我知咁。
食完飯先後，藍藍就話同我出去行下，佢同兩老道別後，我地就出左門口拎單車
藍藍：「出發啦！食糖水！」佢坐在後座說
我：「頂...我比完賽好累呀...車你返屋企就得」
藍藍：「得啦，我請你啦」
我：「要踩好遠喎？真係出？」
藍藍：「踩你就踩啦，都話我請你食！」佢係後面打我
我：「得啦得啦，坐穩啦」
去到糖水店門前，我同藍藍等左大約十分鍾就入到去。由於我第一次黎糖水鋪，唔知食咩之下就問藍藍有咩好介紹
我：「喂..有咩好食架？」
藍藍：「er...你想食咩呀？」
我：「我跟你啦，你想食咩我就食咩」
藍藍：「咁...我要個雪糕明珠啦，要朱古力味...你呢？」
我：「咁我都一樣」
藍藍：「唔得，你要曲奇啦，大家分開食」佢伸手叫服務員
「屌，咁你又問」
等野食期間，啊希係SMS問左我一個問題，令到我對住個電話呆左一下
啊希：「啊傑...你覺得我好Ｄ定啊嘉好Ｄ...」
我：「做咩咁問？一定係你啦」
啊希：「好彩你覺得係我好Ｄ姐...嘻」
坐係我對面既藍藍，又係呢個時候偷睇我訊息
藍藍：「邊個搵你？？」佢望住我手中既電話
我：「摺心心果個女仔囉...」
藍藍：「佢問你Ｄ咩...比我睇下」
我比左訊息藍藍睇後，佢拍住我膊頭講
藍藍：「你個樣仲咁差...係咪仲介意緊人地叫佢老婆？」
我：「唔介意就假...你鍾唔鍾意有女仔叫你男朋友做老公？」
藍藍無答到我，兩碗糖水到左後我地就開始食，我食左一啖就聽到佢既哭泣聲
藍藍：「我男朋友...就係比人搶走左...」
藍藍食野期間，無啦啦提起自己既男朋友。我估係我岩岩既說話刺激到佢，令到佢一時間傷心起黎。見佢有眼淚落下，我就拎起紙巾比佢
我：「係咪我講錯野...？」我遞張紙巾比佢
藍藍：「有日我睇我男朋友電話..佢訊息上面都有人叫佢做老公...後來質問佢先知佢一直一拖二...」佢哭著說
我：「對唔住...我估唔到會咁...」
藍藍：「唔緊要啦，我都唔會浪費時間傷心」佢突然又正常返
我：「係咪架...無野就好啦...有野記住同我講」
大家無講野靜左一陣之後，藍藍同我講
藍藍：「知唔知點解我會同你黎呢間野食？」
我：「唔開心想食甜野？？」
藍藍：「幾醒目呀，而且呢間野佢以前成日同我黎...我想試下撞返佢...」
我：「你根本就未放低人」
藍藍：「睇黎我地大家都係得把口，比意見人就叻..自己個Ｄ事就..哈」講到呢到佢又想喊
我：「...食野啦，今餐我請」
最後，我地食完後緊係見唔到佢男朋友出現。我地一邊傾計，一邊踩住單車返佢屋企。踩緊單車果陣佢問左我一個問題
藍藍：「你應左個女仔未？如果佢向你表白你會點？」佢在後座問
我：「未應...唔想同佢傾住...我唔知呀唉」
藍藍：「嗯...點都好多謝你今日陪我」佢突然捉住我條腰
我：「屌！捉返膊頭啦，摸Ｄ敏感位置！」我笑住咁講
藍藍：「下你驚架？」佢不斷禁我條腰
踩到返佢屋企之後，我拎返部滑板車就準備返屋企。藍藍係門口同我講
藍藍：「多謝你陪我...」
我：「做咩今日係咁多謝我？你唔開心做兄弟應該陪你架」我笑住講
藍藍：「啊傑，你暑假多Ｄ搵我得唔得？」
我：「當然得，等我返埋呢幾日學就搵你玩！」
藍藍：「得啦，你返屋企訓教啦」
我係藍藍屋企離開後，返屋企沖左個涼就訓左教。啊希問左我野後我無答佢，佢更加無問我做咩唔覆佢，可能，時間耐左，我同佢一早就無共同話題傾。可能，有一個同佢更投契既人陪佢傾計。可能，只係我一直自作多情。
第二日返到學校，因為接近放暑假，學校開始係食飯時間十二點放學。放左學無野做，又唔想返屋企，我就自己一個係學校到周圍行。當我行到去地下停車場旁邊既擺雜物地方，見到有兩個人企左係一張棄置左既梳化旁邊，一個係啊俊，一個係啊魚。我行過去果陣，見到佢地玩緊部人手足球機
我：「啊俊啊魚？你兩個識架咩？」我一邊行一邊講
啊魚：「啊傑！HI！」佢以一個笑容向我打招呼
啊俊：「啊傑？我同呢條友唔識架」佢一邊玩足球機一邊答
原來啊俊今日無帶鎖匙返唔到屋企，放左學又係自己一個周圍行，行行下就黎左張梳化到坐，仲見到部足球機擺左係到。自己一個又玩唔到兩邊，啊俊就大膽地叫左一個路過既師姐陪佢玩，呢個師姐又肯樂意奉陪－佢就係啊魚。
啊魚：「放學又唔想去溫書住，咪同呢個肥仔玩下囉」佢笑住同我講
啊俊：「串我囉...啊傑你係到就岩啦，不如出籃球場打波，我依家去借波」佢對住我講
我：「你出去先啦，我想同佢傾陣計先」我指住啊魚
啊俊聽到我講之後，自己就走左去籃球場打住先，我同啊魚就坐左係張梳化上面傾計
我：「做咩停車場隔離有張梳化比人坐既？」
啊魚：「張野係學生會嫁，買左張新就擺左係到等校工清理」
我：「係啦，你上次係咪有野未同我講？我話比你知分數果次呢」
啊魚：「係咩？唔記得啦...」佢笑住答我
我：「係啦，下年你係咪讀半年架昨？」
啊魚：「係呀，我地要考最後一屆會考...唉...唔知升唔升到中六呢...」
我：「好難升架咩？我唔想你走喎」我望住佢講
啊魚：「我都唔想離開呢間學校...唉」
我：「係咪全部人都會唔捨得？」
啊魚：「本身我想離開呢到架...但呢一年我係呢間學校過得好開心,,,」佢對我展露笑容