[真人真事]那些年錯過的愛情: 中二２３

過左兩個星期左右，就係啊希既生日，我提出過買份生日禮物比佢，但佢話我送左個心心比佢，唔洗再洗錢買多一份禮物。佢仲叫我生日當日既下午食飯時間要留比佢，佢話係學校會搞生日。 

　　呢兩個星期入面我都有同啊希傾計，佢好似無之前咁頹咁唔開心。但當我果日見到佢同啊洪傾得咁埋同好似好熟咁又會令我有小小唔開心。我同啊洪係籃球上既係好戰友又係場外好朋友，佢同啊希有咁既關係我又唔知點樣問佢好，於是我就暫時無理到呢件事。 

　　啊希生日當日，我真係咩都無準備到。照舊返學校訓到午飯時間就等啊金叫我起身，當我出到門口就比我見到啊MAY。 

啊MAY：「行啦！啊傑！」 
我：「下，又要做啦啦隊？陸運會完左啦喎」 
啊MAY：「去家政室拎蛋糕呀！」 
我：「蛋糕？啊希果個生日蛋糕？」 




啊MAY：「係呀仆街，做啊希隊友都唔醒目既」 

　　我同啊MAY去家政室個雪櫃拎左個蛋糕出黎之後，就準備晒Ｄ蠟燭插係個蛋糕到。當準備好晒，啊希中三既細佬David就黎左，David本身係打合球，但後來中五師兄走晒就過左黎打籃球，所以我同佢都算熟，始終佢係啊希既細佬，要係佢面前增加多Ｄ好感。 

　　原來今日得我，啊MAY同佢細佬David搞呢個慶祝生日既活動，我見啊洪唔係到，心入面竟然鬆一口氣。 

我：「呢個蛋糕係邊到買架？細細個又幾得意」 
David：「我家姐自己整架，不過佢堅持要坐係操場等食，唔肯跟我地上黎一齊拎」 
我：「咁依家落去啦，廢事佢自己一個等」 





　　啊MAY拎左個蛋糕就同我地行落去，上樓梯既人見到個蛋糕都讚個外型好吸引。差唔多行到去操場，啊MAY就遞左個蛋糕比我拎。 

我：「喂，做咩比我渣住？」 
啊MAY：「依家點著埋蠟燭佢，順便一陣你親手送個蛋糕去佢面前」

我：「做咩要我拎過去？？」 
啊MAY：「咁你拎唔拎過去呀！」佢啤住我講 
我：「唉，得啦我拎過去」 

　　點著左蠟燭之後，我就拎住個蛋糕行落操場。開頭我地諗住低調行事，點知啊螢見到我拎住個蛋糕就係操場大叫，佢呢一叫令我成為全個操場既焦點，更令玩緊電話既啊希望埋過黎。 





啊螢：「哇！！羅子傑溝女呀！！」佢係操場大叫 

　　比啊螢咁樣大叫完，所有係操場食緊飯既同學都望住我，當時怕羞之外已經感覺到自己面紅。但係差兩步就送到去啊希到，我決定唔理佢地行埋過去 

我：「啊希...生日快樂...！」我低住頭咁比個蛋糕佢 
啊希：「多謝！」佢笑住接左個蛋糕 

　　在場有Ｄ高年級中六哥哥姐姐係到食飯，見啊希接左個蛋糕就係到搞下氣氛 

「溝校花！！勁喎！」 
「喂，呢條仔嫁得過呀！！」 

　　啊希向佢地笑左一笑後，就吹熄左蛋糕上既蠟燭。之後佢渣住個蛋糕分別同啊MAY同David影相，當然由我渣機幫佢地影。當我幫佢地影完之後，啊希就叫左我行埋去同佢影一張 





啊希：「喂，企到成碌木咁架！笑下啦」佢望住我講 

　　我做左個好勉強既表情出黎，於是渣機既啊MAY又係到罵 

啊MAY：「屌你，唔識笑又企到咁遠做咩呀？搭住人膊頭影啦！」 

　　我望住啊希，睇下佢聽到呢句有咩反應 

啊希：「我唔介意呀，你搭住我影啦！」佢望住我講 

　　最後，我就搭住啊希膊頭笑住同佢影呢一張相，影出黎之後睇返竟然又影得幾好，影到啊希甜美既笑容之餘，搭住佢膊頭下更顯得好似高過佢既弟弟保護緊呢個瘦弱既姐姐咁。最後我仲用左呢張相做電話既桌面背景。 

　　慶祝完啊希生日之後，又係下學期測驗既來臨...