[真人真事]那些年錯過的愛情: 中二１９

上左成個上午堂，中五班人就係出面嘈住晒，有時又會入下我地班房搞下破壞咁。我之前有時上堂會SMS啊希，今日SMS佢之後，佢無好似平時咁好快就回覆，反而只係一堂覆得兩三個左右。 

　　去到食飯果陣，我同啊單啊金食完野之後，返到學校見到成班中五係籃球場省尻人，唔識踢波果Ｄ就捉Ｄ中一去磨旗桿條柱。佢地玩得咁熱情奔放，我就知道如果啊天見到我就死撚硬，一定比佢捉去磨柱。為左小弟弟安全，我就同佢兩個上左樓層上面既走廊企，今日既走廊比平時企得更多人，可能因為大家知道係下面唔安全，所以走晒上黎等上堂。 

　　當我地上到去走廊之後，啊單同我講話見到啊希，我望住佢指既方向先知啊希同一個男仔企左係前樓梯附近，我認得果個男仔就係果個籃球隊師兄。但詳細既對話當然唔知道，因為距離實在太遠。最後，距離１５分鍾左右先會上堂，我企係走廊睇住佢地兩個企係前樓梯傾左差唔多十五至二十分鍾。最後，啊希行黎後樓梯方向走，都好似見我唔到咁。直行直過低住頭就行走左。 

　　放左學之後，啊樂同啊金就叫左我去打排球。我見籃球場唔太安全，而且要等啊單留堂就答應左佢地打一陣。落到去就見到班上兩個女仔都係到打緊，一個叫YOYO，一個叫啊螢。兩個都係我既同班同學。 

啊樂：「哇！啊螢你買左新排球喎！」佢好驚訝咁講 
啊螢：「係呀，前日我呀媽買比我架」 




啊金：「唔怪得叫我地兩個打波啦，原來係有新波」 

　　突然之間，啊螢就指住我 

啊螢：「我認得你！你咪成日係班上面露條底褲出黎果個羅子傑！」 
我：「咩野底褲？」我心諗，做咩撚野姐你 
啊螢：「唉，扮晒野啦。我唔想同Ｄ變態既人打波囉！」 
我：「算啦算啦，我坐埋一邊睇你地打」我行走左

當時我廢事同呢個野蠻螢嘈，我就坐埋一邊玩電話等啊單。啊樂見我自己一個就走左埋黎 





啊樂：「唔好介意啦，佢係咁架！」 
我：「算啦，不嬲都無咩同學鍾意我」 

　　當我玩電話玩到悶，就決定睇住佢地四個打波。點知，打打下個排球飛左去籃球場，啊天果班人見粒排球去左籃球場。就拎左個排球上手。同時，我最期待既畫面出現了。 

啊天：「妹妹仔，粒波係咪你架？」佢拎住個排球行過黎排球場 
啊螢：「係呀...」佢好似好驚咁 
啊天：「好，我幫你拎返黎，你比我踢返一球！」 





　　「砰」一聲，啊天將個波向上踢，足球飛到勁高，大約有三四樓。我睇到個排球飛到咁高都哇左一聲。 

　　但係，點解咁耐都望唔到個波落返黎？最後，仲見到佢地一齊望左上天。好奇之下，我就出左去望埋一份。原來，啊天一腳將個排球踢左上禮堂頂，大約有三層樓高，睇黎都拎唔返。我望到呢個情況就係到笑。 

啊螢：「喂！拎返個波比我呀！」佢好嬲同啊天講 
啊天：「下星期我會搵你！走先！」講完佢就慢慢行走左 

　　最後，啊螢同YOYO就去左搵訓導主任，但係連訓導主任都害怕足球隊，佢又點會出手做野。到佢地兩個落返黎，我仲係到笑緊。 

啊螢：「好好笑咩？」佢啤住問我 
我：「係幾好笑架」我仲係到笑緊 
啊螢：「變態佬！！」佢係排球場對我大叫 

我：「得啦，我走先！」我笑住跑走 





　　最後，我就同啊單去左附近籃球場打波，我仲同佢講返岩岩排球場既事。佢聽完同我反應都係一樣，都係笑到仆街。 

啊單：「係啦，聽講有個同級同學鍾意啊螢好耐啦喎」

我：「邊撚個黎架？佢都有人鍾意？」 
啊單：「精英班果個啊水囉，聽講佢中一同啊螢一班果陣就鍾意佢，依家兩個唔同班都有私底下聯絡。 」 

我：「唔想知，出去打波啦」我企起身拉佢 

　　中五走左之後，啊希係學校果陣表面上都扮到好開心。但係當我同佢有機會單獨相處既時候，佢個樣貌就會一百八十度轉變為一個唔開心既樣，問佢做咩事唔開心，佢又話無野。所以話，女生真係好難明白佢地諗咩。另外，由於中五走左之後，啊天就無再返個黎。所以，啊螢暫時仲未拎返佢個排球。呢一日，放學果陣啊螢又係班房問我 

啊螢：「喂！我個排球點呀？」佢係班房問我 
我：「又關我事？都話我同佢唔熟」佢成日問搞到我唔耐煩 
啊螢：「中五果條友同你都係籃球隊啦！快Ｄ叫佢返黎搵我！」 
我：「屌你真係好撚ON9」我離開班房 





　　離開班房之後，因為出面隊街隊今日要練波，我打算打比屋企人話要遲Ｄ返黎食飯。點知當我打比我啊媽，佢就講左Ｄ令我好撚震驚既野。 

啊媽：「下？你遲Ｄ先返黎？」 
我：「係呀，我一陣要去練波，同啊飛一齊」 
啊媽：「唔好去啦，LULU姨幫你約左個女仔相睇喎」 
我：「下？？咩話？？」