[真人真事]那些年錯過的愛情: 中二０５
終於到左下星期，呢一日對我好特別。因為今日就係我同甲組師兄打既第一場比賽。雖然係友誼賽，但一大早返到學校已經好緊張。今日亦令我知道學校甲組籃球隊係區內真係好出名。
上課室之前，汪SIR係早會上宣佈，今日籃球隊放學係學校有比賽，叫Ｄ同學留係到睇。小小一場波比佢搞到好似好大件事咁，亦令我心情比中一打學界更加興奮。
為左呢場比賽有１００％狀態，今日上既堂我差唔多全部訓晒。坐係門口果行既最後位置，班上面既風風雨雨仿佛與我無關。同時，呢半個月令我明白到係呢班生存既重要法則－少說話不做事。只要你出聲就一定仆街，唔出聲就多數無事。所以訓覺係最安全既班上活動。
放學果陣，甲組既師兄好快就到左球場，對面球員到左之後，好似個個都當啊天係球星咁，人人都走去擁抱佢同握手。觀眾企滿晒籃球場四周，連走廊上面望到籃球場既位置都企左人。呢個比觀眾包圍住既環境，令我明白企係場上面需要好大勇氣。有句電影對白講得岩：怯，你就輸成世。
啊希：「咦，啊傑你仲唔出去熱身？」
我：「搞緊條鞋帶呀，想整實小小」
啊希：「加油呀！如果你一陣有機會落場會學到好多野。我支持你」講完佢就走左去球場中間
聽到啊希同我講加油，就好似打左一枝強心針咁。今日，我要所有師兄認為我絕對夠資格打甲組。
出左去熱左一陣身，女教練就叫左我地返黎準備比賽。
女教練：「好，你地埋黎聽啊天講」
啊天：「嗯，一陣照舊出上年果五個先。防守就打...」
其中一個師兄：「啊天，刀仔仲未到喎。正選要換人」
啊天：「咁海魚你代一代佢先」指住一個中七師兄
我心諗：「啊天真係好有霸氣，中六七既師兄，連教練都要自己學生聽佢講野。仲有，邊撚個係刀仔？？做咩我練左幾次波都未聽過球場上有人叫呢個名出黎」
「雙方準備列隊」
我同全部師兄企左係出面列隊，前幾步就係對隊既球員。望晒對面全隊，我屌，全部都係又高又橫既大隻仔黎。就連同我握手都有氣勢過人。
「咇，比賽開始」
比賽開始之後，啊天無主動進攻。只係做一個傳球者既角色，幫助隊友發揮。對面隊不愧係傳統勁旅，防守嚴密度係我打咁耐比賽前所未見的。
直至過左幾分鐘，我地個隊輸到0:8。啊天見隊友發揮唔到，終於自己出手。
啊天接波之後，第一步好快過左防守者，過左一個人後用一個後轉身殺入籃底，輕鬆入兩分。呢個完美既入球只能用四個字形容，完美無遐。
當啊天打破零分局面，主場觀眾係到為佢歡呼。作為一個師弟，睇到一個主將入波有咁大影響力，令我好榮幸同啊天打同一隊球隊。
當比賽打到第二節，隊友差唔多全部都上力。比分兩隊又差唔多。觀眾睇得興奮之餘，我呢個場外飲水機係後備席食花生仲食得好滋味。
突然，係暫停期間，有一個著住校隊波衫既人踩住架單車入籃球場。呢個男仔手同腳流住血咁出現係大家面前。
「Sor! 訓晏教遲左起身！」車上男子叫著
啊天：「刀仔，我仲以為你唔黎」伸出拳頭打向那男子胸口
「我屌，原來呢條仆街係刀仔！」我心諗
當我岩岩入黎呢間學校既時候，曾經同啊賢係籃球場見過一班高高大大既師兄拎住一支藍色既棒球棍，出左去籃球場趕走左幾個打緊波既中一。仲搶埋人地粒波。
果個帶頭拎住棒球棍既人對住我講「靚仔，望咩撚野！」。就係岩岩踩單車出場既師兄－刀仔。
刀仔：「點呀？依家打成點？」佢拍住架單車講
啊天：「仲差幾分先追到，有你就岩岩好」
刀仔：「得啦，但比我止左血先」
啊天：「做咩搞到全身流撚晒血？」
刀仔：「屌...岩岩踩單車趕住返黎，踩得快得制，炒撚左車」
啊天：「你快Ｄ止血先，我地KEEP住呢個陣容頂到你出黎」
臨出場前，啊天望住我，但又無講到野。
「唔通我有得出場！？機會黎了！」我心入面巳經笑出黎
啊天：「喂，啊傑，幫我去飲水機斟水」
我：「哦...OK」
當我返到去後備席坐低，見到刀仔出左場。呢個棍佬同啊天一樣係人不可以貌相。佢係場上面既一舉一動會令到女生尖叫。跳得高之外又同啊天有好好既默契。刀仔係場上既認真，令我對當初佢渣住支棍想打尻人既形象改觀左。
打到第三節完左之後，飲水機守護神終於有機會出場。
啊天：「依家嬴緊幾分，傑仔出去試下打一陣」
我：「好！」
落到場準備開波之際，啊天拍一拍我屎忽
啊天：「唔撚洗驚，有我係到」
我：「放心，我唔會令你失望」
今日落到場既定位同上年唔同，上年因為太肥跑得慢，比陳SIR叫左去打籃底。經過暑假特訓之後，高左同瘦左之外，自己比上年跑得更快。而且，同師兄一隊令我變左差唔多係全隊最矮。所以，我今年既角色係擔當一個最唔擅長既位置－控球後衛。
打呢個位置其實相當舒服，基本上比左個波啊天或刀仔之後，佢地都會自己打入去。入唔入波我都係企係三分線出面食花生，入波就伸隻手拍下佢地。
但係，最大既缺點比對面發現左。
對面隊球員：「喂，快Ｄ集中打個矮仔啦，弱點進攻呀！！」
第二個球員：「快Ｄ傳比我！」
當佢拎住個波對住我之前，我已經準備好防守姿勢對付呢個大隻佬。點知佢係三分線一拎波，就係我面前射入左。我輕鬆比人入左波之後，更加比刀仔怒啤住我。
啊天：「算啦...下一球守返好Ｄ得架啦」
我：「OK...」
雖然講就話會守好Ｄ，但事實上我根本守唔到呢個大隻佬。係幾分鍾之內，我比人入三分，比人撞開射兩分，一秒過左我個防守。我企係場上面，已經聽到主場觀眾比我既噓聲。
呢一球，我又比個大隻佬輕鬆過左。正當大隻佬準備輕鬆上籃，刀仔就係三分線衝入籃底。
刀仔：「細路！你又咁易比人過！」 當佢講完，已經跑到去籃底封左大隻佬個波落黎。
啊天：「傑仔，跑上前！」
當刀仔封左個波落黎，佢搶返之後傳左比啊天，然後傳左比我。我拍住個波同啊天跑向進攻一方，籃底只有一個防守球員。正是二打一大好機會。
見到呢個情況，我巳經決定要用暑假特訓既後手傳球傳個波比啊天，用呢球挽回大家對我既期望。
但當我傳左呢個後手傳球出去之後既三秒，已經知道出撚左事。當我後手傳比啊天，啊天無好似我預料之中接到波，反而係聽到有人慘叫同球證吹個波出界既聲音。望去個波出界既位置，原來我後手傳波失左手，打中左觀眾既頭，仲令佢流鼻血。呢個人就係中一同我一班既啊威。
之後，我就比啊天換左出場，聽盡全場觀眾對我既恥笑。正正式式做左飲水機守護神。最後，呢場波我地學校以２分勝出，但我既心情無好似大家咁開心。直至到解散，我先自己一個人靜靜離開。當我行出校門一段路後，啊希無啦啦係後面行上黎。
啊希：「飲唔飲呀？請你飲啦」手上拿著一枝凍水