[真人真事]那些年錯過的愛情: 中二０２

佢見到我之後，就好似開學果日咁。笑住同我揮手打招呼。我坐低左之後都向後對佢微笑返。我唔知當時既勇氣係邊到黎。同呢個靚女姐姐唔多熟既我，我竟然主動問佢野。 

我：「Er...請問你係咪比個水比我飲果個姐姐？」 
姐姐：「下！！原來你仲記得架。我叫啊希呀，今年讀中四，你呢？」 
我：「緊係記得啦..！我叫羅子傑，今年中二，你叫我啊傑就得架啦..！！」 
啊希：「你都唔洗叫我姐姐啦，叫我啊希得」 
啊天：「屌，希姐，你又係到收兵..」 
啊希：「你中五架啦，仲講粗口教壞Ｄ細」 

　　我坐係到聽住佢地你一言我一語，從佢地對話睇得出佢地兩個係交情幾好既朋友。直至汪SIR入黎點完名，佢地兩個先肯收口唔傾計。 





汪SIR：「好啦...咦，今年中一男仔得一個，中二得三個。應該報唔到丙組學界喎」 

　　我聽到汪SIR話有三個中二既男仔，立即望去會議室既第二邊。發現原來湯尼同一個中二肥仔坐左係角落，唔怪得岩岩我睇唔到佢地。 

啊天：「喂啊SIR，反正甲組得十個人，不如升傑仔上黎打啦」 
汪SIR：「暫時就咁啦，啊天你係隊長你決定。聽日放學有第一次練習，男女都要到。其他三個丙組就交比聽日既女教練決定啦。好，解散」 

　　聽到汪SIR咁應啊天，我先知呢個啊天原來大有來頭。當初我仲以為佢係足球隊同埋係籃球隊既超級大後備。但估唔到由佢地對話之中，可見啊天係籃球隊有相當重要既地位。 





啊天：「好啦，波衫唔洗傾架啦。用番學校傳統既白紅色啦，解散」 
我：「下，走得啦？！」 
啊天：「傑仔你走得架啦，你要返上去上堂。我係到吹下水先，聽日練波準時呀！」 
我：「好，咁我走先啦」 

　　除左甲組籃球隊傾完之外，女仔果面仲係會議室傾緊，我返上課室前係門口同啊希揮手道別，佢又以一個甜到仆街既笑容向我say good bye。就係咁，我由一個丙組中二仔比啊天無啦啦一句說話拉左入甲組籃球隊...

　　返到課室之後，收到一張學會既申請表格，我簡左棋藝學會同體育學會交左出去就訓左教。訓訓下，聽到有人係班房鬧交，我醒左之後望下發生Ｄ咩，點知比我見到牆角有兩個女圍住一個同班既男仔，其中一個係啊美。 

同班男：「唔落呀..」 




啊美：「我屌你老母呀！叫你一陣落去幫我地買野食都唔撚得？」 
同班男：「屌，唔落呀」 
第二個女：「屌你，講粗口！？」 

　　跟住落黎發生既事，就係呢個男比啊美同另外一個女仔係到好大力咁扯佢頭髮同拎粉筆畫尻佢件衫。呢個男開頭都有反抗，但係反抗左一兩分鍾就坐係到任人魚肉。最後都屈服左係呢兩個女仔既惡勢力之下－落去幫佢地買野食。 

啊金：「痴線架..」啊金細細聲講 

　　當啊金講完，有一個坐我地附近既男仔同啊美講 

「喂，啊美，條肥仔話你痴線喎」跟住指住啊金 

啊美：「肥仔，我屌你老母呀！」 

　　呢個時候，懦弱既數學老師終於出聲。 





數學老師：「不如大家返埋位先，有事小息先解決，好嗎？」 
啊美：「好，啊SIR我比面你」 

　　上堂既時候，我已經估到啊金一陣係小息會比人圍攻，由於我唔想受到波及。於是我小息果陣就走左去第二班搵啊神吹下水，傾下今年中一有咩新女同邊個師姐索左咁。直至打鐘返入自己班，見到啊金個書包係垃圾桶，張枱唔見左，得返張櫈係我個位前面。見到呢個場面我好唔爭氣咁笑左出黎。 

　　我返到埋位坐之後，大多數人都好早返入班房等食花生，等啊金返黎有咩反應。之後啊金返黎，見到自己個書包係垃圾桶，執起佢之後就坐左個位到，對於唔見左張枱，佢表現得無任何反應。但係同班同學已經笑緊佢。 

　　之後，啊金出左去唔知邊到搵左張枱返黎。餘下既時間，佢就自己一個自閉訓教，更無同任何一個人講過野。