[真人真事]那些年錯過的愛情: 中一１２

對住我講呢番說話，係一個帶眼鏡既女仔。呢個女仔留住一把黑色又帶小小啡色既長髮，著住黑色籃球褲之下顯得佢兩條腿特別白滑，樣貌可愛之餘更帶一點鄰家女孩既感覺。當我睇得入神之下，陳SIR就吹雞，叫晒我地全部人過去聽佢講野。 

陳SIR：「啊傑，你岩岩返黎我就講多次。呢幾個師姐就係我前幾個星期話會請返黎教你地果幾個。佢地呢幾年都幫學校拎好多獎，今次我請佢地返黎幫你地拎多Ｄ實戰經驗。仲有，我希望你地好似你地Ｄ師兄師姐咁，最少下年拎過頭八名返黎先對得住學校，知道未！」 

我地：「知道！」 

　　聽完陳SIR講野之後，佢就吩咐左幾個師姐單對單幫一個人訓練。果位帶眼鏡既姐姐就去左教啊金。其他師姐就一人帶一個走。最後，只得我冇比人簡到。 

陳SIR：「啊傑，你跟我過黎」 
我：「哦，好呀」 



　　跟左陳SIR之後，佢就帶左我去排球場，排球場隔離有好多牆。平時就係比Ｄ足球隊，排球隊大顯身手既地方。 

　　到左呢到之後，陳SIR就係牆上面畫左一個好似標靶咁既圓圈出黎。 

陳SIR：「你就對住個圓圈傳一千球，雙手傳完就左手，左手傳完就右手。跟住就頭頂，彈地！下下都要一千！」 
我：「下，咁佢地呢？」 
陳SIR：「做你就做啦，屌你！」

　　我一路對住幅牆傳波，球場就不斷有Ｄ男男女女經過。當中聽到佢地講 



「睇下條傻仔做咩尻」 
「傻西黎，有籃框唔撚射」 

　　聽到之後我無理佢地，仲係不斷傳。雖然我唔知對住幅牆傳波有咩用，但唔跟住做一定比人屌。所以都係聽陳SIR講，唔撚理咁多野，快手搞掂呢幾千下佢算。 

　　傳左一陣，隻手係咁傳搞到軟軟地，動作開始慢左落黎。咁岩有個師兄拎住個足球行過，佢見到我就叫左我一聲。 

師兄：「喂，細路你係到做咩撚野？」 
我：「傳波囉」 


師兄：「你休息陣先，比我對住牆果個圓形射一球」 
我：「哦...好呀，慢慢啦」 

　　我只知道，如果當時我唔比佢射一球落幅牆，我下場比死更難受。你要知道，足球隊是唔可以得罪的。 

　　佢用腳控住個足球去左一個好遠既位置。係到簡緊一個位準備起腳。 

　　我見到心諗「屌，咁撚遠，中撚到個圓圈咩」 

　　點知，條撚樣一起腳，個波直飛落幅牆到，中左個圓圈之外，更加有Ｄ白色灰趺落黎。 

　　我自己一個O左係到講　「唔撚係呀...」　 

　　呢條撚樣腳力絕對比得上少林足球入面既五師兄周星馳，望到呢個情況我仲以為自己睇緊少林足球。佢踢完之後陳SIR聽到巨響就走埋黎。呢個師兄見到就即刻拎返個足球跑走左。 



師兄：「細路比心機啦，下次叫我啊天得啦」 

　　我聽到之後都比唔切反應佢，而陳SIR黎到隱約佢聽到佢講左一句　

「啊天呢個衰仔...」