《你的生日，我的結婚紀念日》: 第二章 - <認識你>
第二章 <認識你>
小姐我能不能坐下和你聊聊天
我從那邊看見你好像有點時間
如果你覺得我煩你可以叫我走
不過我覺得我們可以交個朋友
⋯ by 方大同
「其實你有冇發覺成日都有啲心事想同人講，但係如果嗰個人係識既你又講唔出？」Leon 一邊吃著油占多一邊說
因為今日軒哥要到門店開會，我鎮守寫字樓，Leon (他本名叫黃德明，因為方便所以一直只寫他的英文名字）百無聊賴（高層真好！）就叫了我到公司附近的茶檔吃下午茶。
「好多我既野都同你地呻架啦，不過有啲野男人老狗又真係好難同你地傾」
「所以有冇諗過點解我會問你？ 你有冇諗過你既問題其實可能大部份人都面對緊，但係只係個個都自己搞掂？」
「即係點？唔係好明」
「即係講白啲，我都會想有人同我傾下計，了解下我，唔係同你地講下女咁。而係心靈上既滿足⋯」
「係呀！」我拍枱叫了出來，隔枱的茶客好像看到瘋子一樣望著我。
我被這一句說話直插入腦，好像點中了穴道一樣，一直鬱結著的原因原來就在這裡！ 為什麼我很不開心？ 婚也結了但每天都好像面對著壓力，整天吵架、冷戰，原來就是---- 不被了解。
終於被搔到癢處，自然要向大師求教
「咁我應該點做？ 你好似都冇我咁既問題喎，見你日日紅光滿面，又多女又剩⋯」
「唏！唔好講到我去滾咁！我只不過識多啲朋友啫。」馬上中斷我對他的形象破壞，事關我們在公司附近，始終都是是非之地。
「嗱～ 我就唔直接答你點做喇，始終個個人都唔同既，條條大路通羅馬，咁我就用例子黎答你：即係咁，而家科技咁發達，樣樣野都IT, 我地公司都有APP啦， 咁手機又係好好既通訊工具喎⋯你想搵人傾計點會唔關手機事呢」他好整以暇地說。
「但而家都冇人用icq,msn 嗰啲啦！ 就算line 同 wechat 都係援交⋯」
「低能！ 唔怪得你大佬話你 '恨鐵不成鋼'！ 比埋你喇！ 呢個APP呀！」Leon 被激到「啤啤聲」，一手搶走我手機並安裝了一個APP.…
就是這個APP, 令到我平凡的人生，突然變得戲劇一樣⋯
「Leon 哥，呢個APP 好似全部都唔係香港人黎架喎⋯」
「傻仔！ 你仲比港女玩唔夠？ 你老婆已經係港女金字塔既最上層黎架喇，你而家最需要係有人安撫你既情緒，熨平你心入面既滄桑⋯」他撫著我胸口說
我一手推開他
「咁你又知呢班女仔可以幫到我？」
「你有冇讀書架！雖然大家都係華夏文族，五千年前原是一家！ 但經過多年來既遷徙，文化既演變，內部矛盾爭鬥⋯⋯ 各地既囡囡响生活同意識形態上有著明顯既分別」
「咁你又知呢班女仔可以幫到我？」
「即係點解有港女？因為有港男囉！ 咁點解有北妹？因為有北佬囉！」
「咁你又知呢班女仔可以幫到我？」
「你真係對住個電腦對到short咗！即係點解有咁多公主病既港女，係因為有你呢啲習慣做下把既港男寵返黎既！ 咁北妹點解咁貪錢？係好身材係好溫柔架！點解呀？因為北佬而家有錢，比得起！班北妹都係提供服務囉！」
「咁你又知⋯ 唏！唔玩喇！ 咁呢啲唔係我要既野喎」
「聽埋先啦！ 而家呢個APP入面既大部份都係台妹黎既」
他啜了一口凍奶茶續道
「咁台灣既特性就係民風相對純樸，人與人之間既信任度比其他地區為高，而且人情味濃，交友著重心靈溝通多於現實。」
「係？」
「而且文化修養高，斷唔會下下都粗口爛舌，亦因為當地收入水平低，查實你响嗰邊已經係中產黎架喇！」
「你咁肯定？」我真的半信半疑，如果世間如此美好，這些機會又怎會屬於我？
「妖！真係迫我出真功夫！ 嗱！比你睇下我啲friend喇⋯」 他打開了手機程式一邊說⋯
「真係喎⋯ 台妹真係唔同！」
「呢個掣仲可以錄音send過去，比段最冇野 （！） 既你聽聽先啦！ 你就會知道個世界唔係剩係英皇道去到皇后大道西咁架喇⋯」
（你今天去喝酒了嗎？～ 嗯，要小心點喔～ 要乖乖～ 知道嗎⋯⋯） 從手機喇叭傳來了一把甜甜膩膩的聲音，說真的，很受用。
這聲音不像劇集裡刻意醜化的造作，也沒有表現出不人性化的溫柔，就是聽得出體諒和了解。
「點呀！ 真係身心酥軟呢～」
「咁大哥你靚仔有型，實得?！我呢啲死肥仔，我覺得是零囉⋯」
「費事同你嘈！叫得你試就一定係好野！同你friend先醒你，今晚返去玩下，實上癮！」
如是者之後幾日，我在APP內浮浮沉沉，見到合眼緣的就傳一下，文筆秀麗的又傳一下。結果，朋友列表有數十人，但全部沒有回覆⋯
「Wilson 哥，查實你當年係點撚樣溝女架呢？上網玩成個禮拜都係得個吉！」被冷嘲熱諷是預期之內，因為早覺得不可能像Leon 一樣順利，但也實在想不到會是一個回覆都沒有。
當下，負能量上升，覺得自己原來真的沒有外表，談話乏味，人家連招呼都懶得回一下⋯
「冇可能！一定有原因！ 拎黎睇下！」Leon 一手把電話搶去。
「係唔覆架啦！你估我係你咩！就算我只係想傾下計，人地都揀個靚仔啦！」
「低能仔！ 原來係咁！」 然後他連聲大笑。
「大佬呀！ 真係笑到有腹肌！ 你溝緊既係咩人呢？」
「台灣人囉⋯ 做咩」
「咁你懶到就咁 'hi' , 'how are you'.… 人地會覆你先奇啦！ 唔通覆你 'I go to school by bus' 咩！」
Leon 續道
「仲有，你打GTA 都會睇清楚環境先落手啦！人地台灣人個個寫中文，你又唔入鄉隨俗，唔同聲同氣點同你老哥玩呀！」
他說的沒錯， 我應該先踏前一步，否則，根本不可能會有人理我。就算我只當作遊戲也好，當作聊天工具也好，總得有個開始。
每個人總有他的性格缺陷，只不過這個缺陷是否明顯，是否致命。 有些人的性格就是大而化之，往往損失的多數是跟錢財有關，也有些人是太不相信人，自我封閉，當然會給人孤立。 而我的缺陷是來自被動，雖然看起來不太致命，但很容易察覺，亦因此，我的感情世界受到致命打擊⋯
終於，經過一段時間之後，我得到了數個女孩子的回覆，內容當然是有一句沒一句。還是在「陌生人以上，朋友以下」的狀態⋯
直至其中一個她傳來了一張相片，她問了一句：
「你覺得她漂亮嗎？」