在夢境與少女相遇後有壞人殺死了我: 最終章(6)
我帶著大家在附近走了一圈，重新選了一個地方，這一邊馬路較少，以行人路居多。
而且這邊的人，感覺上沒那麼趕急，比較有閒情逸緻。
「就哩度啦。」我說。
這是一個十字行人路口，十字路口其中三路的兩旁都有商店、食肆，人流種類有遊客、本地購物客、附近居民等等。
我們四人組輕裝上陣，可以隨時改變地點，沒必要死守一個位置。
簡單來說，哪裡有我們想要的人群，我們就可以到哪裡去。
至於何謂最理想的人群？
「大家聽住，如果見到一男一女行街，無論個男仔溝緊女又好，兩個人已經拍緊拖又好，一概不問。」
「最好，搵一個人行街既閒人黎問。」
「行得快、狂睇錶、戴住耳機、不停低頭SD訊息既人，以上任何一種，無論你做乜，佢地唔會理你，甚至見唔到你。」我說。
「所以唔好晒口水同時間係佢地身上，我地集中搵一個人，無無聊聊行緊街既。或者，兩個人，男男、女女咁既，同組員一次過開兩張單。」
「三個人以上一齊行街既，基本上佢地既關係會有住某種抗性。例如A同B傾計，C就會淨左出黎。」
「佢地三人都會有種唔想被忽視，而想成為群體中心既欲望，導致每個C都會留意、若無其事咁偷聽AB既內容，以便隨時加入話題，回歸中心。」
「同時A、B又唔想讓出自己既中心地位，所以傾計既A、B，同埋每個C，都長期處於一種心理及精神上既忙碌狀態。」
「而唔會得閒理問卷員。」我說。
「至於，搵人，最忌眼神太明顯，太早露出自己既意圖。」我說，「以獅子老虎為例，捕獵唔能夠太早出動、唔能夠太早露出殺機，要等獵物進入到『出手即可得』既範圍，先至出手。」
「所以，等目標人物，黎到同自己兩米距離既時候，先至望過去、再問人啦。」
「太早望住對方，對方只會比你既氣牆嚇到兜路走、或者大大提高警覺，哩啲都唔係我地想見到既。」
「隱藏自己蠢蠢欲動既氣場，哩種低調，係基本。」我平靜地說。
「友善目光、完全冇陰謀既眼神，係加成。」
「重新編排題目順序，用最吸引人既問題開始問起，一開口就留住人，等人地主動講唔停口，自己問完一題又一題，最後人地仲覺得你好好傾，就係技術。」
「好啦，暫時講咁多先。」我說，乾咳兩聲，「大家分組分成點？」
「我同阿May一組。」阿天說。
「咁我同程強一組啦。」雪兒說，走近我。
她是小組裡，年紀最小的少女。
「你地組守嗰兩路，我地守哩兩路。」我用筆尖指指，便把筆和氣息收起，宣佈，「依加，可以開始。」
「係！」他們回應。
開始後不久，由於我們經營了一個良好的氣氛，途人並不抗拒，都幫忙答一下問題。所以，我們很快就問到人，開始填一張一張的問卷。
「就算係每十五分鐘，先做到一張問卷。」雪兒說，剛做了一張問卷回來。
「一個鐘四張，我地五個鐘加埋，每人二十張，已經係琴日既2.5倍。」
「更唔好講，依加幾分鐘就做到一張啦。」她興奮地說，「程強，你好勁啊。」
「做野啦。」我說。
「喂，先生，知唔知點解，龍珠入面既孫悟空，同西遊記既孫悟空撞名？」我抓住一個男生，找住一個搭話的機會。
「唔知喎，係喎，點解既？」他問。
「我有位同事，叫悟天，即係嗰邊好高大嗰位。」我說，「佢知道點解，亦都話左比我知。」
「真架？」他問。
「係啊，話時話，你今年係咪16至20歲左右？」我抱上問卷板，按出筆芯，指著年齡格。
「我睇落咁後生咩？我廿頭架喇。」他笑說。
「Ok ok！」我剔了21 - 25歲。
接下來，我開始一道一道題地問，期間談天說地，無所不談，很快就完成了一張問卷。
「拜，下次再傾。」我揮手送別。
開工兩小時以來，大家的工作都大致順利，只是中途小休回來之後……我……不行了。
在城市裡，在人海中，我想起妳了。
忽然間，我想靜下來，我不想工作，還有點想流淚。
「冇左妳，我咁積極做乜春？」我問。
「我地只係暫時分開，遲早會相見，在此之前，我要做好自己。」我勉勵。
「但……我地……真係仲會見咩？」我根本是在自欺欺人。
「程強，你做咩停晒手？」雪兒忙碌中抽時間過來，「喂，你做咁既樣既？你……喊呀？」
「唔好意思，依加既我，做唔到強顏歡笑。」我右手掩眼說。
「我開工之前講既野，依加我都做唔到，我想休息多一陣，你可唔可以……頂住先。」
說完，我便走到一旁，想卸下職員證，休息一會兒。
「年輕人，你做咩喊啊？」有個好心的姨姨問我。
吸泣，我抽一下，右手拭目。
「姨姨……泣……請問你……係咪36 - 40歲？」我哽咽問，提起問卷板，握起筆。
「我自己填啦。」她奪了問卷板和筆，從褲袋抽出一包紙巾，更遞上一張紙巾給我。
「唔該。」我接紙巾，處理臉上的東西。
她填完之後，便還我問卷板和筆。
我核對一下，沒有問題。
「你地企左咁耐，唔攰架咩？」她關心問，指著一間女服裝店，「我係嗰間店度做既，見你地企左好耐喇喎，乜要做好多張單先比收工咩？」
「一疊。」我從紙皮箱裡隨意抽起一疊問卷。
「嘩，你公司想做死人咩？」她問。
「哩個係我地小組既目標，但恐怕達唔到喇。」我說著，又想飲泣，「因為我今日……已經……唔想再做。」
「你遇到啲咩事啊？」她問，「比人鬧？同女朋友嘈交？」
可是，我沒有回答，不願意回答。
「咁啦，你比一疊我放係鋪頭，有客人得閒，我就比佢填張啦。」
「咁……邊好意思？」我看著她問。
「冇所謂啦，反正好多男仔等女朋友揀衫嗰時都冇野做，咪比啲野佢地填下囉。」
「如果佢地填得慢，女朋友可能又會行多一圈，可能又會睇中多件衫，對我地黎講都係一舉兩得。」
「咁我比三十張你啦。」我數了數，分了半疊給她。
看著她回去店舖之後，雪兒用勁欣賞的目光看我。
「你……點做到架？」她問。
「用人之道既野，你識啲咩丫。」我悲傷地說，卸下證件，想在鬧市靜一會兒。
獨自走了幾圈，哭了幾趟，回來之後又要繼續工作。
問著，問著，時間過去。
傍晚，我們在下班的時候，回收了女服裝店的問卷。
組員把所有問卷加起來，比起昨天，具有800%的業績增長。
「唔單止破新人組紀錄，分分鐘破埋公司紀錄。」阿May興奮地說。
「程強，你今日真係好強，你到底發生咩事？」阿天雀躍地問。
「係囉，點解你今日咁唔同既？明明琴日仲要我醒兩張比你。」阿May再問。
「你地，唔好問佢野啦……」雪兒為難地說，替沉默地收拾物件的我，擋住了他們的提問，「佢頭先……喊左好耐，心情好似好差。」
「唔好意思組長、各位，我約左人，走先喇。」我茫然地點頭，茫然地往下一街頭走去。