在夢境與少女相遇後有壞人殺死了我: 第08章 (10)

拆下兩、三個綁帶扣，我把繃帶一翻一翻地解下。
 
過程中有藥味傳出。
 
貓貓出於敏感，躍上了梳化，小肉爪踏著詩巧的碎花裙，貓視眈眈地從大腿走近膝蓋的位置。
 
貼下貓鼻子，向前索索味道，尾巴卻在屁股後繞來繞去。
 
「搞住晒。」我驅趕牠，下一刻，牠已被難過的詩巧以雙手捕獲。
 


「喵 ~ 」慘呼。
 
「你隻腳都幾腫喎。」我難色地說，把繃帶放到一旁。
 
「嘩！」她自己也不敢相信，「又紅又脹，腫得好核突啊。」
 
「知驚，下次就唔好周圍走喇。」我說。
 
起身去浴室取出水盤，盛一些溫熱水，再選一條毛巾。
 


「就揀老母嗰條啦。」右手拿下那拋棄我的女人的毛巾，準備用來替其他人抹腳。
 
再次蹲下來，我浸濕毛巾，把詩巧的腳放入溫水中。
 
「強哥，你……做咩啊？」她更不敢相信，摸貓的手也停下了。
 
「同是天涯淪落人，大家都無父無母，互相照顧下又有咩所謂丫。」我專心地，把溫水毛巾輕輕放上腳面。
 
柔柔拭擦，柔柔拭擦，把殘餘的敷藥拭走。
 


「石詩巧，冇人冇物，得自己一個，要識照顧自己啊。」我細心叮囑，浸水再擦，「如果連我都唔係度，咁你點算？」
 
「強哥，你點會唔係度啫？」詩巧問。
 
「哩啲野，好難講架，話唔定聽日我就唔識醒呢。」我說，抬頭望向她，「到時，隻貓就拜託你喇。」
 
「唔好亂講野啦！」詩巧很不喜歡這個話題。
 
擦著，準備擦到腳跟的時候，我發現了一個船錨紋身。
 
紋身在腳踝靠後的位置，是一個小小的十字形、底部左右勾上的船錨。
 
「咦？乜你有紋身？」我問，輕輕地拭擦著，肯定那不是印上去的紋身貼紙。
 
「係啊，以前同成班姐妹去紋既。」她說，「我見佢地個個都紋，咪紋埋一份囉。」


 
「佢地有啲紋毒蜘蛛，有啲會紋荊棘，有啲紋字，紋咩位置都有。」
 
「但我覺得嗰啲太誇張，諗住紋個細細地算。」
 
「跟住老闆又推介話船錨係用黎穩定船身，象徵穩定，好多女仔都會揀，叫我考慮下。」她說，「咁我覺得幾好咪揀左佢囉。」
 
「唉，你地啲MK妹真係……我都唔知講咩好。」我擦拭著，扭乾毛巾。
 
「希望你願望成真啦。」
 
「但唔好紋咁多喇，洗起上黎好麻煩。」
 
「哦。」她低聲答應。
 


之後，我就收起水盤、毛巾。
 
再回來替她包上新藥，拿起繃帶，替她重新包紮。
 
「喂強哥。」她調皮地用腳趾挑逗我，「點解你包得咁熟手既？」
 
「唔好郁！」我喊停她的挑逗行為，「因為我長期都有醫生睇住，打針、聽診之類我都好有經驗。包紮哩啲，簡單啦。」
 
「醫生？你有病咩？」她視察著我。
 
「應該咁講，哩啲……係我夢入面既經歷。」我說，把繃帶扣通通扣上，「算啦，唔好講喇，我地食野啦。」
 
接著，我把Pizza、意粉、焗飯、雞翼輪流放入微波爐。
 
「叮——」「叮——」「叮——」


 
不一會兒，海鮮芝士二人套餐的食物氣味，薰陶著整個客廳。
 
「流晒口水。」詩巧忍耐著，摸著空轆轆的肚子。
 
「玩完貓，我扶你去洗手。」我走到梳化，攬扶起她，像扶著受傷的士兵。
 
兩人相扶走著，走著。
 
「沖沖……」我們沖沖手，關水喉，甩走手上的水。
 
洗完手就找椅子坐下。
 
在微黃光加白光的照耀下，我居住的單位，彷彿有了家庭的溫暖與生機。
 


「開餐！」我和詩巧共同大喊。
 
她一手、我一手地拉起三角簿餅，拉出長長的芝士。
 
「不如影張相？」詩巧叫停，正在掏出手機。
 
「你慢慢啦咁！」我不理會她，便開大嘴巴，對著簿餅大口咬噬下去。