在夢境與少女相遇後有壞人殺死了我: 第08章 (09)

現在是七點半，距離十一點睡覺，還有三個半鐘。
 
在巴士上，我已無暇留意昏暗的燈光街道。
 
一頁、一頁地翻著筆記。
 
希望盡量把有利自己的場境和設定記入腦中，還要潛移默化，植入潛意識的深處。
 
留意圈住的重點，留意間了橫線的部分。
 


這一切，就像明天要考試，今晚要溫習補習筆記一樣。
 
進入忘我境界，同時，身邊演化為異世界，一時像踏入了極樂淨土。
 
半小時後。
 
「叮——」有人按了紅鐘，是我下車的站。
 
下車後，我讀著筆記，走到一間M記門前。
 


「八點，仲未食飯，食個22蚊餐好唔好呢？」我看著手機時間。
 
忽然，想起家中的貓貓和石詩巧。
 
石詩巧的腳扭傷了，不便外出，又不會煮飯，她吃晚飯了嗎？
 
想著，想著，手指就撥出了電話。
 
「係咪石詩巧？」接通後，我開聲問。
 


「強哥？」她確認一下，忽然精神起來，「你咁夜仲未返既？」
 
「我就返到架喇，你……係邊？食左飯未？」我不想關心她，但還是問了一下。
 
「我叫左個外賣Pizza，預埋你嗰份架喇，不過有啲凍，你就到既話，我依加幫你叮返熱丫。」她仍是愧疚的語氣。
 
「唔洗喇，你休息下啦，我返到黎自己搞。」我不好態度地說完，便掛了線。
 
走了大約五分鐘，我掏出鎖匙，回到家中。
 
來到門口迎接的，是貓貓，牠的嘴巴非常油膩，肯定是吃得前所未有地飽。
 
「一陣冇見，你肥左咁多既？」我逗逗牠一下。
 
脫下鞋子，我望向餐桌，是一個完整的海鮮芝士大批。


 
不單止，還有百事可樂、意粉、雞翼、焗飯，根本是一個沒動過的二人套餐。
 
「咔嚓——」妹妹的房門被打開，詩巧從中出來。
 
「返黎嗱，我唔知你幾點收工……」她一拐一拐地出來，身上還是今早的黃色碎花裙，但腳傷好像比朝早嚴重。
 
「所以一早叫定個套餐，諗住向你賠罪，點知擺到凍晒。強哥，對唔住啊，今朝打爛左隻紅雞蛋，真係唔好意思。」她誠意地道歉。
 
「妳隻腳？」我問，「點解好似傷過今朝咁既？」
 
她隨即停下腳步，置後受傷的右腳，閃閃縮縮，「冇……啊。」
 
「唉，妳又做左啲咩黎啊？」我責怪地問，立即燥底。
 


「今日有冇出過街？有冇覆診？」我追問。
 
她退後一步，準備說謊。
 
「你呃我，你就知死，我即刻倒晒啲野食佢。」我威脅她說，「我比三秒妳，三、二。」
 
「之前中醫師比我多日藥我自己換，所以唔洗覆診住。」她馬上說。
 
「咁妳換左未丫？」我問。
 
「未……」她低下頭說。
 
 
「做咩唔換啊大小姐？係咪要我幫你先肯換啊？你知唔知啲跌打藥敷得太耐，唔拆開洗下腳，隻腳會皮膚敏感架？」我嚴厲地責問。
 


「喂，你有男朋友就話靠男朋友啫，冇你就要靠自己架啦。」我憤怒地說。
 
「望住我做咩啫，你唔好諗住靠我啊，諗都唔洗諗啊！」
 
「唔係啊，因為……頭先未夠鐘咋。」她語帶委屈地說，「依加先可以換，我……咁我依加去洗腳啦。」
 
「強哥你叮返熱啲野食，食住先啦。」她把餐桌的食物全讓給我。
 
接著，拐跌拐跌地走來，想前往浴室，但看樣子十分辛苦。
 
在她經過之際，我抓住了她的手臂。
 
「你仲未答我，今日有冇出街？」我問。
 
「有出過。」她坦白承認。


 
「去邊？做乜唔好好休息？」我皺眉地問，「你唔係又去搵前男朋友掛？」
 
「我……」
 
「吓？」我沒耐性聽她吞吞吐吐。
 
 
「我係去左街市，幫你搵賣紅雞蛋嗰位婆婆，諗住買番一隻比你。」她說，「但企左成個下晝，都唔見你講既人。」
 
「唔怪得之隻腳惡化。」我肯定地說，直接判斷，「你依加隻腳肯定又腫又痛，行步路都好似要死咁啦。」
 
「係啊……」說完，她扁嘴想哭，「我成世女都未試過咁折墮……」
 
「男朋友……又比人搶左，腳又扭傷埋，錢又唔多……我都唔知之後可以點。」
 
「泣……我好想喊，好想死。」眼淚蒼涼流下，她的雙眼已經紅腫。
 
的確，昨天不是我阻止她界手，她早已自盡而亡。
 
是我，害她還在生存。
 
「唔好諗咁多喇。」我半蹲下來，再起並以公主抱方式橫抱起她。
 
「強哥，鳴……」她淒慘得哭了起來，哭聲響徹耳際，釋放著心靈的痛。
 
我把她抱到梳化，拉一張椅子過來，把她的右腳放上去。
 
「強……哥？」她吸涕一下，不理解我的行為。
 
「洗腳之前，我幫你拆開啲繃帶先啦。」我說，細心地替她解下，再輕聲反問，「唔係點洗啊？」