在夢境與少女相遇後有壞人殺死了我: 第07章 (35)

第二天，下午，我醒來是因為醫生要替我檢查。
 
在患病的日子，除了日來晴之外，醫生叔叔就是唯一親近的人。
 
我搬屋，他們跟著搬屋，一直以來，他們兩人都如影隨形。
 
所以我告訴了他關於藍藍的事，那並不是因為我需要戀愛咨詢，而是因為她的香氣。
 
從醫生的角度，只有我一個人聞到，是由於荷爾蒙的互相吸引。
 


但我糾正說不是這點，而是我吸入一段時間後，身體會停止咳嗽。
 
他隨即拿出筆記簿，記錄下來。接著又憂心地替我檢查，說如果哪一刻我沒有打針，而覺得身體好像打了針一樣……
 
那大概是我真正的迴光返照了。
 
醫生看見我服藥後，便安心地離開房間。
 
現在，我和日來晴正坐在房間的「鞦韆長椅」上。
 


前搖，後擺，前搖，後擺。
 
「我想去蒙面舞會，幫我諗辦法！」我右手抓住吊著鞦韆長椅的樹藤。
 
關於蒙面舞會一事，我只告訴了日來晴，希望他能幫我。
 
「你屎尿都瀨過晒，仲想點？」他問，「仲有，你唔知頭唔知路就話要去，你知唔知人地個舞會係做咩架？」
 
「咪一班男男女女，蒙住面跳舞囉……」我猜。
 


「嗰度係一班富豪、貴婦人、富家子弟、千金小姐去既地方，你竟然叫藍藍小姐去，你係咪想佢出醜啊？」他責備地問。
 
「仲有，你知唔知舉辦方係咩人？舉辦既人唔同，成個舞會都可以好唔同。」
 
「我當時……冇諗咁多。」我慚愧地說，「總之，約就約左喇，管家，幫我度掂佢。」
 
「冇你咁好氣。」日來晴前去火爐頂，尋找一份郵輪節目表，查看今晚蒙面舞會的介紹。
 
「竟然，係佢？」他凝重地說，再次坐上來。
 
「今次既舉辦方，來頭唔細，係一個有豐富舉辦蒙面舞會經驗既人。」
 
「咩人黎？」我無知地問。
 
「佢係一個女人，年輕時繼承左家族經營既『美容化妝品公司』，成為一代女富豪。但一年之後，佢就將公司放賣，一直係世界唔同地方舉辦蒙面舞會。」


 
「似乎係基於某種原因，某個執著，外界傳言佢一直想係蒙面舞會追求一啲野。」日來晴繼續說，「可能係浪漫、可能係神秘感，可能係想重溫昔日與某人既情境。」
 
「又或者係，想物色合適既男人。」
 
「真正動機無人知曉，總之，提起貴族蒙面舞會，冇人唔識佢。而另一個令人認識佢既原因係，佢設計既舞會環節，係世界數一數二吸引，令人樂而忘返。」
 
「咁……佢叫咩名？」我問，嚥下口水。
 
「佢自稱——蒙羅麗莎。」日來晴說。
 
靜了兩秒。
 
「我記得蒙羅麗莎係一幅名畫。」我說。
 


「冇錯，係出自達文西，屬於意大利文藝復興時期既作品。」日來晴管家說。
 
「日來晴，我發覺你都識幾多野。」我欣賞地說。
 
「作為羅密歐家族既管家，應該既。」他謙虛地說，「唔係我點贏份工番黎，你知唔知幾多人爭？」
 
「講遠左。」他乾咳兩聲，「蒙羅麗莎哩幅畫好神秘，無論係蒙羅麗莎的眼神，定係蒙羅麗莎的微笑，都隱藏住秘密。」
 
「所以，嗰個女人，都充滿住神秘感同埋秘密？」我說。
 
「應該係。」日來晴猜測。
 
「真係想見下佢真人。」我不禁期待。
 
「聽講保養得好好，係美女一個，少爺你要小心。」


 
「得啦，我心有所屬，唔會對其他人動心。」
 
「話時話，少爺你識跳舞架咩？」日來晴問，收起節目表。
 
「跳舞？跳……咩舞？」我僵硬地問。
 
「華爾滋。」他理所當然地說，「舞會必跳。」
 
「教我。」我拜託，「晴哥。」
 
「我一直以為你唔會有機會跳，所以冇安排你學。」日來晴說，輕輕嘆氣，「唯有，依加教你兩招。」
 
他站到楓葉地毯上，紳士地用手請我出來。