在夢境與少女相遇後有壞人殺死了我: 第07章 (11)

第二朝醒來，我在地上，被厚厚的被子包著。
 
「咳……咳……」口罩還未脫下，昨晚就直接睡了。
 
陽光從窗口進來，把梳化、大廳都照得充滿朝氣。
 
可是我——
 
「咳咳……咳……」卻咳發不可收拾。
 


「叩、叩。」有人敲門，傳來日來晴的聲音，「少爺，起身食早餐喇。」
 
左手從被子抽出來，抓住梳化，要撐起自己。
 
「噗——」身子卻一起即倒。
 
「少爺！冇事丫嘛？」日來晴緊急拿出備用匙，「噝鏈，咔嚓——」
 
開門後，他匆匆把餐盤放在茶几上，就過來看我。
 


「冇事，唔好大驚小怪。咳咳……咳咳……」我咳著說，「有邊一日，我唔係咳住過？」
 
「係呢，今日有咩食？」我牽強笑問，被日來晴扶起，坐在梳化上。
 
突發，胸口抽痛，抽搐一下，有什麼湧上喉嚨。
 
「咳……」咳了出來。
 
「血。」我瞪大了眼，看著被我拉下的口罩。
 


「少爺，你……」日來睛也相當驚訝，「快啲打特效針！」
 
看著他想去碰黑盒子，我拉住了他。
 
「唔洗。」另一手用口罩掩口，「得番三支針，唔可以亂用。」
 
「你食住野先，我去話比老爺知！」日來晴說，想去走廊對面房間。
 
「日來晴，企係度！」我命令，「我咳血既事，唔可以，」
 
「咳……咳……講出去。」
 
 
「點解啊少爺？」日來晴不解地問。
 


「總之，我食完早餐就會食藥，之後就會冇事。」我說，右手去取一件多士。
 
放進口中，咬下，左手用口罩掩口。
 
咀嚼咀嚼，吞嚥，再咬一口。
 
「咳……咳……」每遇上咳就用口罩掩住，停頓就再食。
 
進食十分重要，因為這樣才能獲取體力，去跟病魔戰鬥。
 
這個道理我很理解，所以每當身體轉差，我都會不停地吃，不想吃也要強行吞下去。
 
「少爺，咁……我去叫醫生過黎。」日來晴含淚地說，從房間出去，找醫生叔叔。
 
醫生來到後，又替我做一輪檢查，並從藥物箱中挑選一些藥丸。


 
「試下哩幾粒！」他說。
 
我服完後，表面上舒緩一點，便讓他回去。
 
「咳……咳……」繼續休息。
 
經過今早的咳嗽，我知道自己命不久已。大概，去到美國也等不及抗生素製成。
 
或者，我有什麼想做，就要快一點了。
 
「少爺，今日有冇咩想做？」日來晴默默地，守候在旁邊。
 
坐在梳化，我攬住昨晚的被子，上面仍留有那名少女的餘香。
 


「我想……彈鋼琴。」我說，把雙膝縮在梳化上。
 
「吓？少爺你除左小朋友既時候，學過幾堂之外，已經十幾年冇彈過喇喎。」日來晴說，「而且邊度搵鋼琴比你啊？」
 
「日來晴，咁比張紙我，我係紙上面彈。」
 
「唔好玩啦，點㩒都冇聲出架喎。」日來晴說。
 
「係囉，就算彈晒成首曲出黎，都唔知係咩聲。」我說。
 
「少爺你知就好啦。」
 
我訂婚禮的司琴，她不會是到現場才第一次真彈，和第一次真聽吧……
 
太不可靠了吧。


 
「咁你……幫我搵一個人。」我虛弱地命令。
 
「搵咩人？」他愕然地問。
 
「我訂婚禮上既司琴，一個住二等艙，叫藍藍 ‧ 茱麗葉既女仔。」
 
「點解無啦啦要搵司琴？」他不明白。
 
「我都唔知，只係……有少少想見佢。」
 
「好啦，既然少爺想見，我即刻幫你去搵！」日來晴答應，拍拍胸口，「包係你管家身上。」
 
「速去速回。」、「嗯。」
 
「咔嚓——」門被關上。
 
在他出發後，我心神一直不安靈。
 
抱緊被子，像個變態一樣嗅著少女餘香。
 
等了一小時，日來晴終於回來。
 
「少爺，我返黎喇。」
 
「叫你落去搵個人，屌你洗唔洗，咳、咳……去成粒鐘啊。」我轉身責備，「仲有，人呢？又話包係你身上既？」
 
「我係二等艙嗰層搵左好耐，先搵到一個識藍藍小姐既人，然後話佢好早就出左去。」他一邊解釋，同時關上門。
 
「嗰個女人係咪佢阿媽？佢咁早去左邊？」我連續問。
 
「應該係佢阿媽。」日來晴說，「話佢去左歌舞廳練琴，因為嗰度朝早同中午唔開，應該有鋼琴可以借。」
 
「跟住我就落左 9樓，去歌舞廳搵佢。點知我去到，見到有人教緊佢彈鋼琴，我去邀請佢上黎，佢都唔肯。」日來晴說。
 
「邊個教佢彈鋼琴？」我瞳孔放大。
 
「嘩，犀利！」他誇張地說，還拍了一下手。
 
「係傳說中被上天眷顧既古典樂演奏者、最近獲獎無數、有『神的金手指』之稱的天才年輕鋼琴家——金陰 ‧ 貝多芬爵士。」
 
「佢竟然同藍藍小姐做一對一指導，藍藍小姐今次真係執到寶。」日來晴高興再說。
 
「可惡，冇見一晚就釣到條咁勁既仔，仲要一對一教鋼琴。」我雙手握緊被子，抖抖不放。
 
「仲要唔肯上黎，咳……咳！」
 
拉開被子，我搖搖晃晃地走上前。
 
「少爺……」日來晴憂心地看著我。
 
「幫我打針、Set頭，再拎件型爆既西裝黎。」我說，拿起火爐上面的一柄火槍。
 
「少爺，你想去邊？」日來晴問。
 
——脫下染血的口罩，用火槍點燃後，丟進火爐裡燒掉。
 
「9樓，歌舞廳。」我目露凶光地說。