在夢境與少女相遇後有壞人殺死了我: 第07章 (6)
「都係爸爸唔好，成日掛住係出面做野，唔番黎，要你擔心。」老爸流起淚來，用手巾印住眼睛。
「做咩咁講啊老寶大人？」我問，這次到我掃他的背，靠近問，「喂，你做乜春？」
「你知唔知，哩個習慣係幾時開始？」老爸問，右手輕輕推開我。
「爸爸雖然唔係屋企，好多野唔知，但哩樣野我知道。」他問我，卻沒等我回答就說。
「你最初係想睇爸爸放工番黎。」
實際是我患病之後開始。
「嗰時你日日望住門口條路，冇黎精神，係管家話比我知，我先知道你有望出面既習慣。」
「果然人望高處，你終於大個仔，已經由望地，變成望天。」他感動地說，捏緊手上毛巾，再次印住雙眼。
「最近你叫我搵既天文學書籍，我已經叫左人買，遲下你可以自修，完成望穿天際既心願。」
「對唔住，成日都唔係你身邊，我唔係一個稱職既爸爸。」
他誠懇地，抓住我的手，與我淚眼相看。
「以後仲有咩書想要，即管同爸爸講。望遠鏡要唔要？你想要天文學老師既話，爸爸都可以幫你請番黎。」
喂喂，這個男人，真的是我爸爸嗎？
你在發動商人行騙技能？我望不透。
「吸……泣……」薇薇被感動了。
「程強、世伯，我覺得你地都講得好好，你地係一對好好既父子。」
「我之所以跟住表哥，同表哥一家人生活，係因為爸爸、媽媽都已經唔係度。」
「泣……唔好意思，我只係……好羨慕你地。」她也拿起手巾，想收起淚水。
「既然係咁，不如加入我地既家庭？」老爸誠意邀請，抹乾眼淚，換起一副慈祥的臉。
「係囉，傻妹黎既，洗乜羨慕啫，遲下嫁左過去，咪一家人囉。」紅毛撫慰她說。
看著影帝爸爸，以及不知是真是假，總之很想撮合我們的紅毛。
我在旁邊，右手勾著杯耳，覺得騎虎難下。
「我……真係得？真係可以？」薇薇真誠地問，放下沾濕的手巾。
「點解唔得？」紅毛問，細心呵護著她。
「薇薇小姐咁好，點解唔可以？」老爸也不明白。
接著，她發現我沒有表態，把目光放在我身上，其餘兩人也望過來。
——三雙眼睛，便停留在我身上。
無聲勝有聲，超強的壓力隨之降臨。
看上去，他們沒有移開眼神的意思。
怎麼辦？兩滴額汗沿臉頰滑下。
老實說，我認為剛剛才見面，就決定訂婚，未免太急進，太倉猝，終身大事不應如此兒戲。
要是婚後性格不合，我和她都會是受害者。
而且我是肺癆鬼，把病傳染給她，或者一直要她照顧也不是好事。
我這種人，最適合孤獨終生，不應連累青春少女，浪費別人的青春。
可是基於禮節和我生病的秘密，又不便當場說明。
怎麼辦？我嚥下口水。
「唔好意思，我有少少唔舒服……」我放下杯子，右手指按按額頭。
形勢不對，應先行撤退。
「我依加想上房休息先，順便再考慮一下。」我站起來，退後椅子，「紅毛叔叔，薇薇小姐，下次再傾。」
微笑地向兩人點頭後，便轉身離開。
「喂，佢搞咩？」紅毛馬上毛躁。
「可能暈船。我去睇下佢咩事，你地稍等一等。」老爸說完，立即起身追上我。
「喂，仔，你搞咩？想咳？」他問，右手搭我肩膀。
「無啦啦幫我訂婚，我問你搞咩就真！」我不滿，撥走他的右手，「你明知只會累左人。」
「老竇有苦衷，你當幫下我，頂左佢先。」他眉頭緊皺，焦急地說。
「你遇到咩事啊？訂婚啊，點頂啊。」我不了解。
「實不相瞞，我公司條數依加好唔掂，好需要同銀行高層打好關係。」他望著我說，回復平時認真工作時的樣子。
「點解會咁？」我問。
他拉住我手，不讓我走，望了兩眼附近。
「前排有隻郵輪試航嗰時沉左，死左好多員工，淨係掩口費同賠償金已經洗左一大筆錢。哩隻銀達尼號，都係同銀行借錢先可以起成。」他一口氣說，激動得青筋盡現。
「其中摩根銀行係哩部船既主要投資者，紅毛佢話得事，如果哩單婚事成左，佢答應係貸款上寬容一啲，幫我渡過債務危機。」
「當然，以後郵輪所得既利潤，都要分多啲比佢，哩啲係佢既利益。」
他吸一口氣，看看兩旁有沒有人望住。
「如果唔成，逼住要立即還錢既話。咁公司之後既郵輪計劃，全部都要擱置，可能仲要賣幾部郵輪黎還債。」
「到時我地係郵輪界一哥既地方，就會不保。但哩啲都係小事，影響投資者信心，股票跌到仆街，又冇錢周轉，就好難再翻身。」
服務生帶客人走過，老爸馬上轉身停口。
不一會兒，又望過來。
「而我要你做既，只係同嗰條女訂婚。」他食指，用力鑿住我的胸口。
有點痛，也顯示他很認真。
「加上，唔知點解佢屋企好想嫁走佢，哩件事算係我地兩家互相幫忙。」
「但個女仔只係得十五歲，點可以將人地拉落水。」我不忍心地說。
「嗱，聽住。」他靠近過來，「訂婚既玄機就係哩度！」
「佢唔夠十八歲，未咁快可以結婚，起碼仲有三年。如果哩三年，公司已經恢復元氣，你又決定唔要佢既話，我咪幫你取消婚約囉。」
「你有病，正好可以光明正大話唔想累人，然後斬纜，斷手尾。」老爸理所當然地說。
「何況哩三年，佢又要係第二度讀書，都唔會有咩時間見你。你既婚約，只係一張紙，對你既生活基本上冇影響，但對公司就影響好撚大。」
聽了這話，實在很難不被說服。
考慮了幾秒，態度漸漸轉弱。
「之後，真係可以取消？」我問。
「係啊，到時你有第二個鍾意既人，咪揀第二個囉。如果你鍾意佢，覺得佢愈大愈索既，咪舉行婚禮囉。」
「如果你已經死左，至少都幫過老竇丫。天父會識同你計數，加你孝順分既。」
「唉……」我深深地嘆一口氣，閉上眼睛，再考慮數秒。
「好啦，我答應啦。」
「乖仔！」老爸拍我手臂，重新展現笑容。
「咁我地依加返去同人講聲，唔好要人等咁耐。」他說完，把我拉回去。