在夢境與少女相遇後有壞人殺死了我: 第03章 (3)

通過兩道城門，我跟著春郎，進入宮中議事用的「前朝」區，再沿著西城牆走，經過居住和宴游的「內廷」區，直至去到北門。
 
因為北衛禁軍的總署在北門。
 
「換左佢，快啲。」春郎替我索取一套深紅色的侍衛服。
 
「係。」我雙手接下，還有黑色官帽和腰帶。
 
更衣區內，四下無人。
 


左穿右穿，左包右疊，腰帶繫身，戴上網狀的帽子。
 
「冇你碼數既皮靴。」春郎苦惱，「但唔緊要，你隻腳同我一樣大，我可以借一對比你。」
 
「真既？」我心生歡喜。
 
「但你要答應幫我一件事。」他右手指勾著一對黑色皮靴，「因為哩對係靚野黎，著左佢會跑得好快，唔可以隨便比人。」
 
「吓……咁你要我幫啲咩？」我問，又伏？
 


「幫我頂更，因為我約左人，一陣唔得閒去看守純真宮。」春郎說。
 
「咁都得？」我問，「你約左咩人？一定要去？」
 
「實不相瞞，我約左樂溫公主私會，冇得唔去。」春郎說，眉心緊皺。
 
「頭先你唔係話，要我記住宮規咩？」我壓低聲量，「第一百一十一條，絕對不可以對公主有任何非分之想，否則斬立決。」
 
「你唔明架喇，哩個時勢，梗係做駙馬好過做兵啦。」他說。
 


「咁大分別咩？」我問，「你應該都係唔憂柴、唔憂米嗰批人黎架啦。」
 
「做駙馬，就係皇親國戚、皇室成員，比人保護。做侍衛就係保護人，你話相差幾遠？」他問。
 
「咁公主哩種才貌俱全既女子，如果可以娶得到，又真係唔錯既。」我陷入遐想。
 
「才條毛咩，膚淺到冇朋友。樣更加唔好提，全部公主都豬撚到仆街。」春郎突然激動。
 
「吓？」
 
「所以皇上先特意係民間搵左個女仔番黎，收為養女，策封公主，用黎嫁去吐蕃，免失國體。」
 
「你指聽日出發既純真公主？」
 
「係啊，全部公主之中佢係最靚。」春郎直言，「只係……」


 
「哩個公主好煩，成日想偷走，又講埋晒啲奇怪野，唔係咁易頂。」他又說。
 
「喂，你陣間看守純真宮嗰時都要注意，唔好比佢偷走。唔係既話，你死梗，我都死梗。」他把靴子拋過來，「嗱，拎去！」
 
「真係要我頂你更？」我一臉不願，接住靴子。
 
「係呀，兩個時辰我就會返黎。」他說，「但去之前，帶你去見一見阿頭先。」