在夢境與少女相遇後有壞人殺死了我: 第03章 (2)

「我地大唐王朝，歷來與西域吐蕃保持友好關係。早前，皇上已答應與吐蕃聯婚，將純真公主嫁比吐蕃新上任既讚普。」
 
讚普即是吐蕃王。
 
「由於出嫁在即，需要侍衛伴行，所以我地連日黎都不斷招收新人，協助護送公主。」春郎說。
 
「即係，我要護送公主去……吐蕃？」我呆了口，「全程……行路？」
 
「嗯，冇錯。」他點點頭。
 


「咁同唐三藏取西經有咩分別？」我問，嚥下口水，「人地都……有隻白馬丫，我要行。」
 
「天竺遠好多。」他笑笑，「而且你地同埋嫁妝團隊、侍從等等一大隊人去，唔洗愁喎，肯定三餐都好豐富。」
 
「你係要諗點回程啫，其他都冇咩擔心。」他再說。
 
「我諗……我要考慮下。」我欲退堂，畢竟隔壁還有另一帳篷。
 
「唔洗諗喇，填左哩張野佢，印個手指紋，咁……」春郎推前一份文件，捉住我姆指，印了個指紋。從桌下取出一柄木刀，「咁哩把木刀就係屬於你。」
 


「嘩，真係比把木刀黎……」我有點嫌棄，「有冇把好啲既刀啊？」
 
「我同你講啦，木刀先正啊，夠輕身。」他分享。
 
「但……」我欲反駁。
 
「你知唔知點解我把刀咁短丫？咪就係貪佢夠輕身囉。」他拋接一下，「你試下托住把巨斧站一日崗丫，你哩世都唔會想再掂到把野。」
 
「但如果遇到刺客，木刀點夠做啊。」我問。
 


「你哩句我真係唔同意。」他搖頭，「點可能遇到刺客呢？我做左咁多年，連把刀都未拔過出黎。枉我武功蓋世，唉，白練左十年。」
 
「我覺得……」我說。
 
「比把屠龍刀你好唔好？隔離帳篷大把。」春郎不耐煩。
 
「隔離帳篷咩部門？有屠龍刀咁正？」我心思思，想狗衝。
 
「專屠『巨龍』既刀，你係咪要？」他問。
 
「專屠巨龍既刀……屠龍刀。」我覆述一遍，立即龜縮，面色發青。
 
原來那邊是招募太監。
 
「班閹狗最近好活躍，唔知暗地裡策劃緊啲咩。」春郎臉露擔憂，「不如派你去調查下。」


 
「唔洗喇唔該。」我謝絕。
 
「咁快啲填左張野佢啦，陣間帶你去攞官服，同埋見一見上級。」他點一點墨，遞上毛筆。
 
我接過筆，慢慢填寫。
 
衣服：中碼。
褲袋：不需要。
鞋碼：八。
 
「之後帶你去『純真宮』認下路，聽日純真公主會由嗰度出發，你今晚好收拾細軟。」春郎說。
 
「聽日？咁快就要走？」我驚問，完成最後一筆，填好申請表。
 


「同埋，哩本係《侍衛守則一百三十三條》。」他又遞上一本厚書，「陣間一有時間就睇，唔係你犯左宮規，比人拉去閹，唔好搵我，唔關我事。」
 
「吓？」我再次面青。
 
「不過又唔洗咁驚。最重要，都係第一條，同埋第一百一十一條。」他收起表格，小心核對。
 
「一、絕對服從皇室成員命令，否則斬立決。」
 
「一百一十一、絕對不可以對公主有任何非分之想，否則斬立決。」
 
「哩兩條，要刻入腦袋，死都要記住！」他提醒。
 
「係既，我會記住。」
 
「好，哩個係你既身分證明，帶住佢就可以出入半個皇宮。」春郎一手遞刀，一手握來。


 
我一手接過木刀，一手去跟他握手。
 
「歡迎加入北衛禁軍！」他親切微笑，搖搖手後鬆開。
 
我心想，伏已中。