<<現代驅魔文獻>>: 第二章：地藏獸誤遇妖精 五谷夫細道略謀
第二章：地藏獸誤遇妖精 五谷夫細道略謀
（昆吾篇）剛從中六升上中文大學，的確有點不習慣。宅男的我就連O Camp也沒有參加，只是留在家中。但我卻不喜愛打機，只愛玩紙黏土和研究一些巫術。所以中學時不少時間也留在家中享受製成品的成功感，最多也只是在學校當個黏土學會的導師。所以這般宅男的我甚至連女朋友也沒交過。。。
因為我主修的是中文，順理成章便進了新亞書院，入宿知行樓。當開學不久時其實已經聽室友講到不少中大的鬼故。同時也很開心，開學一個月左右便認識了在中大的第一位朋友，他也是我的室友－唯銘。
他同樣是一個宅男，但他喜愛的卻是玩遊戲王的卡牌遊戲，確是令人難明。幸好有共同話題的是他也很喜愛鬼故，而我喜歡巫術，總算有半個共同話題。
今夜，我跟他晚飯後，坐在位於新亞書院最好景致的地方－天地亭，能飽覽整個吐露港景色的好地方。
「係呢Gary，有無聽過呢到最出名既辮子姑娘？」
「當然有，好似唔少師兄有親眼見過？」
「都成二十年前既故事喇，話說當年有個大陸女仔唔知咩原因坐火車到香港，但係附近既火車站跳軌時被扯甩左頭皮，但仲一直爬到我地新亞書院先失血過多而死。。。」
「聽起黎都恐怖，但真係到而家都無人可以確定真偽。」
「我認為你認真便輸了，哈哈哈哈！」
「當然啦，有女鬼都唔會搞宅男啦。」
「咁其他既鬼故呢?」
「好似都有唔少，聯合書院湯宿果邊又有、情人路啦、蒙文偉樓、荷花池、醫學樓，就連我地隔離既志文樓等等好多好多。」
「睇黎，黎緊呢四年既大學生活應該幾有趣。」
其實我不是不相信這世界有鬼，只是事不關己，己不勞心而已。每間大學也傳言不少這些鬼故事，但又有幾多人上心？暫時到現在我和唯銘每天上堂也不錯，教中文的那個戴教授也很風趣，上堂無悶場亦人人專心上課。
大家也很喜歡上戴教授的課，基本上也是零缺席率。但不知什麼原因戴教授總喜歡在課堂上不時講到一些靈異的事情，要叫我們晚上小心。
大學除了我們新亞書院，其實還有祟基書院、聯合書院和逸夫書院。基本上除了逸夫書院較少靈異傳聞外，其他的都傳聞不少。
雖然我是新亞人，但也經常一個到祟基書院的飯堂食飯，因為該餐廳是面對祟基書院其中一個很出名的荷花池，畢業時間自然更加熱鬧，是拍畢業照必到地點之一。但我卻欣賞此處鳥語花香，不像山上的悶氣。
不過聽說荷花池深夜有女鬼出沒，會拉男生到湖裡溺斃陪葬。不過也是傳聞，我從來未聽過這真正的故事。但也很奇怪，我差不多每次到這裡午餐晚餐也碰見一個男，他是一臉嚴厲的樣子。應該也是今年的新生吧，因為看上去跟我差不多年紀，樣子稍為成熟一點。每次他也是死死的看著荷花池，好像在盯著什麼一樣。
秋風起，十一月大家也比較早睡覺，所以入夜後比較少人離開宿舍。但最近一個星期，唯銘也會鬼鬼祟祟深夜十二點左右離開宿舍，凌晨三四點才回到宿舍。無論我如何追問他也守口如瓶，今晚我終於決定跟蹤他究竟去哪裡。
一直在遠處跟著他，怎料到原來他跑到荷花池的小亭裡好像在等人一樣。我便靠著遠處的幾株樹後躲著監視。過了一會，一名穿著白色連身短裙的少女，看似應該跟我們差不多十八十九的，長得婷婷玉立，可惜樣子卻因太遠而看不清，應該也是一個女神吧，哈哈！
他們繼續有講有笑，之後還一起玩遊戲王的卡牌遊戲，真是把我這宅男葡萄了。雖然看不清樣子，但相信也不會是件「豬扒」，沒理由收兵也要陪玩遊戲王這般無聊啊，之後我也悄悄回宿舍睡覺了。
第二天，我約了唯銘一同到荷花池邊的餐廳午餐。
「唯銘，你就享福喇。好似追到個女神，唔識兄弟喇。」
「講呢啲，我從來無諗過會有女仔玩遊戲王。而且仲要咁岩嘴型！」
我更加葡萄地說：
「不要說了！」
「不過唔好講出去啊，佢唔想俾人知我同佢一齊架。。。」
「OH。。。咁恭喜你脫毒喇，我仲要繼續毒落去。。。」
接著下來的日子，看見唯銘一天比一天精神差，而且更見他長了一對熊貓眼。
當然，夜夜外出，四五點才回來，第二天又要一早上堂，精神怎會不變差。我在下課後想勸告他其實不必隱瞞兩人關係。
「唯銘啊，會唔會個女仔係想收你做兵啊。。。」
他從未試過對我這麼激動：
「你講咩啊？素珠唔係呢啲人黎！你唔好再係我面前抵毀佢啊！」
我也頓時被嚇壞了。
「我唔係咁既意思，講下姐。。。」
「講下都唔得！我已經叫左你唔好管我。我同佢既野關你咩事！」
我也不敢再多言了，只好一人回到宿舍。之後我拿起黏土，弄啊弄啊，兩個小時後做了一對人形公仔，打算油上顏色後送給唯銘當是一個賠禮。啊！？想起了他的女友名叫素珠，不如我去聯合書院那邊問問素珠是誰也好，讓我也一睹她盧山。
我在聯合書院走著，不覺意的坐在湯若望宿舍，人稱湯宿外面的草地上坐著。自己又是宅男，根本還沒認識到任何朋友，真的苯了！下午四點肚子都餓了。
我漫不經心的走到湯宿旁的飯堂，買了件三文治喝著奶茶。坐了很久，突然之前在祟基書院常常碰見的那個嚴肅男竟坐過來我面前，跟我搭著訕。
但見他仍是一臉嚴肅的。
「係大學我叫Frank，驅魔界中，人稱五谷夫‧周后稷。我家三代為隱世驅魔師，到我呢代已經第四代喇。我自細已經學習驅魔，出道至今三年。所以馮知道我身份既，都叫我后稷。」
其實我一臉無奈地回答：
「哦。。。我叫Gary，只係一個普通既大學生。。。你話你係驅魔師？我只係一個黏土導師咋喎（我不禁說時笑了），你做咩突然同我講呢啲？」
「一個滿臉暗瘡，經常玩遊戲王卡牌既四眼肥仔，係你既朋友，岩嗎？」
「哦！？你點知？你同唯銘係舊同學定朋友啊？」
「原來佢叫唯銘，我幾經查探先搵到你係佢呢到唯一既朋友。」
「係啊，佢個人比較孤癖少少，唔太鍾意同人講野。其實我都係咁。。。」
「Gary，唔怕同你講，其實我跟蹤你個朋友好多晚。佢出左事喇。。。」
我緊張起來回應：
「佢可以出咩事？」
「其實我都係今年先入大學。但當我一見到呢個荷花池時已經察覺到好大怨氣，所以自此我一直都好留意呢個池，而且亦都搜集唔少資料講幾年前有個呢到既女學生因佢既男朋友呃佢每晚十二點黎呢到約會係想保守秘密，實際上係因為個男仔根本就有女朋友，所以先保密只約佢深夜見面。但有一日終於俾個女仔下晝時撞破，最終於果晚佢就係十二點時約左個男仔出黎係佢面前投湖自盡。最終學校因為保住名聲先遮掩左呢個消息。」
「我聽過唯銘講，個女仔好似叫素珠，后稷咁你有聽過嗎？」
「名字就無，但我可以再去搵下資料。」
「咁唔通你想講既係素珠就係果個自殺既女仔？嘩！咁咪不得了！唯銘即係同隻女鬼拍拖！？」
后稷做出了想叫我減低聲量的手勢。
「殊。。。唔好咁大聲。嚴格黎講，唔係撞鬼，而係撞妖。」
「妖？真係聽到我一頭煙？咁唯銘而家點啊？你話你係驅魔師啊麻，快啲幫我救佢啊！」
「果隻係荷花妖，依我既經驗佢係由女鬼轉化而成妖。因為佢係投池自殺既，而且我相信佢怨氣唔少，積聚係附近屬陰氣極重既既荷花植物到，所以佢先可以轉化成妖。而你朋友正正係被呢隻荷花妖迷住，如果再唔救佢既話我擔心佢如傳聞中會被拉到池裡面被吸食靈魂。」
「咁你係驅魔師黎架麻，你仲唔快啲去救佢！」
「放心，因為我唔知果隻荷花妖本事有幾高，所以一直每晚係遠處監視，希望可以搵到蛛絲馬跡知道佢本事之高先去收服佢。而今日我難得可以搵到佢既朋友，自然你可以幫到我睇下佢有無被隻女妖長期迷惑。」
「咁點解佢要長期迷惑一個人？唔直接殺左佢既？」
「因為妖精需要吸收動物既靈氣作食物，有啲就會以禽畜靈氣為食物，有啲就會以吸人類靈氣為食物，直至果個人差唔多被吸乾，就會將佢殺死，連靈魂都唔放過，正係我地所謂既食得唔好嘥。」
「咁恐怖？其實你講緊既唔係鬼故？全部都係真？」
「當真，所以更加需要你既配合我先可以更有信心對付呢隻荷花妖救番你朋友。」
「雖然聽落去真係令人難以至信，但唯銘真係好似越黎越唔妥咁。我可以點做？」
后稷一邊說著一邊跟我交換了電話。
「你只要拎走佢被人迷惑既物品，咁就可以解救。所以你如果有消息盡快whatsapp我，聽日我地再見吧。」
可能逗留室內時間久了，感覺較暖，所以我脫下外套打算提著慢慢步回宿舍吹吹山風，后稷竟然瞪眼看著我手臂上的兩條疤。
「等陣，你兩條疤係天生既？同埋你話你係黏土導師？」
雖然我知道宅男最忌有自信，但終於遇上我唯一可以自豪的一刻！哈哈！
「係啊，黏土你又岩？我已經連續兩年全港黏土作品比賽冠軍喇。條疤成個二字咁，你都覺核突？」
后稷卻沒有回答我，只是非常疑惑的嘀嘀咕咕道：
「難道。。。你。。。你係陶藝鐵匠，地藏獸‧昆吾。。。」
他便獨自離開了。