<<現代驅魔文獻>>: 第一章：風后聚義鬼容區 先生授降諸妖魔
第一章：風后聚義鬼容區 先生授降諸妖魔
（大鴻篇）二零一九年七月二十二日，經歷了昨天的事情。。。今天來到梅窩鹿地塘一家有圍牆包住五間村屋，我叩門後黃伯應門，說：
「哦！原來係教授啊！請入黎！」
在一個廳堂中，黃伯為我倒上水酒，我問道：
「黃伯，一切安好嗎？」
「好，好。。闊別幾年，今日見教授白頭髮多左好多，辛苦曬。」
「我身為教授，保護學生百姓就係天職。更何況我仲係轉世驅魔師。。。」
黃伯感嘆道：
「尋日新聞既直播，我到死都會記得。如果你地大哥係到，一定。。。」
我止住黃伯的話，說：
「我想去義雲廳行下，可以嗎？」
黃伯領我進了屋旁另一間村屋，地下門前並沒有牆身及門，門前上掛一塊牌坊，上書「義雲廳」，連露天地方佔地二千尺，中間兩排放住一百零八張木椅，各椅上皆插一旗，寫住各英雄好漢的名號，我看著「鬼容區 大鴻」，是我以前的座位。。。
全部座位上右旁亦置有一個兵器架，擺放著原本屬於座位主人的兵器。金龍禪杖、紅花偃月刀、青龍泉戟、虎豪朴刀、鐵脊蛇矛、瀝泉畫戟、紅花霸王槍、金蛇雙鞭、至滅金輪槍、山神龍柱等九十多件名門兵器。一邊細看，一邊忍不住落淚。。。
我走到屋裡盡頭，階上一級有三張木椅坐北向南，面向門外，我雙膝跪下來，向住三張無人坐的木椅，含淚抱拳說：
「大哥，小弟愧對你既教悔。。。今日天下大亂，一身本領，本來就應該扶難濟世，奈何你地都先行一步。。。小弟，真係無能為力。。。」
閉上雙眼，回憶起以前的一切。。。
二零一三年九月的下午，「噗、噗、噗。。。」我的跑步聲令坐於港鐵車廂中兩旁的乘客用「八掛」的眼神望著一個穿著畢直西裝的中年男人究竟為什麼會在車廂內如此失禮。
我一直從車頭向著車尾的方向跑，視線一直也離不開前面的女生。因為我在追她，她便是我的「獵物」。平凡人眼中只看一個中年男人在追著一個少女。而「她」其實一直只會待在他們的世界，在一九九七年才開始走進人類的世界。
惡魔，在人間霸佔了人類肉體後，幻化成人，建立邪魔勢力。而我的責任便是獵殺出現人間的所有惡魔，因為我是一名轉世驅魔師。
今次的她是蚩艾，屬於蚩尤旗下七十二惡魔之一，原本的真身，外形是有如一隻六腳貓，有著老虎尖牙，六條腿也擁有利爪，更長著一條長長利刺的尾巴。她在車廂內一直逃，我一直追著她跑。當差不多到車尾時，車站已到九龍塘站，而她亦逃出車廂了。
我喃喃自語著：
「又俾佢走甩，成日都失敗，食碗叉燒瀨！」
當我回到中文大學的中文系教授辦公室，便立即拉著另一位教授共膳檢討。她真正身份其實是我們的軍師風后，江湖人稱智文星。
《古本紀年》中有詩為證：
古帝雙淚風凌渡，巾幗孤飛仙台路。
風后握奇平涿鹿，腹懷智謀藏天數。
我問：
「軍師，仲記唔記得以前我地係涿鹿，對付陸上速度第一既修蛇係用左咩方法？」
衣著成熟大方得體，束著一個髮髻，充斥著古代氣息的一位三十多歲熟女回答說：
「大鴻，你我當年同為黃帝籌謀之時，記憶尚未全部回復？」
「先生既廣生鏡，我用過幾次都仲有好多回憶係好朦朧。」
「大鴻，你本身既念力術，定型魔法尚未取回之時，自然會較難發揮。」
「唉，睇黎以我既本事都莫講對付蚩尤復活，而家就連佢麾下既七十二惡魔都未夠料對付。」
「先生曾言，你我職責更應該盡快聚義其他轉世驅魔師，集合我等力量作好準備，對抗邪魔力量。」
我們用膳後，軍師便已經上課去了。
大鴻這個名其實到現在我還未習慣，而且還有個外號叫鬼容區。但先生吩咐過，若然可以在日常生活多呼喚遠古時的名字，記憶便會慢慢猶新，古時擁有的法力和能力便能重拾，到時方有本事與蚩尤軍團一戰。
其實我行年差不多四十，雖說是個大學教授總算衣食無憂，但卻一直被太太笑說像個大小孩，沒什麼目標。話來也是，自博士畢業，一直也在教學生涯中渡過，並無什麼所長，幹過什麼大事。。。
三個月前，新加入我們大學中文系的風教授有天跟我打完網球，在大學飯堂休息嘆茶時。。。
她首次展開笑容說：
「戴教授，原來你手臂受過傷？」
「手臂？無啊，我一出世呢個疤已經係到。其實我都覺得好古怪，一出世條疤係兩條一長一短既直線。」
「哦？原來如此。今晚其實我約左位鍾情我國歷史既學者晚飯，不如戴教授共同聚餐好嗎？」
「風教授客氣喇。有人請飲酒，特首都想走啦！既然有朋友興趣係我地強項，大家咪交流交流。」
「一直聽聞戴教授談笑風生，為人時髦，能與學生打成一片。今日同你玩樂一天，果然幽默無比。」
「哈哈哈哈，唔係衰多口，點會咁出醜啊！」
當晚到「先生」家中作客，便是第一次遇見「先生」。
一間豪華別墅屹立飛鵝山上，整間屋有不少手執長棍的保鑣把守，像是個古代的大官人家一樣。進入外圍大閘，繞過花園，進屋後便看見大廳，眼前的竟是一名氣宇軒昂跟我差不多年齡的男子。
他身穿全套連馬甲的整齊西裝，打著煲呔，口中抽住一口雪茄，雖見現代人的樣貌，卻有種古代的英雄氣蓋。
他的一笑有如皇帝向平民說一聲跪安一樣令人樂而生畏，不禁惹起八般感覺。而全程風后亦只稱呼他為先生，所以我也不敢多問稱呼，可能是社會上想隱姓埋名的有錢人吧。
晚飯閒聊一些歷史話題後，先生終入正題。他抽著雪茄說：
「我有一面廣生鏡，可以一試前生為何人。教授有興趣一試嗎？」
「哈哈，有咁得意既野，試下都好喎。」
接過廣生鏡後，雖然望著望著，卻像進入了另一個世界。慢慢我便看見在上古炎黃時代的我所發生之事情，好像在看一場古裝劇一樣，叫我疑幻疑真。
先生說：
「我知道你睇見咩野，不必好奇，因為你就係大鴻。昔日為黃帝麾下，曾領軍助黃帝突圍困境。而我呢面叫做廣生鏡，可以話係前世鏡，能夠睇到前世既你係邊個。」
其實我很驚訝，如果是真的話，為什麼自己有如此本事今世卻像個呆子般當個教書？
《古本紀年》中有詩為證：
心存明志不囂靜，待客一團和氣盛。
趣看黃沙大鴻嘲，送見閻王非薄命。
先生繼續說：
「教授，如今貪官橫行，瘋人亂政，引致香港，以致各地民不聊生，甚至連電視呢種平民娛樂都慘不入目，毫無選擇，邪魔豈會唔乘虛而入？」
我疑惑著思考先生的說話，他繼續說：
「而家我最擔心既係。。。多年來，七十二惡魔一直係人間積聚力量，等待蚩尤復活，但驅魔界多年黎從來都未能團結。。。」
「等陣先，你既意思係。。。我去做驅魔師？」
軍師插嘴說：
「教授，我等正聚義上古轉世既賢臣將領，方能對抗蚩尤既大軍。」
「講得岩，而風后正是當年黃帝麾下第一軍師，為炎黃聯軍出謀獻策，最終成功殲滅蚩尤。相信佢就係見到你手臂上既疤痕，只有屬於上古轉世既賢臣將領先會有咁既疤痕。長果條代表黃帝，短果條代表炎帝。」
「我。。。嗯。。。」
「大鴻，希望你以後可以共同為驅魔呢條路出一分力。」
我沉默了一會，回答說：
「我一世人都無咩成就，有咁偉大既機會，有前無後，打死罷就！」
「大鴻，以後你就成為驅魔師，我會慢慢教你點樣驅魔，黎緊就到我家學習吧。」
之後的日子，趁著晚上時間，因為我也沒有堂，便到先生家中學習上堂。先生為我們倒上白蘭地，自己點起雪茄，說：
「大鴻，當年你既本領就係念力術，可以透過精神對物質既影響，就係所謂既隔空取物。」
「聽落好似好科幻？」
「其實念力術第一步就係自信，自己必須相信自己既能力同上古時代自己既力量。」
「先生，我可以點樣練習？」
先生抽口雪茄，回答說：
「首先我會教你點樣幫助被鬼魂附身既人，即係俗稱既鬼上身。你要小心對鬼魂，因為佢地其實死後只係一種力量，實際係存在第二個世界，我地驅魔師會稱果個世界為鬼城。」
我也開始習慣喝這些高度數的酒精，說：
「咁鬼上身，係咪好似啲西片拍到咁勁？」
「鬼魂其實唔係個個都可以做到上身既效果，一般鬼魂最多只能令人既肉眼可以睇到佢地，但根本互相接觸或者傷害唔到。如果呢個鬼魂本身怨念極深，就另作別論，同念力術其實有異曲同工既道理。正因為怨念深，先可以做到一般鬼魂唔能夠做既野，包括鬼上身同製造幻覺。」
「幻覺？咁比如佢會唔會做到移動物件呢類？因為睇鬼片有時啲惡鬼都可以做到。」
「鬼魂因為只係一種力量，係現實黎講，佢唔能夠違反物埋定律。例如移動物件或者用手掐死一個人。但佢地可以製造幻覺等你以為去左某一個空間場所，但其實果到仍然係你屋企。又好似掐一樣，其實係你自己對手掐住自己而死。警方成日都有呢類『自殺個案』，但無公開。」
「換句話講，係心理學既層面就係如果信念堅定，幻覺就可以克服？」
先生打著煙圈，品口酒，認真回答說：
「無錯，但鬼上身就唔同。只要果個人情緒低落同陰氣過重，呢種怨靈就會附身去完成佢可能需要透過人類身軀先做到既事情。同時由於佢已經進入左果個人身體，反而本身怨念本應帶俾佢既其他力量就會此消彼長，所以當鬼魂附身後就失去製造幻覺既本事，而且我地驅魔師自然對呢個被附身既人做任何攻擊或接觸，呢個怨靈都會感受到痛楚。」
「咁睇黎對付怨靈，如果等佢上身後仲比較容易對付？」
「被附身既肉體其實如果俾附身越耐，本身既靈魂就會越虛弱，二十四小時內如果唔幫佢驅番出黎，原本既靈魂就會魂飛魄散，俾怨靈或者惡魔霸佔到佢既身體。」
我疑惑地問：
「如果真係時間過左廿四小時，咁應該點處理？唔通殺左個人？」
「一定要殺左佢，因為即使你成功驅到個怨靈出黎，佢只會再搵第二個人。反而殺左佢，佢會因為違反大自然定律，每個靈魂皆有一次做人既機會，而佢因剝削左對方既生存權利而永遠不能再投胎，令佢再死後便魂飛魄散。」
「明白。。。咁我可以點做？」
「佛教會用念經去所謂超渡，其實就係一種群眾念力令怨靈減退怨念，自然容易收佢。羅馬天主教既方法就係用經文驅逐，其實就係念力術既自信。我地只知道有造物者，又或者我地無信仰既驅魔師只信有既天意，根本佢地只係用自己既能力去驅趕，但將功勞歸於佢地既宗教而已。只要你心存正義，就係我地中國人所講既陽氣盛，就能夠驅魔。」
「即係。。。？」
「如果鬼上身只需按實佢個頭，心存正義力量，相信自己有能力可以對付邪靈，大聲告訴呢班怨靈知，要驅趕佢地便會成功。」
「咁簡單？」
「本身就唔複雜，加上你係轉世驅魔師，就更加簡單。只要慢慢法力恢復，呢班怨靈或者鬼魂點會係你對手。等你有機會實戰過後，我再教你如何對付蚩尤既七十二惡魔。」
就這樣，一個月的時間我便閱讀了不少惡魔的資料和跟隨先生學習如何用自身的力量作驅魔方法，可惜一定要惡魔處於近距離正面交鋒或者已上到人類身軀時方能用得著。
但偏偏第一個不是遇上鬼魂或者怨靈，而是一個速度型的惡魔蚩艾，所以兩次也是被她跑掉，始終尚未真正實踐過。。。