欠債還情，天公地道: I WANT TO PLAY A GAME

「I want to play a game……」正當我趁我老母又將我獨留家中，留留地拎左部IPAD係度睇緊戲既時候，突然全屋既燈光閃左一閃。
 
而家我背脊，亦都突然寒左一寒。
 
戲入面果個帶住面具，踩住部三輪車既仆街侏儒，竟突然從螢幕入面飛左出黎。
 
「嘩！！嘩！！屌你老母！！IPAD都有3D呀!!!」我忍唔住嚇左一大跳，差D屎都瀨埋。
 
只見一對白色既翼突然從隻侏儒身後爆出黎，然後佢慢慢飛起，飛離佢架三輪車。
 




屋入面既燈光繼續有節奏咁一閃、一閃。
 
而我堆屎亦都跟隨著節奏，一舊、一舊咁跌出黎。
 
佢愈飛愈近，終於飛到黎我面前。
 
而我亦終於連尿都瀨埋出黎。
 
佢除左佢既面具，
 




露出一張好可愛，好天真無邪既臉孔。
 
係天使。
 
「我屌你咩……」我不自覺咁屌左出黎。
 
然後，佢用天籟一樣既聲音慢慢咁講：「你好，我叫邱比特。」
 
我呆左，唔識反應。
 




「你……你係神？定鬼？」我問。
 
「你鐘意點叫我都無問題。係你地既角度黎講，我應該有個外號係叫做「愛神」既」邱比特不徐不疾咁回話。
 
「咁……咁你搵我……做咩？」我仲未驚完。
 
「唉，睇你個死賤精，上次土地好好地咁同你講，你就串柒柒咁。而家我係咁意嚇下你，你就好聲好氣啦？」雖然邱比特係爆晒粗咁，但佢把聲都係仲係好溫柔。
 
「拿，今次我黎搵你，係講埋上次土地未講晒比你知既野，你留心聽啦。」
我乖乖咁點下頭。
 
我始終都係一個香港人，我認我係欺善怕惡。
 
雖然明明邱比特都唔算好惡，但可能佢始終係洋腸，對我呢Ｄ香港人黎講係好有攝服力既。
 




「詹正光，今世名字係陳惜。你上世對另一人有一個承諾，今世你必須做到；如果你做唔到，就連續五世都要做畜生！呢樣野上次土地都有講過架啦。我今次黎係比個正確方向你既。首先，你上世既記憶仲保留住，係我地故意對你既優待，因為你今世做人既目的並唔係黎學做人，而係黎還債，所以唔需要你再從頭學起啦！第二，就算你今世飛黃騰達都好，你做唔返你既承諾，接住落黎果五世都有排你受，所以今世既野就當係你最後的晚餐啦！第三……」
 
「喂喂!!!等等先，重點係：我到底承諾左Ｄ咩呀？」
 
「哈! You Got The POINT ! 你上世係一個發誓當食生菜既人，所以你記唔起係一Ｄ都唔出奇既。不過唔緊要既，我相信你承諾別人到下世都要做到既野應該唔多既，你慢慢去思考下啦～」
 
正當邱比特慢慢退後打算消失之時，我用一身屎尿既身軀撲向佢。
 
「嘩！！喂你好臭呀！做咩呀你！」邱比特問道。
 
「我知啦！我知啦！我應承過馬會，下世一定要中三Ｔ，係唔係？」
 
「痴線，你自己好好地諗下啦！比你最後一個貼士：你個誓言係你死前30秒發既。」邱比特用手中既弓一下打落我既頭上，然後就飛走左。
 
只有BB仔身軀既我，當然想追都追唔到啦。




 
「嘩乖仔，做咩鬼你咁臭既？快Ｄ換片先！」VICKY開門入黎。
 
望住一片迷茫既我。
 
 
到底，到底我今世要做既係咩野呀！！！！！！！