那些年，當香港仲係百鬼夜行既時代: 8. 達德小學VII -- 蠱毒剋星

佢語音畢落，腳下一群大蟲小蟲即刻前仆後繼向我地狂奔而黎。老實講，我住得山村，自然就唔太怕蟲。但係上百隻加大碼既蟲衝過黎都真係有D心驚膽跳。佢地當中有手臂咁長既蜈蚣，有手掌咁大既蜘蛛，有半人高既蛇，仲有好多識飛既奇怪野。個群蟲見到我地好似見到食物咁，開心到呢.... 我立即拉起雨瑤，腋下夾住隻飛頭蠻，腳底抹油，轉身就跑。依家唔走，遲D仲邊有機會走呀!?雖然我地跑得快，但係始終快唔過D四對腳既蟲。我見佢地追到上黎，我唯有一腳踩落去!被踩既係一隻蟑螂咁既野，比我踩爆之後，頓時汁液四濺，什至有D彈左上我隻腳到。我小腿突然一熱，赫然見到附係小腿上既蟑螂汁液可以侵蝕我隻腳!我開始感覺到有D刺痛既感覺。我撕爛衫袖，忍痛將小腿上既汁液抹走。 「瑤，唔好踩死D蟲，D蟲有問題!」 我地又急速穿過左間房，黎返頭先間雜物房。我地無作停留，又不停左衝右插，希望可以暫時離開個蠱師。 跑左成三個字，終於甩開左佢地。我同雨瑤都坐係地下休息。 「呼呼...點搞呀...好多蟲呀...」 「佢個D蟲就係蠱蟲...要搞唔係唔得，只係我地手頭上無架生...」我思考左一陣。道家好少同雲南蠱降連上關係。一，係因為雲南地方偏遠，好難入去傳教。二，人地蠱降又係有真實力，唔需要學道法。 就係我思考緊個時，我突然見到有條蛇係雨瑤後邊晃頭晃腦。條蛇話細唔細，但係又無去頭先個條蛇咁大條。大約半截手臂咁粗啦。唔通又係蠱!?但係無可能!一種蟲類中只可以有一條，如果唔係都唔可以叫個種蟲既王。頭先個蠱師已經有條蠱蛇...咁呢條... 我靈機一動，「你唔好郁..」唉，又黎，我做咩又講呢句。雨瑤本身已經係入左高度緊張，繃緊既狀態，一聽我講呢句，佢又撲埋黎。佢一郁條蛇又郁。但係好彩，條蛇移動速度絕對唔快，所以就算佢郁我都好輕易捉左佢。

我抽出三張張符紙，然後，我咬破自己既手指。我今次要以血入咒。 「無上五行，三魂永久，天罡護身，出幽入冥 ，為吾開路!急召土地護我身!」 無錯，第一張符係再次加強返我身上既土地咒，我用原子筆入符其實威力係好細。比起我師父係東華義莊個次請既土地至少爭十倍威力。今次我以血入咒，我諗應該只係差五倍啦掛。五倍都夠啦。 其餘兩張，我都渣係無拎住蛇既手入邊。 我望住手中既蛇，再重組一下一陣間既計劃。希望可以成功啦。 「哼!想走!?無咁易!」門口又再度響起死神之聲。面前好似死神一般既男人，又再驅動佢既蠱蟲大軍殺到黎。 「瑤，我一陣會衝入去，你唔好跟入黎，我有咩事就準備走。」我無等佢覆，我就行左出去，同個蠱師對恃。 「細路，你就算依家求我都無用，你都一定要死。」個隻怪物用手指指住我。 「未必，中原道術未必輸比雲南蠱毒。」我冷笑一聲回應。 「你!上!」蠱師又再度驅動佢既蠱蟲擁上黎。 我將岩岩捉到既個條蛇握係右手，兩張符就係左手，直衝入蟲群。 我苦笑，希望個計劃得啦。