那些年，當香港仲係百鬼夜行既時代: 6. 嘉賢臺III – 鬼嫁II

「野人!!!!!走呀!!撞野啦!!」黑仔立即企起身向住野人大叫，係咁向佢地揮手。

 但係野人好似無為意咁，依然盲目咁向前行。我見到跟住係後邊既雨瑤都係一啲反應都無。我開始心急，因為生人同死人鬼嫁係 唔衝撞得。師父同我地講過，鬼嫁就係女方已死既亡魂出嫁。佢地多數係孤魂野鬼，比閻王逼婚既又有，附近有生人結婚時又會 吸引到佢打扮如此走出黎。 仲有一樣最恐怖既情況會形成鬼嫁，就係當呢班人生前係參加緊一個婚禮，但係突然又死哂，咁鬼嫁就會晚晚係呢個地方上演.... 我唔敢再諗落去，因為野人佢地已經就撞上去轎個到。 我抽出我護身既符。呢張符係由師父比我，佢話特質特別，好易撞野，用張符就可以趕走佢。 趕走佢，而唔係佢地。 我隻手開始出汗。咁多鬼我都係第一次見。 「太上敕令，驅邪縛魅 ，冥界天道，金光速現! 」我低聲喝道。倏地，符紙金光大作，符咒發揮作用啦!其實我都唔知呢道符 到底有咩用，我係件事之後先知，原來道符係鎮鬼符，姐係帶係身可以封住哂附近既鬼既所有動作。太過逆天啦! 我係二樓爬落去一樓，邊跑向野人個邊邊對黑仔大叫，「叫返豬肉榮佢地返黎，快D走，不過唔好用一樓既門! 」 黑仔佢都馬上向豬肉榮佢地喱埋既地方跑去。 我一行到去野人佢地附近，野人佢地即刻清醒返。 「丫死仔你做咩走落黎丫!」我唔理野人既說話，立即推返佢地去後面。 「走!真係有鬼!」我死命咁想推走佢地，因為我見到，我張符竟然對轎入邊既新娘無效!  帶住鳳冠霞帔既鬼新娘慢慢推開轎門，準備行出黎! 我知道，連道符都鎮佢唔住，咁佢出到黎一定大殺四方，殺哂所有阻住佢出嫁既人! 我一手拉過雨瑤，一手拉過可盈，腳下生風，頭也不回咁叫野人同另一個朋友走。 野人同埋另一個朋友好似都比我嚇驚左，所以都無再追問，跟上左我既步伐。 「小女子身世咁可憐，你竟然咁忍心離我而去...唔好走呀!留低陪我一生一世!!!一!生!一!世!!」 一把陰冷又尖銳既女聲係我後邊遠處響起。配合埋嘉賢臺既陰森氣氛，我當堂打左個冷震。唔係咁邪下話，撞到隻識有條理咁講 野既!? 我記得師父曾經話過鬼分五等，唔識講野，剛死之人既鬼魂為第五等，最低等，最少殺傷力。唔識講野，死左好耐既人既鬼魂為 四等，唔搞佢佢都唔理你。識講野既為三等，呢D鬼識得用聲音黎迷惑人，所以殺傷力高。而識講野，又識得用唔同句子去引你 既呢，係第二等，因為佢地識食腦。 「小女子身世咁可憐，你竟然咁忍心離我而去...唔好走呀!留低陪我一生一世!!!一!生!一!世!!」隻女鬼又重複呢句。 咁都好D，咁都係鬼之中既三等姐。 既然係三等鬼，我都無咁驚，我決定回頭睇下佢咩料。因為我如果要再返入黎搵黑仔佢地，我都要知道敵人係邊個。 我一回頭既個一下，就岩岩有一道陰風吹左過黎。女鬼既鳳冠霞帔亦被順帶吹起。 隻鬼面容愴白，雙目流血，面上笑容似笑非笑，雙頰紅卜卜。佢唔係頭先企係嘉賢臺正門隻女鬼又可以係邊個!?