那些年，當香港仲係百鬼夜行既時代: 10.東華義莊IV—翊聖雷霆驅魔辟邪鎮宅賜福帝君

「咩雷霆...」正當我想張口問個時，黑仔好大力咁甩一甩自己個頭。 係喎，義莊張叫我地唔好出聲。 奉請左個個唔知咩君之，義莊入邊突然陰風大作。直情大風到吹埋黎打黎D肉到赤赤痛，我不由自主地開始合上眼。 但係合上眼之後我竟然隱約仲可以見到義莊張施法既情況!! 只見係朦朧不清既前方，義莊張拎住一把帶有少少光既木劍，一劍刺穿放左大廳左邊既紙扎公仔! 我都未諗到佢點解會咁做既時候，就感覺到有D液體彈左上塊面到，我下意識一摸，溫熱既感覺由手心傳出。 血!!係血呀!!我面上邊個D係血! 紙扎公仔都會出血既架咩!? 心念電轉之間，義莊張已經插死哂咁多隻紙扎公仔。 「奉請翊聖雷霆驅魔辟邪鎮宅賜福帝君!!」義莊張再次大喝，係朦朧既大霧中，只見到一個高大既身影入左義莊張身入邊。 「你地可以以開眼啦。」 「開眼?我睇到野架喎，睇到野都唔係開左眼?」我不解地問道。 「你..你無開到眼喎..你點睇野呀?」黑仔把聲，仲帶有少少震驚。 我滿腹疑惑，但係我都試下擘帶我雙眼。 當開返眼個一刻，就好似一個800度近視既人帶返眼鏡咁。清哂。 「嗯...我知你做咩啦...不過我唔夠時間解釋，我地得5分鐘時間去送走王大牛，5分鐘後鍾馗 大師都保唔住我地。」

我下意識又摸下塊面。

咩都無。下?咩都無?血呢?

我又望下我隻手，一樣，咩都無。

D血好似就從來都未存在過咁。 「行啦細路。」義莊張塞左一疊溪錢比我同黑仔。





「記住一路一行一路向頭頂灑。」

語畢，就自己領頭，一邊灑住慘白色既溪錢，一邊大喝: 「翊聖雷霆驅魔辟邪鎮宅賜福帝君出巡，大妖小鬼俱迴避，若有逆者，滅之!」